દુર્ઘટના@બનાસકાંઠા: સ્વિફ્ટ કાર ડિવાયઇડર સાથે અથડાતા 3 લોકોના મોત નીપજ્યા

અટલ સમાચાર ડોટ કોમ, ડેસ્ક 

રાજ્યમાં અકસ્માતના બનાવો ખુબજ વધી ગયા છે. રોજ કોઈને કોઈ જગ્યાએથી અકસ્માતના બનાવો સામે આવતા હોય છે. ફરી અકેવારા અકસ્માતનો ભયાનક બનાવ સામે આવ્યો છે. વડગામના તેનીવાડાના અધુરિયા બ્રિજ પાસે ગોઝારા અકસ્માતની ઘટના સામે આવી છે. જેમાં સ્વિફ્ટ કાર ડિવાયઇડર સાથે ભટકાઇ જતાં ગાડીમાં સવાર પાંચ લોકો પૈકી પતિ-પત્ની સહિત ત્રણના ઘટનાસ્થળે જ મોત થયા છે. જ્યારે અન્ય બે ઘાયલ થતાં સારવાર અર્થે ખસેડવામાં આવ્યા છે. મળતી માહિતી મહેસાણાનો સુથાર પરિવાર રણુજા દર્શન કરીને પરત ફરી રહ્યો હતો, ત્યારે આ અકસ્માત સર્જાયો હતો.

આ અકસ્માત અંગે મળતી માહિતી મુજબ મહેસાણાના ગાંભુ ગામનો અને હાલ મહેસાણાના દેદિયાસણના ગોકુલધામ ફ્લેટમાં રહેતો સથાર પરિવાર સ્વિફ્ટ કારમાં રણુજા ખાતે બાબા રામદેવપીરના દર્શન કરવા ગયો હતો. ત્યારે આજે પરત ફરતાં બનાસકાંઠા જિલ્લાના વડગામ તાલુકાના તેનીવાડાના અધુરિયા બ્રિજ પાસે કાર ડિવાઇડરમાં ઘૂસી ગઇ હતી.

પુરઝડપે આવતી કાર ડિવાઇડરમાં ઘૂસી જતાં કારના આગળના ભાગનો ભુક્કો બોલી ગયો હતો. કારની ટક્કર એટલી જોરદાર હતી કે એરબેગ પણ ખુલી ગઇ હતી. આ અકસ્માતમાં કારમાં સવાર પાંચ લોકો પૈકી વિનુભાઈ ચીમનલાલ સુથાર તેમના પત્ની ગીતાબેન વિનુભાઈ સુથાર અને ડ્રાઇવર સંજયભાઈ ચંદુભાઈ સુથારના ઘટનાસ્થળે જ મોત થયા હતા. જ્યારે અન્ય બે લોકો ઇજાગ્રસ્ત થયા હતા.

વહેલી સવારે થયેલા આ અકસ્માતની જાણ સ્થાનિકોને થતાં સ્થાનિકોના ટોળેટોળા ઘટનાસ્થળે એકઠા થઇ ગયા હતા અને તુરંત 108 અને છાપી પોલીસને જાણ કરી હતી. છાપી પોલીસે તાત્કાલિક ઘટનાસ્થળે દોડી જઇ ત્રણેય મૃતદેહોને પોસ્ટમોર્ટમ અંગે ખસેડી આગળની તપાસ હાથ ધરી છે.

મળતી માહિતી મુજબ મૃતક વિનુભાઈ ચીમનલાલ સુથાર અને એમના ધર્મપત્ની ગીતાબેન વિનુભાઈ સુથારની અંતિમયાત્રા આવતીકાલે સવારે ગુરુવારના રોજ સાત વાગ્યે મહેસાણાના દેદિયાસણના ગોકુલધામ ફ્લેટથી પરાના સ્મશાન લઈ જવામાં આવશે.