દુર્ઘટના@ગુજરાત: કારચાલકે રોડ ક્રોસ કરતા યુવકને હડફેટે લેતા મોત નીપજ્યું

અટલ સમાચાર ડોટ કોમ, ડેસ્ક 

રાજ્યમાં અકસ્માતના બનાવો ખુબજ વધી ગયા છે. રોજ કોઈને  કોઈ જગ્યાએથી અકસ્માતના બનાવો સામે આવતા હોય છે. રાજકોટના યુવાન તેમના પરિચિત યુવકની કાર લઈને આંબાજી દર્શન કરવા જઈ રહ્યા હતા. 15 ઓગસ્ટના રાતના સમયે તેઓ કાર લઈને સાણંદ ચોકડી પાસેના બ્રિજ નજીક પહોચ્યા હતાં, ત્યારે રસ્તો પસાર કરી રહેલો યુવકની હડફેટે આવતા તેને ગંભીર ઇજા પહોંચી હતી. જે બાદ કારમાં સવાર યુવકો દ્વારા ઈજાગ્રસ્તને 108 મારફતે હોસ્પિટલ ખસેડવામાં આવ્યો હતો, પરંતુ યુવકને સારવાર મળે તે પહેલાં જ મોત નીપજ્યું હતું .આ મામલે ટ્રાફિક પોલીસે આરોપીની ધરપકડ કરી કાયદેસરની કાર્યવાહી શરૂ કરી છે.

એસજી હાઇવે પર સાણંદ ચોકડી નજીક 15મી ઓગસ્ટની રાતે એક અકસ્માત સર્જાયો હતો. આ અકસ્માતમાં અજાણ્યા યુવકનું મોત નીપજ્યું છે. આ સમગ્ર બનાવવાની તપાસ ટ્રાફિક પોલીસ કરી રહે છે. ત્યારે મળતી માહિતી પ્રમાણે, રાજકોટના પાર્થ બીપીનભાઈ તન્ના કાર લઈને અંબાજી દર્શન કરવા જઈ રહ્યા હતાં. ત્યારે સાણંદ ચોકડી પાસે આવેલા બ્રિજના છેડે તેઓ કાર લઈને જઈ રહ્યા હતા, તે સમયે રસ્તા પરથી આસરે એક 30 વર્ષનો યુવક રસ્તો પસાર કરી રહ્યો હતો. આ સમયે તેમની કારની હડફેટે આવતા યુવક નીચે પટકાવ્યો હતો.

આ અકસ્માત થયા બાદ ગંભીર રીતે ઈજાગ્રસ્ત યુવકને સારવાર માટે 108ને જાણ કરવામાં આવી હતી અને તેને હોસ્પિટલ લઈ જવામાં આવ્યો હતો. ત્યારબાદ અકસ્માત કરનાર અને તેના સાથેનો એક વ્યક્તિ પણ હોસ્પિટલ પહોંચ્યા હતા, પરંતુ અકસ્માતમાં ઘાયલ યુવકનું મોત નીપજ્યું હતું. આ સમગ્ર બનાવની પોલીસની જાણ થતાં આરોપીની ધરપકડ કરી આગળની કાર્યવાહી શરૂ કરી છે.

આ ઉપરાંત પોલીસે મૃતક યુવકની ઓળખ માટેના પ્રયાસ શરૂ કર્યા છે. હાલ તેની પાસેથી માત્ર હાથ પર લખેલું નિશાન જાણવા મળ્યું છે. પોલીસે આકસ્માતની તપાસ સંદર્ભે સીસીટીવી એકત્ર કરવાના પણ પ્રયાસો હાથ ધર્યા છે.