ઘટના@અમદાવાદ: રેવડી બજારમાં આવેલા સિંધી માર્કેટમાં આગ ભભૂકી ઊઠતા અફરાતફરી, 30થી વધુ દુકાનો ઝપેટમાં

અટલ સમાચાર ડોટ ઓમ, ડેસ્ક

અમદાવાદના કાલુપુર વિસ્તારના રેવડી બજારમાં આવેલા સિંધી માર્કેટમાં અચાનક આગ ભભૂકી ઊઠતા ભારે દહેશત ફેલાઈ ગઈ છે. આ આગમાં 30થી વધુ દુકાનો તેની ઝપેટમાં આવી ગઈ છે. આગ લાગતા જ વિસ્તારમાં અફરાતફરીનો માહોલ સર્જાયો હતો. આગ લાગવાની ઘટનાને પગલે સમગ્ર વિસ્તારમાં ભય ફેલાયો હતો. ઘટનાની જાણ થતાં જ ફાયર બ્રિગેડ તાત્કાલિક હરકતમાં આવી હતી.કુલ 9 ફાયર ફાઇટરની ગાડીઓ સ્થળ પર દોડી આવી અને આગ પર કાબૂ મેળવવાના પ્રયાસો શરૂ કર્યા હતા. ફાયર બ્રિગેડના જવાનો ચારે તરફથી પાણીનો મારો ચલાવી આગને વધુ ફેલાતી અટકાવવાનો પ્રયત્ન કરી રહ્યા છે. આગનું પ્રમાણ મોટું હોવાથી તેને કાબૂમાં લેવા માટે ભારે મહેનત કરવી પડી રહી છે. સિંધી માર્કેટ મુખ્યત્વે કપડાં અને વિવિધ ઘરગથ્થુ તેમજ અન્ય વેપારી ચીજવસ્તુઓ માટે જાણીતું બજાર છે. અહીં મોટી સંખ્યામાં દુકાનો આવેલ હોવાથી આગે ઝડપથી વિકરાળ સ્વરૂપ ધારણ કર્યું હોવાનું માનવામાં આવે છે.

આગ લાગ્યા બાદ આસપાસના વેપારીઓએ પોતાની દુકાનોમાંથી સામાન બહાર કાઢવાની હડકંપ મચાવી દીધી હતી. સ્થળ પર હાજર લોકોએ જણાવ્યું કે આગ ખૂબ જ ઝડપથી ફેલાઈ હતી. હાલ સુધી કોઈ જાનહાનિ અંગે માહિતી મળી નથી, પરંતુ મોટાપાયે આર્થિક નુકસાનની શક્યતા વ્યક્ત કરવામાં આવી રહી છે. અધિકારીઓએ જણાવ્યું છે કે આગને સંપૂર્ણપણે કાબૂમાં લેવા માટે સતત પ્રયાસો ચાલુ છે. આગ લાગવાનું ચોક્કસ કારણ હજી સુધી સામે આવ્યું નથી. પ્રાથમિક અનુમાન મુજબ શોર્ટ સર્કિટ અથવા અન્ય કોઈ તકનીકી ખામી જવાબદાર હોઈ શકે છે. પરંતુ સત્તાવાર તપાસ બાદ જ સ્પષ્ટતા થશે. આ ઘટનાને પગલે સમગ્ર વિસ્તારમાં ચિંતા અને ભયનો માહોલ છવાયો છે.