ઘટના@ખેડા: આગરવા ગામમાં વીજ કરંટ લાગતા 3 લોકોના મોત, 1ને ગંભીર ઈજા

અટલ સમાચાર ડોટ કોમ, ડેસ્ક

​​​​​​ઘણીવાર અસરગ્રસ્તને બચાવવા જતા બીજા લોકો પણ ઝપેટમાં આવીને જીવ ગુમાવતા હોવાના અહેવાલો અવારનવાર સામે આવતા હોય છે. ત્યારે આવી જ એક ગંભીર ઘટના ખેડા જિલ્લામાં સામે આવી છે. ખેડાના ઠાસરામાં 3 લોકોના ગંભીર મોત થયા હોવાનો અહેવાલ જાણવા મળી રહ્યો છે. આગરવા ગામમાં વીજ કરંટ લાગવાથી 3 લોકોના મોત થયાની સાથે 1ને ગંભીર ઈજા થઈ હોવાનું સામે આવ્યું છે. 

આગરવા ગામમાં ખેતરની ઓરડીમાં 2 વર્ષીય દીકરીને રમતી હતી. જે કુવાની મોટર પાસે જતા 2 વર્ષીય દીકરીને કરંટ લાગ્યો હતો. જે બાળકીને કરંટ લાગતા માતા તેને બચાવવા માટે દોડી આવી હતી. જે બાળકીને બચાવવામાં માતાને કરંટ લાગ્યો હતો. તેની સાથે 8 વર્ષીય પુત્ર પણ તેની માતા સાથે વીજ કરંટની ઝપેટમાં આવી ગયો હતો.વીજ કરંટ લાગવાથી માતા પુત્રી તેમજ પુત્રનું ઘટના સ્થળે જ મોત થયું હતું. જોકે આ ત્રણેયને બચાવવા જતા મહિલાના સાસુ લીલાબેનને પણ વીજ કરંટ લાગતા તેઓ ગંભીર ઈજાગ્રસ્ત થયા હતા. ઘટનાની જાણ થતા આસપાસના લોકોએ ઈજાગ્રસ્ત સાસુને સારવાર માટે સરકારી હોસ્પિટલ ખાતે ખસેડ્યા હતા.