ઘટના@નર્મદા: રેલવે બ્રિજની દીવાલ સાથે બાઈક અથડાતાં 2 યુવાનોના કરુણ મોત

અટલ સમાચાર ડોટ કોમ, ડેસ્ક

નર્મદા જિલ્લાના તિલકવાડામાંથી કાળજું કંપાવી દેનારી અકસ્માતની ઘટના સામે આવી છે. તિલકવાડા તાલુકા અંતર્ગત આવતા નલિયા ગામ નજીક એક અનિયંત્રિત ટૂ-વ્હીલર રેલવે બ્રિજની રક્ષણાત્મક દીવાલ સાથે ધડાકાભેર અથડાતાં સર્જાયેલા ગંભીર અકસ્માતમાં બે આશાસ્પદ યુવાનોના ઘટનાસ્થળે જ કમકમાટીભર્યા મોત નીપજ્યા છે. આ દર્દનાક ઘટનાને પગલે ગરુડેશ્વર તાલુકાના ઝરવાણી ગામમાં ભારે શોક અને આક્રંદનો માહોલ છવાઈ ગયો છે. ગરુડેશ્વર તાલુકાના જાણીતા પ્રવાસન વિસ્તાર એવા ઝરવાણી ગામના બે યુવાનો પોતાના ટૂ-વ્હીલર પર સવાર થઈને કોઈ અંગત કે વ્યાવસાયિક કામ અર્થે તિલકવાડા તરફથી પસાર થઈ રહ્યા હતા.

આ દરમિયાન નલિયા ગામ નજીક આવેલા રેલવે ઓવરબ્રિજ/અંડરપાસના વળાંક પાસે પહોંચતાં જ ચાલકે અચાનક વાહન પરનો કાબૂ ગુમાવી દીધો હતો. બેકાબૂ બનેલું ટૂ-વ્હીલર પૂરપાટ ઝડપે સીધું જ રેલવે બ્રિજની સિમેન્ટ-કોંક્રિટની મજબૂત દીવાલ સાથે જોરદાર રીતે અથડાયું હતું.ટક્કર એટલી જોરદાર અને પ્રચંડ હતી કે બંને યુવાનો બાઈક પરથી ફંગોળાઈને માર્ગ અને દીવાલ સાથે અથડાયા હતા. બંને સવારોને માથાના ભાગે તેમજ શરીરના અંદરના અંગોમાં ગંભીર ઈજાઓ પહોંચી હતી અને અતિશય રક્તસ્ત્રાવ વહી જવાના કારણે બંને યુવકોએ થોડી જ મિનિટોમાં તરફડીને ઘટનાસ્થળે જ દમ તોડી દીધો હતો.

અકસ્માતના જોરદાર અવાજને કારણે આસપાસના ખેતરોમાંથી ગ્રામજનો તેમજ રસ્તા પરથી પસાર થતાં વાહનચાલકો તાત્કાલિક સ્થળ પર દોડી આવ્યા હતા, જેને પગલે થોડી જ વારમાં લોકોના મોટા ટોળાં એકત્રિત થઈ ગયા હતા.દુર્ઘટનાની જાણ સ્થાનિક લોકો દ્વારા તાબડતોબ 108 ઇમરજન્સી એમ્બ્યુલન્સ સેવા અને તિલકવાડા પોલીસ મથકને કરવામાં આવી હતી. પોલીસનો કાફલો ઘટનાસ્થળે પહોંચી ગયો હતો અને પંચનામાની કાયદેસર કાર્યવાહી હાથ ધરી બંને મૃતકોના પાર્થિવ દેહને પોસ્ટમોર્ટમ અર્થે સરકારી હોસ્પિટલમાં ખસેડવાની તજવીજ કરી હતી.