ઘટના@સુરત: ભાજપના નેતાને બદનામ કરવાનું ગંભીર કાવતરું, પુત્રએ પહેલા માળેથી લગાવી છલાંગ, જાણો વધુ

અટલ સમાચાર ડોટ કોમ, ડેસ્ક

સુરતમાં પૂર્વ કોર્પોરેટર અને ભાજપના એક અગ્રણી નેતા તેમજ તેમના પરિવારને સોશિયલ મીડિયા પર બદનામ કરવાનું ગંભીર કાવતરું રચાયું છે. આ બદનામી અને માનસિક ત્રાસથી કંટાળીને ભાજપ નેતાના પુત્રએ ઘરના પહેલા માળેથી છલાંગ લગાવીને આત્મહત્યા કરવાનો પ્રયાસ કર્યો હોવાની ઘટના સામે આવતા રાજકીય આલમ સહિત સમગ્ર શહેરમાં ચકચાર મચી ગઈ છે.

ભાજપ નેતાના પુત્રના એક યુવતી સાથેના ફોટો અને વીડિયો સોશિયલ મીડિયા પર જોરદાર વાયરલ કરવામાં આવ્યા હતા. આ ફેક ન્યૂઝ અને ફોટો વાયરલ થતાં આઘાતમાં આવેલા પુત્રએ પહેલા માળેથી કૂદીને આત્મઘાતી પગલું ભર્યું હતું. આ મામલે જ્યારે પોલીસ તપાસ શરૂ થઈ ત્યારે જે સત્ય બહાર આવ્યું તે ચોંકાવનારું હતું. આ આખું ષડયંત્ર અન્ય કોઈએ નહીં પરંતુ નેતાના પુત્રની પત્ની માનસીએ જ રચ્યું હોવાનો પર્દાફાશ થયો છે.

પોલીસ તપાસમાં બહાર આવેલી વિગતો અનુસાર, પત્ની માનસીનું અન્ય એક પુરુષ સાથે અફેર ચાલતું હતું. આ બાબત પકડાઈ જતાં અગાઉ માનસીએ પરિવારને એક લેખિત બાંહેધરી આપી હતી. આ લખેલી બાંહેધરી ગમે તેમ કરીને પાછી મેળવવા માટે માનસીએ પોતાના જ પતિ અને સસરાને બદનામ કરવાનો આ ખેલ ખેલ્યો હતો. તેણે સોશિયલ મીડિયા પર પતિ વિરુદ્ધ ફેક ન્યૂઝ અને ફોટો-વીડિયો વાયરલ કર્યા હતા. હાલમાં આ મામલે સુરતના સિંગણપોર પોલીસે ગુનો નોંધીને કાયદેસરની કાર્યવાહી હાથ ધરી છે.