વાતાવરણ@દેશ: હિમાચલમાં હિમવર્ષા બાદ 3 નેશનલ હાઈવે સહિત 223 રસ્તાઓ બંધ

અટલ સમાચાર ડોટ કોમ, ડેસ્ક 

હાલમાં શિયાળાની ઋતુ ચાલુ છે. કેટલાક વિસ્તારમાં કડકડતી ઠંડી પડી રહી છે. જમ્મુ-કાશ્મીર, ઉત્તરાખંડ અને હિમાચલ પ્રદેશમાં હિમવર્ષા થઈ છે. લાહૌલ અને સ્પીતિનું કુકુમસેરી સૌથી ઠંડું હતું. રાત્રિનું તાપમાન માઈનસ 6.9 ડિગ્રીથી નીચે ગગડ્યું છે.

હિમાચલમાં હિમવર્ષા બાદ ત્રણ નેશનલ હાઈવે સહિત 223 રસ્તાઓ બંધ થઈ ગયા છે. શિમલામાં સૌથી વધુ 145 રસ્તાઓ બંધ કરવામાં આવ્યા હતા, જ્યારે કુલ્લુમાં 25 અને મંડી જિલ્લામાં 20 રસ્તાઓ બંધ કરવામાં આવ્યા હતા. જેના કારણે ત્યાં પહોંચેલા પ્રવાસીઓ ફસાઈ ગયા છે. માર્ગો પર વાહનોની લાંબી લાઇનો જોવા મળી રહી છે.

રાજસ્થાન અને દિલ્હીમાં વરસાદ પડ્યો હતો. IMD અનુસાર, આગામી બે દિવસમાં દિલ્હી NCR, પંજાબ, હરિયાણા અને રાજસ્થાનમાં તાપમાનમાં વધુ ઘટાડો થઈ શકે છે. 9 રાજ્યોમાં ગાઢ ધુમ્મસનું એલર્ટ પણ છે.

હરિયાણાના કેટલાક જિલ્લાઓમાં વિઝિબિલિટી 10 મીટરથી ઓછી હતી. તેમજ, દિલ્હીમાં વિઝિબિલિટી ઘટીને 100 મીટરથી ઓછી થઈ ગઈ છે. દિલ્હી એરપોર્ટે એડવાઈઝરી જાહેર કરીને કહ્યું છે કે કેટલીક ફ્લાઈટ્સને અસર થઈ શકે છે.