દુર્ઘટના@જયપુર: 120ની ઝડપે દોડી રહેલી ઓડી કાર બેકાબૂ થઈને ડિવાઈડર સાથે અથડાઈ, 16ને કચડ્યાં, 1નું મોત અને 4 ઘાયલ

અટલ સમાચાર ડોટ કોમ, ડેસ્ક 

જયપુરમાં ગઈકાલ રાત્રે રેસિંગ કરી રહેલી એક ઓડી કારે હાહાકાર મચાવ્યો. જયપુરમાં માનસરોવરના ભીડભાડવાળા વિસ્તારમાં 120ની ઝડપે દોડી રહેલી ઓડી કાર પહેલા બેકાબૂ થઈને ડિવાઈડર સાથે અથડાઈ, પછી રોડ કિનારે લાગેલી ફૂડ સ્ટોલ્સમાં ઘૂસી ગઈ.

આ દરમિયાન ત્યાં 50થી વધુ લોકો હાજર હતા. કાર લગભગ 16 લોકોને કચડીને એક ઝાડ સાથે અથડાઈને અટકી. આ અકસ્માતમાં એક યુવકનું મોત થયું. જ્યારે, ચાર લોકો ગંભીર રીતે ઘાયલ છે.

આરોપી ડ્રાઈવર સહિત 3 લોકો ફરાર છે. આમાં જયપુર પોલીસનો એક જવાન પણ સામેલ છે. કારમાં સવાર એક યુવકને ભીડે પકડી લીધો. માહિતી અનુસાર, ચારેય લોકો નશામાં હતા. આ અકસ્માત રાત્રે લગભગ 9:30 વાગ્યે પત્રકાર કોલોની પોલીસ સ્ટેશન વિસ્તારમાં આવેલા ખરબાસ સર્કલ પાસે થયો હતો.

ઘટનાસ્થળેથી પકડાયેલા કાર સવાર રેણવાલ નિવાસી પપ્પુએ પોલીસને જણાવ્યું કે ઓડી કાર ચુરુનો રહેવાસી દિનેશ રણવા ચલાવી રહ્યો હતો. દિનેશે તેને શુક્રવારે રાત્રે ખરબાસ સર્કલ પાસે બોલાવ્યો હતો. પપ્પુએ જણાવ્યું કે ઓડીમાં બીજા બે લોકો બેઠા હતા.

અકસ્માતમાં ભીલવાડાના રહેવાસી રમેશ બૈરવાનું મોત થયું છે. રમેશ એક ફૂડ સ્ટોલ પર હેલ્પર તરીકે કામ કરતો હતો.

એસએચઓ  ગુરુભૂપેન્દ્ર સિંહે જણાવ્યું કે, અકસ્માતમાં 16 લોકો ઘાયલ થયા, જેમને જયપુરિયા હોસ્પિટલ લાવવામાં આવ્યા. આમાંથી રાકેશ, દીપક, મૃદુલ, છોટા, રવિ જૈન, રાજેશ, પારસ, ધર્મરાજ, પ્રકાશ, આશિષ, દીવાન, દેશરાજ અને રમેશ બૈરવાને દાખલ કરવામાં આવ્યા હતા.

અન્ય ત્રણ ઘાયલોને પ્રાથમિક સારવાર આપીને ઘરે મોકલી દેવામાં આવ્યા હતા. 4 ગંભીર ઘાયલોને એસએમએસ હોસ્પિટલમાં રિફર કરવામાં આવ્યા. પોલીસે ઓડી કાર જપ્ત કરી લીધી છે.

પોલીસના જણાવ્યા અનુસાર આરોપી ડ્રાઈવર દિનેશ સોલર બિઝનેસમેન છે. તેણે ત્રણ મહિના પહેલા જ આ ઑડી કાર ખરીદી હતી. તમામ આરોપીઓના મોબાઈલ પોલીસને કારમાંથી મળ્યા છે. તેમની પણ તપાસ કરવામાં આવી રહી છે.