દુર્ઘટના@દેશ: ઉત્તરાખંડમાં 2 અકસ્માત, 14 લોકોના મોત નીપજ્યા
અટલ સમાચાર ડોટ કોમ, ડેસ્ક
ઉત્તરાખંડમાં આજે સવારે બે અલગ-અલગ મોટા માર્ગ અકસ્માતમાં 14 લોકોના મોત થયા છે. જ્યારે 30 થી વધુ લોકો ઘાયલ થયા છે.
પહેલો અકસ્માત - બસ નદીમાં પડી:
આ અકસ્માત ટિહરી જિલ્લાના ઋષિકેશ-બદ્રીનાથ નેશનલ હાઇવે પર ગૂલર બજાર પાસે થયો હતો. સવારે 5:15 વાગ્યે હરિદ્વારથી કર્ણપ્રયાગ જઈ રહેલી વિશ્વનાથ સેવાની બસ અચાનક કાબૂ બહાર ગઈ અને 100 મીટર ઊંડી ખીણમાં પડીને સીધી નદીમાં જઈ પડી. બસમાં 34 મુસાફરો સવાર હતા.
પ્રાથમિક માહિતી મુજબ 8 લોકોના ઘટનાસ્થળે જ મોત થયા હતા. બાદમાં AIIMS ઋષિકેશમાં સારવાર દરમિયાન વધુ 2 લોકોએ જીવ ગુમાવતા મૃત્યુઆંક 10 પર પહોંચ્યો. 24 લોકો ઘાયલ છે, જેમાં 3 વર્ષની બાળકી પણ સામેલ છે. SDRF અને પોલીસે રેસ્ક્યુ ઓપરેશન હાથ ધર્યું.
બીજો અકસ્માત - બોલેરો ખીણમાં ખાબકી:
બીજો અકસ્માત રુદ્રપ્રયાગ જિલ્લાના ક્યુંજા ઘાટીમાં થયો. ગત રાત્રે લગ્ન પ્રસંગમાંથી પરત ફરી રહેલા બારાતીઓની બોલેરો કાર 500 મીટર ઊંડી ખીણમાં ખાબકી હતી. આ અકસ્માતમાં 4 લોકોના મોત થયા અને 6 લોકો ઘાયલ થયા છે. ઘાયલોને શ્રીનગરની બેઝ હોસ્પિટલમાં દાખલ કરવામાં આવ્યા છે.
તંત્રનું નિવેદન:
પ્રધાનમંત્રીએ આ દુર્ઘટના પર દુઃખ વ્યક્ત કર્યું છે. પોલીસે બંને અકસ્માતના કારણોની તપાસ શરૂ કરી છે. પ્રાથમિક અનુમાન મુજબ બસ ચાલકને ઝોકું આવી જતા અકસ્માત થયો હોવાનું મનાય છે.

