ઘટના@રાજકોટ: પ્રેમસંબંધ મામલે બે પરિવાર વચ્ચે પાણી ભરવાની ગાગરથી મારામારી થતાં, એક યુવાન સહિત બે લોકોને ઇજા

અટલ સમાચાર ડોટ કોમ ,ડેસ્ક 

ભગવતીપરામાં પ્રેમસંબંધ મામલે બે પરિવાર વચ્ચે પાણી ભરવાની ગાગરથી મારામારી થતાં એક યુવાન સહિત બે લોકોને ઇજા પહોંચતા લોહીલુહાણ હાલતમાં સારવારમાં ખસેડવામાં આવ્યા હતાં. બનાવ અંગે બી. ડિવિઝન પોલીસ મથકે સામસામી ફરિયાદ નોંધાઈ હતી.

બનાવ અંગે એરપોર્ટ રોડ પર અમરજીતનગર શેરી નં 2 માં રહેતાં પ્રભાતભાઇ ઉર્ફે પરેશભાઇ બાબુભાઇ મકવાણા (ઉ.વ.29) એ નોંધાવેલ ફરીયાદમાં આરોપી તરીકે જેરામ લખમણ બારૈયા અને પારસ બારૈયાનું નામ આપતાં બી.

ડિવિઝન પોલીસે 324,323,504 સહિતની કલમ હેઠળ ગુનો નોંધી તપાસ હાથ ધરી હતી.

વધુમાં ફરિયાદીએ જણાવ્યું હતું કે, તેમના મોટા બાપુના દિકરા સંજયભાઇ લાલજીભાઇ ઝાલાની પુત્રીને બે ત્રણ મહિના પહેલા જીજ્ઞેસ ઉર્ફે જીગો લખમણભાઇ બારૈયા સાથે પ્રેમ સંબધ હોય જેથી તેની સાથે તે ધરેથી જતી રહેલ હતી. જે બાબતે સમાજના વડીલો મારફતે એક બીજાને સમાધાનની વાત-ચીત ચાલુ હતી પરંતું લખમણભાઇના બીજા પુત્ર જેરામ તથા તેનો દીકરો પારસ માનતા ન હોય અને તેઓની પુત્રી ક્યાં છે તેની જાણ ન હોય જેથી સમાધાનની વાત-ચીત ચાલુ હતી.

દરમિયાન ગઇ કાલે રાત્રીના સાડા દશેક વાગ્યાની આસપાસ સંજયભાઇ તેની પત્ની સાથે આવેલ અને જેરામના ધરે સમાધાન અર્થે જવાનું કહેલ જેથી તેઓ તેમજ તેના પત્ની, સંજયભાઇ તેના અને મોટાભાઈ ભીખુભાઇ તથા તેના પત્નિ સાથે ઓટો રિક્ષામાં ભગવતીપરામાં જેરામના ઘરે ગયેલ હતાં. ત્યાં આરોપી જેરામ અને તેનો પુત્ર પારસ ઘરે હાજર હતાં. જ્યાં સંજયભાઇએ કહેલ કે, મારી દીકરીને તમારો ભાઇ ચાર મહિનાથી ભગાડી ગયેલ છે.

અમને એનું મોઢું તો જોવા આપો કહેતાં આ બંને પિતા-પુત્ર ઉશ્કેરાઇ ગયેલ અને ગાળો આપી ઉશ્કેરાઇ જઇ તેના ધરમાં પડેલ ખાલી પાણી ભરવાની ગાગરથી હુમલો કર્યો હતો. તેમજ જેરામે સંજયભાઇને ઢીકાપાટુનો મુંઢ માર મારવા લાગેલ અને બોલાચાલી ઝધડો થતાં માણસો ભેગા થઇ જતાં વધુ મારથી છોડાવેલ હતાં. બાદમાં ઇજાગ્રસ્તોને સારવારમાં સિવિલ હોસ્પિટલમાં ખસેડવામાં આવ્યા હતાં.

જ્યારે સામાપક્ષે ભગવતીપરા મેઈન રોડ પર રિધ્ધી સિધ્ધિ સોસાયટીમાં રહેતાં જેરામભાઈ લખમણભાઈ બારૈયા (ઉ.વ.52) એ નોંધાવેલ ફરિયાદમાં આરોપી તરીકે પ્રભાત ઉર્ફે પરેશ બાબુ મકવાણા, દક્ષાબેન પ્રભાત મકવાણા, સંજય લાલજી ઝાલા, અનીતાબેન સંજય ઝાલા, ભીખુ બાબુ મકવાણા અને કાંતાબેન ભીખુ મકવાણાનું નામ આપ્યું હતું.વધુમાં ફરિયાદીએ જણાવ્યું હતું કે, તેઓ છૂટક સફાઈનું કામ કરે છે. તેમનો નાનો ભાઈ ઘનશ્યામ ઉર્ફે જીગો તેઓના વતન જસદણના દહીસરા ગામમાં રહે છે. જીગાએ સંજયભાઇ ઝાલાની પુત્રી સાથે પ્રેમસંબંધ હોય જેથી બંને ગઈ તા.18/04/2023 ના મરજીથી મેરેજ કરેલ હતાં

જે મામલે બંને પક્ષ વચ્ચે સમાજના વડીલો મારફતે સમાધાનની વાતચીત ચાલુ હતી.
ગઈ કાલ રાત્રીના સાડા દશેક વાગ્યાની આસપાસ ફરિયાદી પરિવાર સાથે ઘરે હાજર હતાં ત્યારે સંજય તેના પત્નિ અનિતાબેન તથા કુંટુંબી ભાઈ પ્રભાત ઉર્ફે પરેશ, ભીખુ તથા તેના પત્નિ કાંતાબેન સાથે ઘરે ઘસી આવી બેફામ ગાળો આપતાં તેઓ બહાર નીકળતાં આરોપી બોલવા લાગતા હું બહાર નીકળતાં આરોપીઓ કહેવા લાગેલ કે, અમારી દીકરી કયા છે કહી તમામ શખ્સો ઢીકાપાટુનો માર મારવા લાગેલ અને તેમનો પુત્ર તથા પત્ની વચ્ચે પડતા તેને પણ ગાળો આપી ફળીયામાં પડેલી ખાલી ગાગર ઉપાડી માથામાં ઝીંકી દેતાં લોહીલુહાણ થઈ ગયાં હતાં. બાદમાં આરોપી ત્યાંથી નાસી છૂટ્યા હતાં. ઇજાગ્રસ્તોને 108 મારફતે સારવારમાં ખસેડવામાં આવ્યા હતાં. બનાવ અંગેની સામસામી ફરીયાદ પરથી બી. ડિવિઝન પોલીસે ત્રણ મહિલા સહિત આઠ શખ્સો સામે ગુનો નોંધી તપાસ હાથ ધરી હતી.