આગાહી@દેશ: આ રાજ્યોમાં ચોમાસું ફરી સક્રિય, જાણો હવામાન વિભાગે શું કહ્યું ?

અટલ સમાચાર, ડેસ્ક

ઓગસ્ટ મહિનામાં આકરી ગરમીનો પ્રકોપ સહન કર્યા બાદ સપ્ટેમ્બરમાં પણ લોકોને ગરમીથી રાહત મળતી દેખાઈ રહી નથી. દેશના ઘણા રાજ્યોમાં ચોમાસું ફરી સક્રિય થયું છે જેના કારણે આજે મધ્યપ્રદેશ અને બિહારના કેટલાક જિલ્લાઓમાં મધ્યમથી ભારે વરસાદની શક્યતા છે. વીજળી અને ભારે પવન સાથે વરસાદની સંભાવનાને ધ્યાનમાં રાખી બિહારના ઘણા જિલ્લાઓમાં યલો એલર્ટ જારી કરવામાં આવ્યું છે. જે વિસ્તારોમાં આજે વીજળી પડવાની સંભાવના છે ત્યાં રહેતા લોકોને પણ ચેતવણી અપાઈ છે.

દિલ્હી-એનસીઆર સહિત પંજાબ અને હરિયાણાના લોકો માટે પણ કોઈ સારા સમાચાર નથી, અહીંના લોકોએ વધુ વરસાદ માટે રાહ જોવી પડી શકે છે. અહીં પવન ફૂંકાઈ રહ્યો છે, આકાશ પણ વાદળોથી ઢંકાયેલું છે. પરંતુ હવામાન વિભાગ(IMD) અનુસાર અહીં 7-8 સપ્ટેમ્બરથી ફરી વરસાદી મોસમ છવાઈ જવાની શક્યતા છે. હવામાન વિભાગ (IMD) અનુસાર, ઓડિશા અને આંધ્રપ્રદેશના દરિયાકાંઠે બંગાળની ખાડીમાં લૉ પ્રેશર ઝોન સર્જાયું છે. મોનસૂન ટ્રફનો પશ્ચિમ છેડો હિમાલયની તળેટીની નજીક છે. તે યુપીના વારાણસી, છત્તીસગઢના અંબિકાપુર અને ઓડિશાના ઝારગુડામાંથી પસાર થાય છે. પછી દક્ષિણપૂર્વ તરફ લૉ પ્રેશર વિસ્તારના કેન્દ્ર તરફ આગળ વધે છે, જેના કારણે અહીં વરસાદની સંભાવના છે.

IMDના અનુમાન મુજબ, MP ના પૂર્વ ભાગમાં રીવા, શહડોલ, જબલપુર અને સાગર જિલ્લામાં આજે મધ્યમથી ભારે વરસાદ પડી શકે છે. રાજધાની ભોપાલમાં આજે વરસાદની સંભાવના છે. પર્વતીય હિમાચલ પ્રદેશ અંગેના અપડેટમાં IMDએ કહ્યું કે મંગળવારે ચંબાના સાચ પાસમાં હિમવર્ષા થઈ હતી, જેના કારણે રાજ્યમાં આગામી કેટલાક દિવસો સુધી હળવો વરસાદ ચાલુ રહેશે. ઉત્તરાખંડમાં પણ આવું જ હવામાન રહેશે. IMDએ બિહાર માટે જણાવ્યું કે રાજધાની પટના, કૈમુર, રોહતાસ, ગયા, ઔરંગાબાદ, અરવાલ, નવાદા, જહાનાબાદ, બેગુસરાય, શેખપુરા, નાલંદા, જમુઈ, ખગરિયા, મુંગેર, લખીસરાય, ભાગલપુર અને બાંકા જિલ્લામાં આજે વરસાદ પડી શકે છે. આ અંગે આ જિલ્લાઓમાં યલો એલર્ટ જારી કરાયું છે. કેટલાક વિસ્તારોમાં વીજળી પડવાની સંભાવના છે, જેને ધ્યાનમાં રાખીને લોકોને ચેતવણી આપવામાં આવી છે.