રાજકારણ@દિલ્હીઃ રાજ્યસભામાં ખડગે બોલ્યા- જંતર-મંતર પર લાઠીચાર્જ થયો, જાણો સમગ્ર મામલો

અટલ સમાચાર ડોટ કોમ, ડેસ્ક 

મોન્સૂન સત્રના પહેલા દિવસે રાજ્યસભામાં NEET પેપર લીકનો મુદ્દો ઉઠાવવામાં આવ્યો. મલ્લિકાર્જુન ખડગેએ કહ્યું- જંતર-મંતર પર વિદ્યાર્થીઓ ભેગા થયા, તેમનો અવાજ દબાવવામાં આવી રહ્યો છે. સરકારે તેમના પર લાઠીચાર્જ કર્યો. વિપક્ષના હોબાળાને કારણે બંને ગૃહની કાર્યવાહી 12.30 વાગ્યા સુધી સ્થગિત કરવામાં આવી છે.

સંસદની કાર્યવાહી સવારે 11 વાગ્યે શરૂ થઈ હતી. સત્ર શરૂ થયાના થોડા સમય બાદ વિપક્ષ પેપર લીકના મુદ્દે હોબાળો કર્યો. વિપક્ષના નેતાઓએ NEET-UG પેપર લીક અને રામ મંદિર દાન ચોરી સહિતના અનેક મુદ્દાઓ પર ચર્ચાની માંગ કરી. ઘણા સાંસદો પોસ્ટર, બેનરો લઈને હોબાળો કરતા વેલ સુધી પહોંચી ગયા હતા.

આ દરમિયાન, કાયદા મંત્રી અર્જુન રામ મેઘવાલે સુપ્રીમ કોર્ટમાં જજોની સંખ્યા વધારવા માટેનું બિલ લોકસભામાં રજૂ કર્યુ.

આ પહેલા પીએમ મોદીએ સંસદના હંસ દ્વાર પર મીડિયાને 15 મિનિટ સંબોધન કર્યુ. પીએમ મોદીએ કહ્યું- ચોમાસું હોય કે ચોમાસુ સત્ર હોય, જો બંને પ્રો-એક્ટિવ હોય તો ખૂબ જ પ્રોડક્ટિવ રહે છે. તેનાથી દેશનું કલ્યાણ થાય છે. તેથી અમે એવી જ પ્રાર્થના કરીએ છીએ કે ચોમાસું અને ચોમાસુ સત્ર પ્રોડક્ટિવ રહે.

પીએમએ કહ્યું- સંસદમાં તર્ક સાથે ચર્ચા થાય. દરેક અવાજને સન્માન મળે. હું તમામ સાંસદોને ગૃહમાં ચર્ચા માટે આમંત્રણ આપું છું. સત્રના પહેલા દિવસે હોબાળો થવાની શક્યતા છે. વિપક્ષ સોનમ વાંગચુકના ઉપવાસ, NEET-UG પેપર લીક અને રામ મંદિરના દાન ચોરી સહિતના અનેક મુદ્દાઓ પર સરકારને ઘેરવાની તૈયારીમાં છે.

વડાપ્રધાનનો રાહુલ ગાંધી પર કટાક્ષ પોતાના સંબોધનમાં પીએમ મોદીએ વિપક્ષના નેતા રાહુલ ગાંધી પર કટાક્ષ કરતા કહ્યું- હું કોઈ 56 વર્ષીય યુવકની વાત નથી કરી રહ્યો. હું દેશના એવા યુવા ઉદ્યોગસાહસિકોની વાત કરી રહ્યો છું જેમની સરેરાશ ઉંમર 28 વર્ષ છે... તેઓ અભિનંદનને પાત્ર છે, તેમાં કોઈ શંકા નથી. 56 નહીં, 28 વર્ષના યુવાન દેશનું સન્માન વધારી રહ્યા છે. તમે જાણો છો, ભારતમાં આત્મવિશ્વાસ વધારે છે. વિશ્વમાં ભારતની છબી સર્વત્ર સન્માનિત અને વ્યાપકપણે સ્વીકાર્ય બની રહી છે.

વડાપ્રધાન નરેન્દ્ર મોદીએ સંસદના ચોમાસુ સત્રના સાર્થક થવાની આશા વ્યક્ત કરી. મોદીએ અવકાશ ક્ષેત્રે ભારતની વધતી સિદ્ધિઓની પ્રશંસા કરતા કરી. તેમણે ઇનોવેશનને પ્રોત્સાહન આપવા અને દેશની અવકાશ ક્ષમતાઓને વિસ્તૃત કરવામાં ખાનગી ક્ષેત્રની ભૂમિકાની પણ પ્રશંસા કરી.

પોતાના સંબોધનમાં પીએમ મોદીએ રાહુલ ગાંધીનું નામ લીધા વિના કટાક્ષ કર્યો. પીએમ નરેન્દ્ર મોદીએ કહ્યું, "ભારતના એક યુવા સ્ટાર્ટઅપે ખૂબ મોટી સિદ્ધિ મેળવી છે. ભારતના યુવાનોએ અવકાશમાં નવી ઉડાન ભરી છે, ખૂબ મોટી સફળતા છે.