રિપોર્ટ@દેશ: પિતા-પુત્રીની ગોળી મારીને હત્યા, જાણો સમગ્ર ઘટના એકજ ક્લિકે

અટલ સમાચાર ડોટ કોમ, ડેસ્ક 

હાલમાં મર્ડરના ગુનાઓ ખુબજ વધી ગયા છે. ફરી એકવાર હદય કંપાવી ઉઠે એવી મર્ડરની ઘટના સામે આવી છે. અમેરિકામાં ભારતીયો પર હુમલાની ઘટનાનો સિલસિલો યથાવત્ જોવા મળી રહ્યો છે. અમેરિકાના વર્જિનિયામાં મહેસાણાનાં પિતા-પુત્રીની ગોળી મારીને હત્યા થઇ હોવાની વધુ એક ઘટના સામે આવી છે.

મળતી માહિતી મુબજ અમેરિકાના વર્જિનિયા રાજ્યના એકોમેક કાઉન્ટીમાં મહેસાણાના કનોડા ગામના મૂળ વતની પટેલ પરિવારના બે સભ્યોની ગોળી મારીને હત્યા કરવામાં આવી છે. મૃતક પિતા-પુત્રીની ઓળખ 56 વર્ષીય પ્રદીપકુમાર રતિલાલ પટેલ અને તેમની 24 વર્ષીય પુત્રી ઉર્વી તરીકે થઈ છે. બંને તેમની દુકાનમાં હતા ત્યારે એક અશ્વેત શખ્સે દુકાનમાં પ્રવેશ કરી બંને પર ગોળીબાર કરતાં પિતાનું ઘટનાસ્થળે અને પુત્રીનું સારવાર દરમિયાન મોત થયું હતું.

મહેસાણા જિલ્લાના બેચરાજી તાલુકાના કનોડા ગામના પ્રદીપભાઈ પટેલ પહેલા પરિવાર સાથે મહેસાણા રહેતા હતા અને મોઢેરા ચોકડી ખાતે ઇલેક્ટ્રોનિકની દુકાન ચલાવતા હતા. જે 6-7 વર્ષ પહેલાં પોતાની પત્ની હંસાબેન અને દીકરી ઉર્વી સાથે વિઝિટર વિઝા સાથે અમેરિકા ગયા હતા અને ત્યાં લીકર શોપ પર નોકરી કરતા હતા..

રોજિંદા જીવન પ્રમાણે 20 માર્ચ સવારે 5 કલાકે પ્રદીપભાઈ અને તેમની દીકરી ઉર્વી બંને જણા શોપ ખોલી અંદર ગયા એ દરમિયાન પાછળથી આવેલા ઇસમે ગોળીઓ વરસાવતા પ્રદીપભાઈનું ઘટનાસ્થળે મોત થયું હતું. જ્યારે ઉર્વીને સારવાર માટે ખસેડવામાં આવી હતી. જ્યાં આજે તેનું સારવાર દરમિયાન મોત નીપજ્યું હતું

ઘટનાની જાણ થતાં સ્થાનિક પોલીસ તરત જ ઘટનાસ્થળે પહોંચી હતી. પોલીસે તાત્કાલિક કાર્યવાહી કરીને હત્યા કરનાર અશ્વેત શખસની ધરપકડ કરી લીધી છે. આ ઘટનાએ અમેરિકામાં વસતા ગુજરાતી સમુદાયમાં ભારે શોકની લાગણી ફેલાવી છે. પોલીસે હત્યાનાં કારણો અંગે તપાસ શરૂ કરી છે. સ્થાનિક પોલીસ અધિકારીઓએ જણાવ્યું હતું કે આ કેસમાં વધુ તપાસ ચાલી રહી છે અને જલદી જ હત્યાનું કારણ સામે આવશે.

હત્યા કરનાર આરોપી જ્યોર્જ ફ્રેઝિયર ડેવોન વ્હાર્ટન હાલમાં જેલમાં કેદ છે. હજુ પણ હત્યા પાછળનું કારણ સામે આવ્યું નથી. બીજી તરફ સ્ટોરના માલિક પટેશ પટેલે જણાવ્યું હતું કે પિતા-પુત્રી બંને અમારા પરિવારના સદસ્યો હતા. મારા પિતરાઈ ભાઈની પત્ની અને તેના પિતા સવારે સ્ટોર પર કામ કરી રહ્યાં હતાં ત્યારે એક શખસ સ્ટોરમાં ઘૂસ્યો હતો અને અચાનક જ ગોળીબાર કર્યો હતો. મને ખબર નથી પડતી કે શું કરવું.

મહેસાણાના કનોડા સ્થિત મૃતકના કાકા ચંદુભાઈએ જણાવ્યું હતું કે મારા ભાઇનું અવસાન ઘણા સમય પહેલાં થયું છે. મારો ભત્રીજો પ્રદીપ, તેની પત્ની અને પુત્રી સાતેક વર્ષ અગાઉ વિઝિટર વિઝા પર અમેરિકા ગયાં હતાં અને બાદમાં ત્યાંજ સ્થાયી થઇ ગયા હતા. અમને આ દુર્ઘટનાની જાણ મીડિયા થકી થઇ હતી.

ચંદુભાઈએ જણાવ્યું કે, અમારી જોડે અમેરિકાનો કોઇ કોન્ટેક નહોતો, પણ પ્રદીપની બીજી દીકરી કેનેડા રહે છે, અમે તેનો કોન્ટેક કરતાં તેણે અમને માહિતી આપી કે મારા પપ્પાની સ્ટોરમાં ગોળી મારીને હત્યા થઇ છે, હું ત્યાં ગઇ છું. પ્રદીપને ગોળી મારતાં તેનું ઘટનાસ્થળે મોત થયું હતું, જ્યારે એની દીકરીનું વેન્ટિલેટર પર સારવાર દરમિયાન મોત થયું છે. ઉર્વીના લગ્ન 3 વર્ષ અગાઉ અમેરિકા રહેતા અને મૂળ ગાંધીનગરના યુવક સાથે થયા હતા. મૃતક ઉર્વી સિવાય પ્રદીપની એક દીકરી કેનેડા અને એક દીકરી અમદાવાદ રહે છે.