રિપોર્ટ@દેશ: ટ્રેનને લીલી ઝંડી બતાવવા ગયેલાં ભાજપનાં મહિલા MLA ધક્કામુક્કીમાં પાટા પર પડ્યાં

અટલ સમાચાર ડોટ કોમ, ડેસ્ક 

દેશમાં અવાર-નવાર કેટલીક દુર્ઘટનાઓ સામે આવતી હોય છે. આગ્રા-વારાણસી વંદે ભારત એક્સપ્રેસ ટ્રેનને લીલી ઝંડી બતાવતી વખતે એક ઘટના બની. લોકો ભીડભાડવાળી જગ્યાએ જેવી રીતે ધક્કામુક્કી કરતા હોય, એવી જ રીતે અહીં પણ કંઈક એવું જ થયું. યુપીના ઈટાવા સદરના ભાજપના ધારાસભ્ય સરિતા ભદોરિયા ટ્રેનને લીલીઝંડી બતાવવા જતા પાછળથી ધક્કો લાગતા ટ્રેનના પાટા પર પડી ગયા હતા, બાદમાં પોલીસકર્મી અને રેલકર્મીઓએ તેમને ફરી પ્લેટફોર્મ પર ખેંચી લીધા. જોકે તેઓ સહેજમાં બચી ગયા હતા.

વીડિયોમાં તમે જોઈ શકો છો કે, આ ઘટના ટ્રેન સાંજે 6 વાગ્યાની આસપાસ આવી ત્યારે ભીડભાડવાળા પ્લેટફોર્મ વચ્ચે બની છે. જ્યારે 61 વર્ષીય BJPના બીજી ટર્મના ધારાસભ્ય લીલી ઝંડી લઈ લોકો વચ્ચે સામેલ હતા ત્યારે તેઓ પાછળથી ધક્કો લાગવાથી પ્લેટફોર્મ પરથી નીચે પડ્યા હતા.

વડાપ્રધાન નરેન્દ્ર મોદી દ્વારા વંદે ભારત ટ્રેનના વર્ચ્યુઅલ ઉદઘાટન પછી ટ્રેન નંબર 20175- આગ્રાથી રેલ મંત્રી રવનીત સિંહ બિટ્ટુ દ્વારા ફ્લેગ ઓફ કરવામાં આવી હતી.

ભાજપના ઇટાવાના ખજાનચી સંજીવ ભદોરિયાએ મીડિયાને જણાવ્યું હતું કે, ધારાસભ્યને ટ્રેક પરથી ઊંચકીને ફરી પ્લેટફોર્મ પર લાવવામાં મદદ કરવામાં આવી હતી અને તે પછી ફ્લેગ-ઓફ ઇવેન્ટ માટે પ્લેટફોર્મ પર થોડો સમય રાહ જોઈ હતી. બાદમાં તેમણે ડોક્ટરોની સલાહ લીધી અને હવે તેમના ઘરે આરામ કરી રહ્યા છે. તેમને કોઈ શારીરિક ઈજા થઈ નથી.

ઈટાવા સ્ટેશને પહોંચતા પહેલા ટ્રેન ટુંડલા ખાતે સ્ટોપ લેતી હતી. તેના આગમન પછી મંચ પર હંગામો થયો કારણ કે સમાજવાદી પાર્ટીના સાંસદ જીતેન્દ્ર દૌવરે ભાજપના ભૂતપૂર્વ સાંસદ રામ શંકર અને વર્તમાન ધારાસભ્ય સરિતા ભદોરિયા સહિત વિવિધ રાજકીય વ્યક્તિઓ ફ્લેગ-ઓફમાં ભાગ લેવા માટે એકઠા થયા હતા.

ટ્રેનના હોર્ન તેના પ્રસ્થાનનો સંકેત આપતાં સમર્થકો સ્થાન માટે ધક્કામુક્કી કરતાં પ્લેટફોર્મ પર થોડીવાર અરાજકતા જેવો માહોલ થવા લાગ્યો હતો. જોકે એ ધક્કામુક્કીમાં ધારાસભ્ય પ્લેટફોર્મ પરથી ટ્રેનની સામે રેલવે ટ્રેક પર પડી ગયા. સમયસર ટ્રેનને રોકી દેવામાં આવી હતી, જેના કારણે મોટી દુર્ઘટના ટળી હતી. પ્રત્યક્ષદર્શીઓના જણાવ્યા અનુસાર, પોલીસ દ્વારા ભદોરિયાને ઝડપથી ટ્રેક પરથી બચાવી લેવામાં આવ્યા હતા અને હોસ્પિટલમાં લઈ જવામાં આવ્યા હતા.

વંદે ભારત એક્સપ્રેસની કામગીરીની તારીખ વિશે વાત કરતા, રેલવેના આગ્રા વિભાગના PRO પ્રશસ્તિ શ્રીવાસ્તવે કહ્યું કે, તારીખ ટૂંક સમયમાં જાહેર કરવામાં આવશે. ટ્રેન આગ્રા અને વારાણસી વચ્ચેનું અંતર અંદાજે સાત કલાકમાં કાપશે. રિટર્ન ટ્રેન વારાણસીથી આગ્રા સુધી 20176 નંબર પર ચાલશે, જ્યારે આગ્રા-વારાણસી સર્વિસ નંબર 20175 હશે.