રિપોર્ટ@દેશ: કોંગ્રેસ સાંસદને ત્યાં દરોડા પાડતા 300 કરોડ મળ્યા, જાણો વિગતે

અટલ સમાચાર ડોટ કોમ, ડેસ્ક 

ઇન્કમટેક્સ વિભાગને અત્યારસુધીમાં ત્રણ રાજ્ય- ઝારખંડ, ઓડિશા અને પશ્ચિમ બંગાળમાં કોંગ્રેસના સાંસદ ધીરજ સાહુ, તેમના સંબંધીઓ અને મિત્રોનાં 10 સ્થળ પરથી 300 કરોડ રૂપિયાથી વધુની રોકડ મળી છે. બે દિવસથી ચાલી રહેલા આ ઓપરેશનમાં પહેલા 200 કરોડ મળ્યા હતા. એમાં વધુ 100 કરોડ રોકડા મળતાં આંકડો 300 કરોડે પહોંચ્યો છે.

આ દરોડો બલદેવ સાહુ એન્ડ ગ્રુપ સાથે સંબંધિત છે. નિર્દેશકોના નામમાં અમિત સાહુ, રિતેશ સાહુ અને ઉદય શંકર પ્રસાદનો સમાવેશ થાય છે. શુક્રવારે ત્રીજા દિવસે 6 મોટાં અને 6 નાનાં મશીનોમાંથી જપ્ત કરાયેલાં નાણાની ગણતરી કરવામાં આવી હતી. આ હજુ પણ ચાલુ છે. સ્ટેટ બેંકની બોલાંગીર અને સંબલપુર શાખાઓમાં 300 કરોડ રૂપિયાથી વધુની ગણતરી પૂર્ણ થઈ ગઈ છે તેમજ ટિટલાગઢમાં દારૂનો ધંધો સંભાળતા સંજય સાહુ અને દીપક સાહુના ઘરેથી 8 કરોડ રૂપિયા રિકવર કરવામાં આવ્યા છે. રાઇસ મિલર અને ટ્રાન્સપોર્ટર રાજકિશોર જયસ્વાલના પરિસરમાંથી પણ મોટી રકમ જપ્ત કરવામાં આવી હતી.

આવકવેરા વિભાગના મહાનિર્દેશક સંજય બહાદુરે શુક્રવારે દિલ્હી જતા સમયે ભુવનેશ્વર એરપોર્ટ પર મીડિયાને જણાવ્યું હતું કે રોકડની રકમ એટલી મોટી છે કે એની ગણતરી કરવામાં હજુ બે દિવસ લાગશે. આ પછી જ આ અંગેની માહિતી સત્તાવાર રીતે આપી શકાશે.

બુદ્ધ જિલ્લામાં રાઇસ મિલ અને બૌદ્ધ ડિસ્ટિલરી પ્રાઇવેટ લિમિટેડ પર દરોડા શુક્રવારે મોડી સાંજે સમાપ્ત થયા હતા. અન્ય નવ જગ્યાએ હજુ તપાસની પ્રક્રિયા ચાલુ છે. 

દરોડાને લગતી મહત્ત્વની બાબતો
ઈન્કમટેક્સ વિભાગે બુધવારે દરોડા પાડવાનું શરૂ કર્યું હતું. દરોડાના પ્રથમ દિવસે 30 કબાટમાં ભરેલી ચલણી નોટો મળી હતી. બીજા દિવસે નોટો ભરેલી અનેક થેલીઓ મળી હતી. લોકર હજુ ખોલવાનાં બાકી છે.

પ્રાપ્ત માહિતી અનુસાર, બલદેવ સાહુ અને ગ્રુપ ઓફ કંપનીઝના બોલાંગીર અને સંબલપુરમાંથી રૂપિયા મળ્યા છે. આ ઉપરાંત રાઇસ મિલર અને ટ્રાન્સપોર્ટર રાજકિશોર જયસ્વાલના પરિસરમાંથી પણ મોટી રકમ જપ્ત કરવામાં આવી છે.

આવકવેરા વિભાગ આ સ્થળો પર દરોડા પાડે છે

• ઓડિશામાં બૌધ ડિસ્ટિલરીઝ પ્રાઇવેટ લિમિટેડ કંપની અને એની સંલગ્ન પરિસરમાં દરોડા.
• બલદેવ સાહુ અને ગ્રુપ ઓફ કંપનીઝનાં સ્થાનો (એ બૌધ ડિસ્ટિલરીની ભાગીદારી પેઢી છે).
• કોર્પોરેટ ઓફિસ અને ભુવનેશ્વરમાં બૌધ ડિસ્ટિલરીના અધિકારીઓનાં નિવાસસ્થાને.
• બોલાંગીર અને ટિટલાગઢના સુદાપાડાના બે દારૂના વેપારીઓનાં ઘરે.
• રાંચીના રેડિયમ રોડ પર સ્થિત સુશીલા નિકેતન નિવાસ.
• લોહરદગા સ્થિત સાંસદ ધીરજ સાહુનું નિવાસસ્થાન.

• આવકવેરા વિભાગે પ્રથમ બુધવાર અને ગુરુવારે દારૂ બનાવતી કંપની બલદેવ સાહુ અને ગ્રુપ ઓફ કંપનીઝની સાતપુરા ઓફિસમાંથી 9 અલમારીમાં રાખવામાં આવેલી રૂ. 500, 200 અને રૂ. 100ની નોટોનાં બંડલ જપ્ત કર્યાં હતાં. લાંબા સમય સુધી કબાટમાં રાખવાના કારણે બંડલોમાં ભેજ લાગી ગયો છે.

  નોટો એકબીજા સાથે ચોંટી ગઈ છે. નોટોની ગણતરી દરમિયાન અત્યારસુધીમાં ચાર મશીનો તૂટી ગયાં છે, જેના કારણે ગણતરીમાં વિલંબ થઈ રહ્યો છે. હવે ભુવનેશ્વરથી મોટાં મશીનો લાવવામાં આવ્યાં છે. નોટોની ગણતરી શુક્રવારે 12 વાગે છ મોટાં મશીનોથી શરૂ થઈ હતી અને સતત ચાલુ છે.

  બલદેવ સાહુ સન્સ એન્ડ ગ્રુપની ઓડિશામાં 250થી વધુ દારૂની દુકાનો છે. ઈન્કમટેક્સના દરોડા બાદ બોલાંગીર જિલ્લામાં 42 દુકાન બંધ થઈ ગઈ હતી અને એમાં કામ કરતા કર્મચારીઓ ડરીને ભાગી ગયા હતા. તેને ડર છે કે આવકવેરા વિભાગ તેની ધરપકડ કરીને પૂછપરછ કરશે.

  આવકવેરા વિભાગના મહાનિર્દેશક સંજય બહાદુર નોટો જપ્ત કરવા અને ગણતરી કરવા સહિતની સમગ્ર કામગીરી પર નજર રાખી રહ્યા છે. આ મામલે હજુ સુધી કોઈની ધરપકડ કરવામાં આવી નથી. એ જ સમયે, દરોડા અંગે દારૂનો વેપાર કરતી કંપની તરફથી હજુ સુધી કોઈ પ્રતિક્રિયા આપવામાં આવી નથી.

  કર્મચારીઓએ રૂ.500ની નોટો ફાડીને ફેંકી દીધી હતી
  ઈન્કમટેક્સના દરોડા જોઈને બુદ્ધ જિલ્લામાં આવેલી બૌદ્ધ ડિસ્ટિલરી પ્રાઈવેટ લિમિટેડ કંપનીના કર્મચારીઓએ 500 રૂપિયાની નોટો ફાડીને ફેંકવાનું શરૂ કર્યું હતું. જ્યારે આવકવેરા વિભાગના અધિકારીઓએ દરોડા દરમિયાન કંપનીની બાઉન્ડરી વોલની આસપાસ જોયું તો તેમને જાણવા મળ્યું કે 500 રૂપિયાની નોટો ફાડીને ફેંકી દેવામાં આવી હતી. આવકવેરા વિભાગના અધિકારીઓએ આ નોટો જપ્ત કરી છે. બાઉન્ડરી વોલ સિવાય બોટલિંગ પ્લાન્ટના બોઈલર પાસે ફાટેલી નોટો મળી આવી હતી.

• બુદ્ધ ડિસ્ટિલરી પ્રાઇવેટ લિમિટેડ ભુવનેશ્વરથી લગભગ 200 કિમી દૂર બુદ્ધ જિલ્લામાં આવેલી છે. એ 40 એકરમાં ફેલાયેલી છે. આ ગ્રુપના ડાયરેક્ટરોનાં નામ છે અમિત સાહુ, રિતેશ સાહુ અને ઉદય શંકર પ્રસાદ. વિભાગીય સૂત્રોના જણાવ્યા અનુસાર, નોટોની ગણતરી પૂર્ણ થયા બાદ જ કંપની સાથે જોડાયેલા લોકોની પૂછપરછ થઈ શકે છે. એવું કહેવાય છે કે એ દેશની સૌથી મોટી કંપનીઓમાંથી એક છે, જે દારૂનું ઉત્પાદન અને વેચાણ કરે છે.

  કોણ છે ધીરજ સાહુ
  23 નવેમ્બર 1955ના રોજ રાંચીમાં થયો હતો. ધીરજ પ્રસાદ સાહુના પિતાનું નામ રાય સાહેબ બલદેવ સાહુ અને માતાનું નામ સુશીલા દેવી છે. તેણે રાંચીની મારવાડી કોલેજમાંથી બીએનો અભ્યાસ કર્યો છે. ત્રણ વખત રાજ્યસભાના સાંસદ રહી ચૂક્યા છે. ધીરજની એક વેબસાઈટ છે, જેમાં તે પોતાને એક બિઝનેસમેન તરીકે પણ જણાવે છે. પિતા રાય સાહેબ બલદેવ સાહુ સ્વાતંત્ર્ય સંગ્રામમાં સામેલ હતા. આ પરિવાર આઝાદીથી કોંગ્રેસ સાથે જોડાયેલો છે.

  યૂથ કોંગ્રેસ સાથે રાજકારણની શરૂઆત કરી
  1977માં લોહરદગા જિલ્લા યુવા કોંગ્રેસમાં જોડાયા. ભાઈ શિવ પ્રસાદ સાહુ કોંગ્રેસની ટિકિટ પર બે વખત રાંચીથી લોકસભા સાંસદ હતા. 2018માં દાખલ કરવામાં આવેલા એફિડેવિટમાં તેણે પોતાની સંપત્તિ 34.83 કરોડ રૂપિયા જાહેર કરી હતી. તેણે 2.04 કરોડની જંગમ સંપત્તિ વિશે પણ માહિતી આપી હતી. કોઈ ફોજદારી કેસ નથી. સોગંદનામા મુજબ, તેમની પાસે રેન્જ રોવર, એક ફોર્ચ્યુનર, એક BMW અને એક પજેરો કાર છે.