રિપોર્ટ@દિલ્હી: અજિત પવારના બારામતીના વિદ્યા પ્રતિષ્ઠાનમાં અંતિમ સંસ્કાર કરવામાં આવશે

અટલ સમાચાર ડોટ કોમ, ડેસ્ક 

અજિત પવારનો પાર્થિવ દેહ ઘરે લઈ જવામાં આવ્યો હતો.અંતિમ યાત્રા થોડીવારમાં શરૂ થશે. મહારાષ્ટ્રના ડેપ્યુટી સીએમ અજિત પવારના આજે સવારે 11 વાગ્યે બારામતીના વિદ્યા પ્રતિષ્ઠાનમાં અંતિમ સંસ્કાર કરવામાં આવશે. આ પહેલા તેમના પાર્થિવ દેહને વિદ્યા પ્રતિષ્ઠાન અને તેમના વતન કોટેવાડીમાં અંતિમ દર્શન માટે રાખવામાં આવશે.

પવારના અંતિમ સંસ્કારમાં મહારાષ્ટ્ર સરકારનું આખું મંત્રીમંડળ સામેલ રહેશે. કેન્દ્રીય ગૃહમંત્રી અમિત શાહ પણ બારામતી આવશે. પીએમ નરેન્દ્ર મોદી પણ અંતિમ સંસ્કારમાં સામેલ થઈ શકે છે. જોકે આ અંગે હજુ સત્તાવાર પુષ્ટિ થઈ નથી. પવારનો આખો પરિવાર પણ બારામતી પહોંચી ગયો છે.

બુધવારે રાત્રે પણ પવારનો પાર્થિવ દેહ વિદ્યા પ્રતિષ્ઠાનમાં અંતિમ દર્શન માટે રાખવામાં આવ્યો હતો. ત્યારબાદ ફરી પુણ્યશ્લોક અહિલ્યાદેવી હોળકર ગવર્નમેન્ટ મેડિકલ કોલેજ લઈ જવામાં આવ્યો હતો.

પવારનું ચાર્ટર્ડ પ્લેન બુધવારે સવારે 8.45 વાગ્યે ક્રેશ થયું હતું. તેઓ 66 વર્ષના હતા. બારામતી એરપોર્ટ પર લેન્ડિંગ દરમિયાન પ્લેન ક્રેશ થયું હતું. અકસ્માતમાં પવારના સુરક્ષાકર્મી, બે પાઇલટ અને એક મહિલા ક્રૂ સહિત 5 લોકોના મોત થયા હતા.

પવાર 5 ફેબ્રુઆરીએ પુણેમાં યોજાનારી જિલ્લા પંચાયતની ચૂંટણી માટે 4 રેલીઓને સંબોધિત કરવાના હતા. તેઓ મુંબઈથી સવારે 8.10 વાગ્યે રવાના થયા હતા. પવારના નિધન પર મહારાષ્ટ્રમાં 3 દિવસનો રાજકીય શોક જાહેર કરવામાં આવ્યો છે.