રિપોર્ટ@દેશ: બળાત્કારના ગુનેગારોને નપુંસક કરવાની માગ કરતી અરજી, જાણો વધુ વિગતે

અટલ સમાચાર ડોટ કોમ, ડેસ્ક 

હાલમાં બળત્કારનાં ગુનાઓ ખુબજ વધી ગયા છે. રોજ કોઈને કોઈ જગ્યાએથી બળત્કારનાં બનાવો સામે આવતા હોય છે.  નિર્ભયા ગેંગરેપ-હત્યાની 12મી પુણ્યતિથિ પર સુપ્રીમ કોર્ટમાં અરજી દાખલ કરવામાં આવી હતી. જેમાં બળાત્કારના ગુનેગારોને નપુંસક બનાવવાની માગ કરવામાં આવી હતી. આ ઉપરાંત મહિલાઓની સુરક્ષા અંગે માર્ગદર્શિકા બનાવવા અને કાયદામાં સુધારો કરવા સહિતની 20 માંગણીઓ કરવામાં આવી છે.

જસ્ટિસ સૂર્યકાંત અને જસ્ટિસ ઉજ્જવલ ભુયાનની બેંચે અરજી સ્વીકારતા કહ્યું- આ માગ ખૂબ જ ક્રૂર છે. કોર્ટે કેન્દ્ર સરકારના વિવિધ મંત્રાલયો અને વિભાગોને અરજી પર નોટિસ જાહેર કરીને તેમનો જવાબ માંગ્યો છે. મહિલા વકીલોના સંગઠન સુપ્રીમ કોર્ટ વુમન લોયર્સ એસોસિએશન (SCWLA)એ અરજીમાં જાહેર ઇમારતો અને સ્થળોએ સીસીટીવી કેમેરા લગાવવા, ઓનલાઈન પોર્નોગ્રાફિક અને ઓટીટી અશ્લીલ સામગ્રી પર પ્રતિબંધ મૂકવાની માગ કરી છે.

SCWLAના પ્રમુખ અને વરિષ્ઠ વકીલ મહાલક્ષ્મી પવાણીએ જણાવ્યું હતું કે નિર્ભયાથી અભયા (કોલકાતાની આરજી કર બળાત્કાર-હત્યા પીડિતા)માં કંઈ બદલાયું નથી. રસ્તાથી લઈને ઘર સુધી મહિલાઓ પર બળાત્કાર થઈ રહ્યો છે. નિર્ભયા કેસ બાદ કાયદા કડક બનાવવામાં આવ્યા હતા પરંતુ તેનો અમલ થયો નથી. જ્યાં સુધી બળાત્કાર કેસમાં મીડિયા ટ્રાયલ નહીં થાય ત્યાં સુધી દેશ જાગતો નથી.

તેમણે નેશનલ સેક્સ ઓફેન્ડર્સ રજિસ્ટ્રી જેવું ઓનલાઈન પ્લેટફોર્મ બનાવવાની માગ કરી છે. બળાત્કાર કરનારા ગુનેગારોનો ડેટા તેમાં રાખવો જોઈએ, જે તમામ મહિલાઓ વાંચી શકે. રશિયા, પોલેન્ડ, દક્ષિણ કોરિયા, પાકિસ્તાન, ઇન્ડોનેશિયા, તુર્કી અને 8 યુએસ રાજ્યો સહિત ઘણા દેશોએ જાતીય ગુનાઓ માટે કાસ્ટ્રેશન અને નસબંધી જરૂરી કાયદા ઘડ્યા છે.