રિપોર્ટ@દેશ: IMDએ મધ્યપ્રદેશ, પશ્ચિમ ઉત્તર પ્રદેશ અને હિમાચલના ભાગોમાં કરા પડવાનું એલર્ટ આપ્યું

અટલ સમાચાર ડોટ કોમ, ડેસ્ક 

હાલમાં શિયાળાની ઋતુ ચાલુ છે. કેટલાક વિસ્તારમાં કડકડતી ઠંડી પડી રહી છે. ઉત્તર ભારતમાં કોલ્ડવેવ યથાવત છે. પંજાબ, હરિયાણા, રાજસ્થાન અને ઉત્તર પ્રદેશના કેટલાક ભાગોમાં પારો 10 ડિગ્રીથી નીચે ગગડ્યો હતો. IMDએ મધ્યપ્રદેશ, પશ્ચિમ ઉત્તર પ્રદેશ અને હિમાચલના ભાગોમાં કરા પડવાનું એલર્ટ આપ્યું છે. બંગાળની ખાડીમાંથી આવતા પવનોને કારણે મધ્ય ભારત અને દિલ્હી-NCRમાં વરસાદ પડશે.

પર્વતોમાં હિમવર્ષાને કારણે, શ્રીનગરમાં પારો માઈનસ 6° નોંધાયો હતો. શ્રીનગર ગુલમર્ગ કરતાં વધુ ઠંડુંગાર રહ્યું. અહીં તાપમાનનો પારો માઈનસ 6.6 ડિગ્રી સેલ્સિયસ નોંધાયો હતો. જોકે, શ્રીનગરમાં આ સિઝનમાં અત્યાર સુધી કોઈ હિમવર્ષા થઈ નથી.

હિમાચલમાં હિમવર્ષા બાદ ત્રણ નાશનલ હાઈવે સહિત લગભગ 134 રસ્તાઓ બંધ કરી દેવામાં આવ્યા છે. કોક્સરમાં મહત્તમ 5.6 સેમી હિમવર્ષા થઈ હતી. લાહૌલ સ્પીતિ જિલ્લાનું તાબો સૌથી ઠંડું હતું. અહીં રાત્રિનું તાપમાન માઈનસ 10.6 ડિગ્રીથી નીચે રહ્યું હતું.

લાહૌલ અને સ્પીતિમાં હિમવર્ષાની મજા માણવા આવેલા 100 જેટલા પ્રવાસીઓના વાહનો ફસાયા હતા. સેક્ટર 2માં તહેનાત જિલ્લા પોલીસની ટીમે લગભગ 20 વાહનોને બચાવ્યા અને પ્રવાસીઓને બરફથી ઢંકાયેલા વિસ્તારમાંથી બહાર કાઢ્યા.