રિપોર્ટ@દેશ: મહારાષ્ટ્રમાં પગને બદલે પ્રાઈવેટ પાર્ટની સર્જરી કરી, ડોક્ટરોની બેદરકારી

અટલ સમાચાર ડોટ કોમ, ડેસ્ક 

દેશમાં અવાર-નવાર કેટલાક ડોકટરની બેદરકારીની ઘટનાઓ સામે આવતી હોય છે.  મહારાષ્ટ્રના થાણે જિલ્લાના શાહપુર સ્થિત સરકારી હોસ્પિટલમાં ડોક્ટરોની બેદરકારીનો પર્દાફાશ થયો છે. એક દંપતી અહીં તેમના 9 વર્ષના પુત્રના પગની સારવાર કરાવવા માટે આવ્યું હતું. જોકે, ડોક્ટરોએ તેના પગને બદલે તેના પ્રાઈવેટ પાર્ટનું ઓપરેશન કર્યું હતું.

જ્યારે દંપતીએ આ અંગે ફરિયાદ કરી તો મેડિકલ ઓફિસરે કહ્યું કે, ડોક્ટરોએ કંઈ ખોટું કર્યું નથી. બાળકના પ્રાઈવેટ પાર્ટમાં સમસ્યા હતી. તેથી સર્જરી કરવામાં આવી છે. ડોક્ટર કદાચ માતા-પિતાને ઓપરેશન વિશે જણાવવાનું ભૂલી ગયા હશે અથવા તો આકસ્મિક રીતે અન્ય દર્દીના સંબંધીને કહી દીધું હશે. જો કે, બાળકના માતા-પિતાએ તબીબોનો ખુલાસો સ્વીકારવાનો ઇનકાર કર્યો હતો. આ અંગે તેણે શાહપુર પોલીસમાં ફરિયાદ કરી છે. જો કે હજુ સુધી કેસ નોંધાયો નથી. પોલીસે જણાવ્યું કે, આ મામલે તપાસ કરવામાં આવી રહી છે. જિલ્લા સિવિલ સર્જન ડો. કૈલાશ પવારે આ મામલે તપાસ કરાવવાની ખાતરી આપી છે.

ન્યૂઝ એજન્સી અનુસાર, બાળકના માતા-પિતાએ જણાવ્યું કે, તેમનો પુત્ર ગયા મહિને તેના મિત્રો સાથે રમી રહ્યો હતો. આ દરમિયાન તેના પગમાં ઈજા થઈ હતી. બાળકને 15 જૂને શાહપુરની સબ ડિસ્ટ્રિક્ટ હોસ્પિટલમાં દાખલ કરવામાં આવ્યો હતો. ડોક્ટરોએ તાજેતરમાં તેના ઇજાગ્રસ્ત પગને બદલવા માટે તેના પ્રાઇવેટ પાર્ટ પર સર્જરી કરી હતી. બાદમાં જ્યારે ડોક્ટરોને તેમની ભૂલનો અહેસાસ થયો ત્યારે તેમણે બાળકના ઈજાગ્રસ્ત પગની સર્જરી કરી.

હોસ્પિટલના મેડિકલ ઓફિસર ગજેન્દ્ર પવારે મીડિયાને જણાવ્યું હતું કે, પગની ઈજા ઉપરાંત બાળકને ફીમોસિસ (ત્વચાની ચુસ્તતા)ની સમસ્યા પણ હતી. તેથી ડોક્ટરોએ તેના બે ઓપરેશન કર્યા. ડોક્ટરોએ જે કર્યું તે યોગ્ય હતું. એમાં કશું ખોટું નહોતું. જ્યારે મેડિકલ ઓફિસરને પૂછવામાં આવ્યું કે આ અંગે વાલીઓને કેમ જાણ કરવામાં આવી નથી. તેના પર મેડિકલ ઓફિસરે કહ્યું કે, ડોક્ટર કદાચ તેમને કહેવાનું ભૂલી ગયા હશે અથવા તેમણે અન્ય દર્દીના સંબંધીને કહ્યું હશે. કારણ કે એ જ દિવસે હોસ્પિટલમાં આ જ ઉંમરના અન્ય એક છોકરાની સર્જરી થઈ હતી.