રિપોર્ટ@મુંબઈઃ NCP ધારાસભ્ય બોલ્યા-અજિત પવારનું રાજીવ ગાંધી જેવું મર્ડર, જાણો વધુ વિગતે

અટલ સમાચાર ડોટ કોમ, ડેસ્ક 

નેશનાલિસ્ટ કોંગ્રેસ પાર્ટીના ધારાસભ્ય અમોલ મિટકરીએ અજિત પવારના પ્લેન ક્રેશ અકસ્માત પર ગંભીર સવાલો ઉભા કર્યા. તેમણે પૂછ્યું કે અજિત પવારની હત્યા એ જ રીતે થઈ હતી જે રીતે LTTE એ રાજીવ ગાંધીની હત્યા કરી હતી? શું કેપ્ટન સુમિત કપૂર સુસાઈડ બોમ્બર બનીને આવ્યા હતા?

તેમણે પૂછ્યું કે જો કપૂરની પત્ની કહી રહી છે કે તે જીવે છે, તો શું સુમિત કપૂર ખરેખર પ્લેન ક્રેશમાં માર્યા ગયા હતા? તેઓ અકોલા જિલ્લાના બાલાપુર તાલુકાના પારસ ફાટામાં મુરલીધર રાઉત મિત્ર મંડળના શિવ જયંતિ કાર્યક્રમમાં બોલી રહ્યા હતા. તેમણે આગળ કહ્યું કે જ્યારે અજિત પવારના પ્લેન ક્રેશનું આટલું મોટું રહસ્ય છે તો મહારાષ્ટ્ર આટલું શાંત કેવી રીતે છે?

પુણે જિલ્લાના બારામતીમાં 28 જાન્યુઆરીના રોજ NCP નેતા અને નાયબ મુખ્યમંત્રી અજિત પવારનું વિમાન ક્રેશ થયું હતું. આ અકસ્માતમાં નાયબ મુખ્યમંત્રી સહિત 5 લોકોના મોત થયા હતા. આ અકસ્માત પર ત્યારથી સતત સવાલો ઉભા થઈ રહ્યા છે.

લિબરેશન ટાઈગર્સ ઓફ તમિલ ઈલમ શ્રીલંકાનું એક સશસ્ત્ર અલગતાવાદી સંગઠન હતું, જેની સ્થાપના 5 મે 1976ના રોજ વેલુપિલ્લઈ પ્રભાકરન દ્વારા કરવામાં આવી હતી. તેનો મુખ્ય ઉદ્દેશ્ય શ્રીલંકાના ઉત્તર અને પૂર્વમાં તમિલ લોકો માટે એક સ્વતંત્ર રાજ્યના બનાવવાનો હતો. આ સંગઠન 18 મે 2009ના રોજ શ્રીલંકાની સેના દ્વારા મુખ્ય નેતા પ્રભાકરનના મૃત્યુ બાદ સમાપ્ત થઈ ગયું.