રિપોર્ટ@તમિલનાડુ: કોંગ્રેસે TVK ચીફ વિજયને સમર્થન આપવાનો નિર્ણય કર્યો, સરકાર બનાવવા માટે 10 ધારાસભ્યોની જરૂર; જાણો વધુ વિગતે

અટલ સમાચાર ડોટ કોમ, ડેસ્ક 

તમિલનાડુમાં કોંગ્રેસે TVK ચીફ વિજયને સમર્થન આપવાનો નિર્ણય કર્યો છે. સૂત્રો અનુસાર, મંગળવારે મોડી રાત્રે તમિલનાડુ કોંગ્રેસની પોલિટિકલ અફેર્સ કમિટી (PAC)ની ઇમરજન્સી બેઠક યોજાઈ હતી, જેમાં સર્વસંમતિથી વિજયને સમર્થન આપવાનો નિર્ણય લેવાયો હતો.

બેઠક ઓનલાઈન યોજાઈ હતી, જેમાં દિલ્હીથી ઘણા વરિષ્ઠ નેતાઓ પણ સામેલ થયા હતા. કોંગ્રેસે કહ્યું છે કે તમિલનાડુનો જનાદેશ એક બિનસાંપ્રદાયિક સરકારની તરફેણમાં છે અને પાર્ટી કોઈપણ ભોગે BJP કે તેના સહયોગી પક્ષોને સત્તામાં આવવા દેવા માંગતી નથી.

આ પહેલા વિજયે સરકાર બનાવવા માટે કોંગ્રેસ પાસેથી સમર્થન માંગ્યું હતું. 234 સભ્યોની વિધાનસભામાં TVK એ 108 બેઠકો જીતી છે અને બહુમતી માટે તેને વધુ 10 ધારાસભ્યોની જરૂર છે. કોંગ્રેસ પાસે 5 બેઠકો છે, જ્યારે PMK ના 4 ધારાસભ્યો છે. CPI અને CPI(M) ને 2-2 બેઠકો મળી છે. DMK એ 59 અને AIADMK એ 47 બેઠકો જીતી છે.

આ તરફ, બંગાળના મુખ્યમંત્રી મમતા બેનર્જીએ મંગળવારે કોલકાતામાં પ્રેસ કોન્ફરન્સ દરમિયાન કહ્યું- હું CM પદ પરથી રાજીનામું નહીં આપું. અમે જનાદેશથી નહીં, ષડયંત્રથી હાર્યા છીએ. તેથી રાજીનામું આપવાનો પ્રશ્ન જ ઊભો થતો નથી.