અટલ સમાચાર ડોટ કોમ, ડેસ્ક 

દેશમાં કેટલીક અદ્ભુત ઘટનાઓ સામે આવતી હોય છે. છેલ્લા થોડા દિવસોમાં સોશિયલ મીડિયા પર એક વીડિયો વાઇરલ થઈ રહ્યો છે, જેમાં આકાશમાં એકસાથે સાત સૂર્ય દેખાય છે. આ વીડિયો ચીનનો હોવાનું કહેવાય છે. આ ચોંકાવનારો અને અદભુત વીડિયો જોઈને દરેક લોકો આશ્ચર્યચકિત થઈ ગયા છે. મળતી માહિતી મુજબ, આ વીડિયો 18 ઓગસ્ટનો છે, જેને ચેંગડુની હોસ્પિટલમાં એક મહિલાએ તેના કેમેકામાં કેદ કર્યો હતો. વીડિયો જોઈને ઘણા લોકોને લાગ્યું કે આ બ્રહ્માંડનો અનોખો નજારો છે. જ્યારે કેટલાક લોકોએ એને ચમત્કાર ગણાવ્યો હતો.

હકીકતમાં આ એક ઓપ્ટિકલ ઈલ્યુઝન અને વર્ચ્યુઅલ ઈમેજને કારણે થયું છે. વાંગ નામની મહિલાએ હોસ્પિટલની બારીની અંદરથી આ વીડિયો ઉતાર્યો હતો. વિન્ડો ગ્લાસના દરેક સ્તરે અલગ-અલગ સૂર્ય દેખાયો હતો અને પ્રકાશ વક્રીભવનને કારણે સાત સૂર્ય એકસાથે દેખાતા હતા.

આ વીડિયો વાઇરલ થતાંની સાથે જ સોશિયલ મીડિયા પર લોકોની ફની પ્રતિક્રિયાઓ પણ આવી રહી છે. એક યુઝરે લખ્યું, અમે આખરે ગ્લોબલ વોર્મિંગ વિશે સત્ય જાહેર કર્યું છે. જ્યારે એકે આ ઘટનાને ચુંબકીય ક્ષેત્રની ખામી ગણાવી હતી. જોકે એક યુઝરે ટ્વિટર પર લખ્યું છે કે એક એશિયન દેશમાં પ્રકાશના વક્રીભવનના પરિણામે એકસાથે 7 સૂર્ય જોવા મળ્યા હતા.

રેડિટ પરના એક યુઝરે એની સરખામણી હાઉ યીની ચીની દંતકથા સાથે કરી હતી. ચીનમાં એવું કહેવાય છે કે હાઉ યી એક તીરંદાજ હતા. તેમણે પૃથ્વીને સળગતા બચાવવા માટે પૃથ્વીના 10માંથી નવ સૂર્યને નષ્ટ કરી નાખ્યા હતા.