અટલ સમાચાર ડોટ કોમ, ડેસ્ક 

તિરુપતિ મંદિરના પ્રસાદના કારણે વિવાદ ચાલી રહ્યો છે. ફરી અકે નવી ઘટના સામે અઆવી છે. જેમાં લાડુમાંથી તમાકુ મળી આવી છે. જેના કારણે વધારે વિવાદ જોવા મળી રહ્યો છે.  આંધ્રપ્રદેશના શ્રી વેંકટેશ્વર સ્વામી મંદિર (તિરુપતિ મંદિર)ના લાડુમાં પ્રાણીઓની ચરબી ભેળવવામાં આવતી હોવાના આક્ષેપો વચ્ચે હવે એવો દાવો કરવામાં આવ્યો છે કે તમાકુ મળી આવ્યું છે. તેલંગાણાની એક મહિલાએ આરોપ લગાવ્યો છે કે તેને લાડુની અંદર કાગળમાં લપેટી તમાકુનો ભૂકો મળ્યો છે. તેણે તેનો વીડિયો જાહેર કર્યો છે.

આરોપ લગાવનાર ડોન્થુ પદ્માવતી ખમ્મમ જિલ્લાના ગોલ્લાગુડેમની રહેવાસી છે. 19 સપ્ટેમ્બરના રોજ તે તિરુમાલા મંદિર ગઈ હતી. તે ત્યાંથી લાડુ લાવી હતી. લાડુમાં કાગળ મળી આવતા વીડિયો ઈન્ડિયા ટુડે, એબીપી નાડુ સહિત કેટલાંક સોશિયલ મીડિયા એકાઉન્ટ પર શેર કર્યો છે. દિવ્ય ભાસ્કર આ વીડિયોની પુષ્ટિ કરતું નથી.

આ પહેલાં 18 સપ્ટેમ્બરે આંધ્રપ્રદેશના સીએમ ચંદ્રબાબુ નાયડુએ આરોપ લગાવ્યો હતો કે રાજ્યમાં YSR કોંગ્રેસ સરકાર દરમિયાન તિરુપતિ મંદિરના લાડુ (પ્રસાદમ)માં પશુ ચરબીનું વનસ્પતિ તેલ અને માછલીનું તેલ મિશ્રિત કરવામાં આવ્યું હતું. બીજા દિવસે, TDPએ લેબ રિપોર્ટ બતાવ્યો અને તેના આરોપોની પુષ્ટિ કરવાનો દાવો કર્યો.

મહિલાનો આરોપ છે કે તેણે પ્રસાદ વહેંચવા માટે લાડુને ભાંગ્યા પછી કાગળ મળ્યો જેમાં તમાકુ લપેટી હતી.

કેન્દ્રીય સ્વાસ્થ્ય મંત્રાલયે 4 કંપનીઓ પાસેથી ઘીનાં સેમ્પલ મંગાવ્યાં હતાં. આ પૈકીની એક કંપની એઆર ડેરી ફૂડ્સનું ઘી ક્વોલિટી ટેસ્ટમાં ફેલ થયું હતું. જેમાં સરકારે કારણ બતાવો નોટિસ જારી કરી છે. ભાજપના નેતા સુબ્રમણ્યમ સ્વામીએ સુપ્રીમ કોર્ટમાં અરજી દાખલ કરી છે. સ્વામીએ પ્રસાદમમાં પ્રાણીઓની ચરબીના ઉપયોગ અંગે કોર્ટની દેખરેખ હેઠળ તપાસની માગ કરી છે. રાજ્યસભાના સભ્ય અને દેવસ્થાનમ (TTD)ના ભૂતપૂર્વ અધ્યક્ષ વાય.વી. સુબ્બા રેડ્ડીએ આ મામલાની તપાસ માટે સુપ્રીમ કોર્ટના નિવૃત્ત ન્યાયાધીશની આગેવાની હેઠળની સમિતિની પણ માગ કરી છે. શ્રી લલિતા પીઠમ ખાતે વિશ્વ હિન્દુ પરિષદની બેઠક યોજાઈ હતી. VHPએ સુપ્રીમ કોર્ટને તિરુપતિ લાડુમાં ભેળસેળના આરોપો પર કાર્યવાહી કરવા અને ગુનેગારોને ઓળખવા માટે તપાસ શરૂ કરવાની અપીલ કરી છે. આંધ્રપ્રદેશના પૂર્વ મુખ્યમંત્રી વાયએસ જગન મોહન રેડ્ડી અને અન્યો સામે કેસ નોંધવામાં આવ્યો છે. હૈદરાબાદના સૈદાબાદ પોલીસ સ્ટેશનમાં વકીલે આ ફરિયાદ નોંધાવી છે. YSR કોંગ્રેસ પાર્ટીએ લાડુ વિવાદમાં ચરબીને લઈને આંધ્રપ્રદેશ હાઈકોર્ટમાં અરજી દાખલ કરી છે, સુનાવણી 25 સપ્ટેમ્બરે થશે.

તિરુપતિ મંદિરમાં મહાશાંતિ યજ્ઞ બાદ તમામ સ્થળોને પંચગવ્યથી શુદ્ધ કરવામાં આવ્યાં હતાં. યજ્ઞ પછી, આ તસવીર દેવસ્થાનમ બોર્ડે X પર શેર કરી હતી.

તિરુપતિ મંદિરના શુદ્ધિકરણ માટે મહાશાંતિ યજ્ઞ કરવામાં આવ્યો હતો. 23 સપ્ટેમ્બરના રોજ, તિરુમાલા તિરુપતિ દેવસ્થાનમ (TTD) બોર્ડના અધિકારીઓ સહિત 20 પૂજારીઓએ સવારે 6 થી 10 વાગ્યા સુધી ચાલતા પંચગવ્ય પરીક્ષા (શુદ્ધિકરણ)માં ભાગ લીધો હતો. ધાર્મિક વિધિમાં રસોડાને લાડુ અને અન્નપ્રસાદથી શુદ્ધ કરવામાં આવ્યું હતું.

મંદિરના મુખ્ય પૂજારીઓમાંથી એક કૃષ્ણ શેષાચલ દીક્ષિતુલુએ કહ્યું, 'સરકાર એક પ્રસ્તાવ લઈને આવી હતી કે મંદિરને શુદ્ધ કરવા માટે શું કરવું જોઈએ. તેથી અમે શાંતિ યજ્ઞ કરવાની દરખાસ્ત સાથે મેનેજમેન્ટ પાસે ગયા. સવારે 6 વાગ્યે અમે બધા ભગવાન વેંકટેશ્વરના આશીર્વાદ અને અનુમતિ લેવા માટે ગર્ભગૃહમાં ગયા. હવે બધું શુદ્ધ થઈ ગયું છે, હું બધા ભક્તોને વિનંતી કરું છું કે તેઓએ હવે ચિંતા કરવાની જરૂર નથી. ભગવાન બાલાજીનાં દર્શન કરો અને પ્રસાદ ઘરે લઈ જાઓ.'

આ વિવાદ કેવી રીતે સામે આવ્યો કર્ણાટક કોઓપરેટિવ મિલ્ક ફેડરેશન (KMF) છેલ્લાં 50 વર્ષથી ટ્રસ્ટને રાહતદરે ઘી સપ્લાય કરતું હતું. તિરુપતિ મંદિરમાં દર છ મહિને 1400 ટન ઘીનો ઉપયોગ થાય છે. જુલાઈ 2023માં, કંપનીએ ઓછા દરે સપ્લાય કરવાનો ઇનકાર કર્યો હતો, ત્યારબાદ જગન સરકાર (YSRCP)એ 5 કંપનીઓને સપ્લાયનું કામ આપ્યું હતું. આમાંની એક એઆર ડેરી ફૂડ્સ ડિંડીગુલ, તમિલનાડુ સ્થિત છે. આ વર્ષે જુલાઈમાં તેના ઉત્પાદનમાં ખામી જોવા મળી હતી.

TDP સરકારે જૂન 2024માં વરિષ્ઠ IAS અધિકારી જે શ્યામલા રાવને તિરુમાલા તિરુપતિ દેવસ્થાનમ (TTD)ના નવા કાર્યકારી અધિકારી તરીકે નિયુક્ત કર્યા હતા. તેમણે પ્રસાદમની ગુણવત્તા તપાસવાનો આદેશ આપ્યો. આ માટે એક સમિતિની રચના કરવામાં આવી હતી.

કમિટીએ પ્રસાદનો સ્વાદ અને ગુણવત્તા સુધારવા માટે ઘણાં સૂચનો આપ્યાં હતાં. તેમજ ઘીના નમૂના નેશનલ ડેરી ડેવલપમેન્ટ બોર્ડ (NDDB), ગુજરાતને પરીક્ષણ માટે મોકલવામાં આવ્યા છે. જુલાઈમાં સામે આવેલા રિપોર્ટમાં ફેટનો ઉલ્લેખ કરવામાં આવ્યો હતો.

આ પછી, TTDએ તામિલનાડુના ડીંડીગુલની એઆર ડેરી ફૂડ્સ દ્વારા મોકલવામાં આવેલ ઘીનો સ્ટોક પરત કર્યો અને કોન્ટ્રાક્ટરને બ્લેકલિસ્ટ કરી દીધો. આ પછી TTDએ કર્ણાટક મિલ્ક ફેડરેશન પાસેથી ઘી ખરીદવાનું શરૂ કર્યું.

જૂના સપ્લાયર પાસેથી 320 રૂપિયા પ્રતિ કિલોના ભાવે ઘી ખરીદવામાં આવતું હતું. હવે તિરુપતિ ટ્રસ્ટ કર્ણાટક કો-ઓપરેટિવ મિલ્ક ફેડરેશન (KMF) પાસેથી 475 રૂપિયા પ્રતિ કિલોના દરે ઘી ખરીદી રહ્યું છે.

ઘીની શુદ્ધતા પરીક્ષણ લેબ NDDB CALF (આણંદ, ગુજરાત) ઘીની શુદ્ધતા ચકાસવા માટે તિરુપતિને એક મશીન દાનમાં આપવા સંમત થઈ છે. તેની કિંમત 75 લાખ રૂપિયા છે.

જુલાઈમાં સામે આવેલા રિપોર્ટમાં લાડુમાં ચરબી હોવાની પુષ્ટિ થઈ હતી. જો કે ટીડીપીએ બે મહિના બાદ રિપોર્ટ સાર્વજનિક કર્યો હતો. સીએમ નાયડુએ 18 સપ્ટેમ્બરના રોજ આરોપ લગાવ્યો હતો કે પૂર્વ જગન સરકાર દરમિયાન તિરુપતિ મંદિરમાં લાડુ માટે વપરાતા ઘીમાં પ્રાણીઓની ચરબી અને માછલીનું તેલ ભેળવવામાં આવતું હતું. ટીડીપીએ પણ લેબ રિપોર્ટ બતાવીને પોતાના આરોપોની પુષ્ટિ કરવાનો દાવો કર્યો છે.

નાયડુએ કહ્યું, જ્યારે બજારમાં ઘી 500 રૂપિયા પ્રતિ કિલોના ભાવે મળતું હતું, ત્યારે જગન સરકારે 320 રૂપિયામાં કિલો ઘી ખરીદ્યું. આવી સ્થિતિમાં, સપ્લાયર દ્વારા ઘીમાં ભેળસેળ કરવામાં આવી હોવી જોઈએ. જગન સરકાર દ્વારા ઓછી કિંમતના ઘીની ખરીદી અંગે તપાસ થશે. પશુઓની ચરબી ધરાવતા ઘીમાંથી બનેલા લાડુથી તિરુપતિ મંદિરની પવિત્રતા દૂષિત થઈ છે.

તિરુપતિ મંદિરમાં, લગભગ 200 બ્રાહ્મણો 300 વર્ષ જૂના રસોડામાં શુદ્ધ દેશી ઘીથી લાડુ બનાવે છે. તિરુપતિ મંદિર વિશ્વના સૌથી લોકપ્રિય અને સૌથી ધનાઢ્ય ધાર્મિક સ્થળોમાંનું એક છે. દરરોજ લગભગ 70 હજાર ભક્તો અહીં ભગવાન વેંકટેશ્વર સ્વામીનાં દર્શન કરે છે. તેનો વહીવટ તિરુપતિ તિરુમાલા દેવસ્થાનમ્સ (TTD) દ્વારા નિયંત્રિત થાય છે.

મંદિર પરિસરમાં બનેલા 300 વર્ષ જૂના રસોડા 'પોટુ'માં શુદ્ધ દેશી ઘીનો ઉપયોગ કરીને દરરોજ 3.50 લાખ લાડુ બનાવવામાં આવે છે. આ મંદિરનો મુખ્ય પ્રસાદ છે, જે લગભગ 200 બ્રાહ્મણો દ્વારા બનાવવામાં આવે છે. લાડુમાં શુદ્ધ ચણાનો લોટ, ખાંડ, કાજુ અને શુદ્ધ ઘી હોય છે. જાન્યુઆરી 2024માં રામમંદિરના અભિષેક સમયે ટ્રસ્ટે લગભગ એક લાખ લાડુ અયોધ્યા મોકલ્યા હતા.