અપડેટ@તમિલનાડુ: હોસ્પિટલમાં અચાનક આગ લાગતા 7 લોકોનાં મોત નીપજ્યા

અટલ સમાચાર ડોટ કોમ, ડેસ્ક 

હાલમાં આગ લાગવાના બનાવો ખુબજ વધી ગયા છે. રોજ કોઈને કોઈ જગ્યાએથી આગ લાગવાના બનાવો સામે આવતા હોય છે. તમિલનાડુના ડિંડીગુલમાં એક ખાનગી હોસ્પિટલમાં આગ લાગતા 7 લોકોનાં મોત થયા છે. તમામ હોસ્પિટલની લિફ્ટમાં બેભાન હાલતમાં મળી આવ્યા હતા. આમાં એક સગીરનો પણ સમાવેશ થાય છે.

પોલીસના જણાવ્યા અનુસાર આ ઘટના રાત્રે 9 વાગ્યે બની હતી. ત્રિચી રોડ પર આવેલી ઓર્થોપેડિક કેર સિટી હોસ્પિટલના રિસેપ્શન એરિયામાં આગ લાગી હતી, જે સમગ્ર બિલ્ડિંગમાં ફેલાઈ ગઈ હતી. ઘટના સમયે હોસ્પિટલમાં 30થી વધુ દર્દીઓ હતા.

પોલીસના જણાવ્યા અનુસાર આગની ઘટનાની માહિતી મળતા જ બચાવ અભિયાન શરૂ કરવામાં આવ્યું હતું. દર્દીઓને 10 એમ્બ્યુલન્સમાં નજીકની હોસ્પિટલોમાં ખસેડવામાં આવ્યા હતા. પોલીસે જણાવ્યું કે લિફ્ટમાંથી મળી આવેલા તમામ લોકોને જિલ્લા હોસ્પિટલમાં લઈ જવામાં આવ્યા હતા. ત્યાં તબીબોએ તેમને મૃત જાહેર કર્યા હતા. અન્ય દર્દીઓ હોસ્પિટલમાં સારવાર હેઠળ છે.