અપડેટ@બાંગ્લાદેશ: આકાશ ‘જય શ્રી રામ’ના જયઘોષથી ગુંજી ઉઠ્યું, હિંદુઓ રસ્તા પર ઉતર્યા

અટલ સમાચાર ડોટ કોમ, ડેસ્ક 

બાંગ્લાદેશની રાજધાની ઢાકામાં ગઇકાલે સાંજના સમયે આકાશ ‘જય શ્રી રામ’ના જયઘોષથી ગુંજી ઉઠ્યું. તેનું કારણ ભગવાન રામની મૂર્તિને લઈને ઉભો થયેલો વિવાદ છે. ઇસ્લામિક કટ્ટરપંથીઓ રંગપુરમાં સ્થાપિત થનારી ભગવાન રામની મૂર્તિનો વિરોધ કરી રહ્યા છે. આ દરમિયાન ભગવાન રામના ચિત્રનું અપમાન કરવામાં આવ્યું, જેના પછી બાંગ્લાદેશના ઢાકામાં મોટા પાયે વિરોધ પ્રદર્શનો શરૂ થયા છે. લોકોએ ભગવાન રામના જયકારા લગાવીને વિરોધ પ્રદર્શન કર્યું.

ઓલ ઇન્ડિયાના રિપોર્ટમાં જણાવાયું છે કે પ્રદર્શનકારીઓએ નેશનલ મ્યુઝિયમ વિસ્તારથી નેશનલ પ્રેસ ક્લબ સુધી હાથમાં મશાલ લઈને કૂચ કરી. તેમણે ન્યાય અને લઘુમતીઓના અધિકારોના રક્ષણની માગ કરતા નારા લગાવ્યા છે.

રિપોર્ટમાં દાવો કરવામાં આવ્યો છે કે સભાને સંબોધિત કરતા સંગઠનના નેતાઓએ અપમાનની ઘટનાની તપાસની માગ કરી છે. પ્રદર્શનકારીઓ જવાબદાર લોકો સામે કાયદેસરની કાર્યવાહીની માગ કરી રહ્યા છે. તેમણે કહ્યું કે ધાર્મિક ભાવનાઓ પરના હુમલાઓથી સાંપ્રદાયિક સૌહાર્દ નબળું પડી શકે છે. તેમણે સરકારને લઘુમતી સમુદાયોની સુરક્ષા અને સલામતી સુનિશ્ચિત કરવા અપીલ કરી છે.

રંગપુરના ઉત્તરી ગાયબંધા જિલ્લાના પલાશવાડીમાં ભગવાન રામની 81 ફૂટ ઊંચી મૂર્તિ સ્થાપિત થવા જઈ રહી હતી. આ દરમિયાન તે નિર્માણ કાર્ય રોકી દેવામાં આવ્યું. તેને રોકવાનો આરોપ ઇસ્લામિક કટ્ટરપંથીઓ પર લાગ્યો. રિપોર્ટમાં શ્રી શ્રી રાધા ગોવિંદ મંદિર સમિતિએ દાવો કર્યો કે અધિકારીઓને ઇસ્લામિક જૂથો તરફથી ધમકીઓ મળી હતી. આ ઘટનાએ મુસ્લિમ બહુમતી ધરાવતા બાંગ્લાદેશમાં લઘુમતી વસ્તીના અધિકારોને લઈને ચિંતા ઊભી કરી છે.

ધમકીઓના મામલે પોલીસે કેસ નોંધ્યો હતો, પરંતુ હજુ સુધી કોઈ ધરપકડ થઈ નથી. તેના વિરોધમાં શુક્રવારે ઘણા હિંદુ સંગઠનો અને વિદ્યાર્થી નેતાઓ શાહબાગ ચોક પર એકઠા થયા. આ વિરોધ પ્રદર્શનમાં એકઠા થવા માટે હિંદુ મહાજોતે અપીલ કરી હતી. આ સંગઠને નેશનલ પ્રેસ ક્લબ સામે એક હ્યુમન ચેઇન પણ બનાવી. એક અન્ય જૂથે ઢાકા રિપોર્ટર્સ યુનિટી ઇમારત પાસે વિરોધ પ્રદર્શન કર્યું.

અન્ય એક જૂથે ઢાકા રિપોર્ટર્સ યુનિટી  પાસે પોતાનો વિરોધ નોંધાવ્યો. તે જ સમયે, રંગપુરમાં પોલીસ દ્વારા પ્રદર્શનકારીઓને રોકવામાં આવ્યા બાદ હળવી અથડામણના પણ સમાચાર છે.

તારિક રહેમાનના નેતૃત્વ હેઠળની બીએનપી સરકાર પર નિષ્ક્રિયતાનો આરોપ લગાવતા, પ્રદર્શનકારીઓએ દોષિતોની ધરપકડ માટે 72 કલાકનું અલ્ટીમેટમ આપ્યું છે. હિંદુ સમુદાયે ચેતવણી આપી છે કે જો માંગણીઓ પૂરી નહીં થાય તો આગળ વધુ રેલીઓ કરવામાં આવશે. શનિવારે ધાર્મિક બાબતોના મંત્રાલયને એક મેમોરેન્ડમ પણ સુપરત કરવામાં આવશે.

હિંદુ મહાજોટે સ્પષ્ટ ચેતવણી આપી છે કે જો રામ મૂર્તિનું નિર્માણ ફરીથી શરૂ કરવા દેવામાં નહીં આવે, તો તેઓ બાંગ્લાદેશના તમામ 64 જિલ્લાઓમાં એક પછી એક રામ મંદિરનું નિર્માણ કરશે. આ ઉપરાંત, રાષ્ટ્રીય પૂજા ઉત્સવ સમિતિએ શનિવારે દેશવ્યાપી આંદોલનની જાહેરાત કરી છે.