અટલ સમાચાર ડોટ કોમ, ડેસ્ક 

દેશમાં હુમલાની ઘટનાઓ ખુબજ વધી ગઈ છે.  જમ્મુ-કાશ્મીરના ઉધમપુરમાં આતંકવાદીઓના ગોળીબારમાં CRPF ઈન્સ્પેક્ટરનું મોત થયું હતું. CRPF અને જમ્મુ-કાશ્મીર પોલીસની સંયુક્ત ઓપરેશન ટીમ રામનગરના ચેલ વિસ્તારમાં નિયમિત પેટ્રોલિંગ પર હતી ત્યારે આતંકવાદીઓએ ગોળીબાર કર્યો. CRPF ઈન્સ્પેક્ટરની ઓળખ કુલદીપ કુમાર તરીકે થઈ છે. એન્કાઉન્ટર ચાલુ છે.

આ આતંકવાદી ઘટના ગઈકાલે એટલે કે 20 ઓગસ્ટથી ચૂંટણી પ્રક્રિયા શરૂ થવાના એક દિવસ પહેલા જમ્મુ-કાશ્મીરમાં બની હતી. રાજ્યની 90 વિધાનસભા બેઠકો પર ત્રણ તબક્કામાં 18 સપ્ટેમ્બર, 25 સપ્ટેમ્બર અને 1 ઓક્ટોબરે મતદાન થશે. 20મી ઓગસ્ટે નોટિફિકેશન બહાર પાડવામાં આવશે.

આ પહેલા 14 ઓગસ્ટના રોજ ડોડામાં સુરક્ષાદળો અને આતંકીઓ વચ્ચેની અથડામણમાં સેનાની 48 રાષ્ટ્રીય રાઈફલ્સના કેપ્ટન દીપક સિંહ શહીદ થયા હતા. ડોડામાં અસાર ફોરેસ્ટ વિસ્તારમાં ચાલી રહેલા એન્કાઉન્ટરમાં તે ટીમનું નેતૃત્વ કરી રહ્યો હતો. 16 જુલાઈના રોજ પણ ડોડામાં એન્કાઉન્ટર દરમિયાન કેપ્ટન સહિત 5 જવાનો શહીદ થયા હતા.

આજનો હુમલો જમ્મુ ક્ષેત્રમાં થયો છે, જે ઘણા વર્ષોથી કાશ્મીરની સરખામણીમાં શાંતિપૂર્ણ છે. જમ્મુમાં ખાસ કરીને પીર પંજાલ રેન્જના દક્ષિણી વિસ્તારોમાં આતંકવાદી ગતિવિધિઓમાં વધારો થયો છે. અહીંના ગાઢ જંગલો અને ઢોળાવવાળી ટેકરીઓ આતંકવાદીઓ માટે સલામત રક્ષક બની ગયા છે. ગૃહ મંત્રાલયના જણાવ્યા અનુસાર 21 જુલાઈ સુધી 11 આતંકવાદી ઘટનાઓ અને 24 ઓપરેશનમાં 28 લોકો માર્યા ગયા છે.

જમ્મુ-કાશ્મીરમાં વધી રહેલી આતંકવાદી ઘટનાઓને લઈને સંરક્ષણ મંત્રીએ 14 ઓગસ્ટે દિલ્હીમાં બેઠક કરી હતી. NSA અજીત ડોભાલ, આર્મી ચીફ જનરલ ઉપેન્દ્ર દ્વિવેદી અને સુરક્ષા એજન્સીઓના વડાઓએ તેમાં ભાગ લીધો હતો. ત્યાર બાદ આ પ્રથમ મોટી ઘટના છે.