અપડેટ@દિલ્હીઃ વડાપ્રધાન મોદીએ નવી ભાજપ કારોબારી સાથે બેઠક કરી

અટલ સમાચાર ડોટ કોમ, ડેસ્ક 

વડાપ્રધાન મોદી ગઈકાલે દિલ્હીમાં ભાજપના મુખ્યાલયે પહોંચ્યા. તેમણે પાર્ટીની નવી રાષ્ટ્રીય ટીમ સાથે મુલાકાત કરી.

મુલાકાતની જાણકારી આપતા PMએ X પર લખ્યું- પાર્ટીના સાથીઓ સાથેની બેઠક સારી રહી. આવી બેઠકો પાર્ટીને મજબૂત કરવા અને જનતા સાથે જોડાણ પર ઊંડા વિચાર-વિમર્શનું મંચ બની રહે છે.

આ પહેલા શનિવારે સવારે નવા પદાધિકારીઓની ભાજપ અધ્યક્ષ નિતિન નબીન સાથે પણ બેઠક થઈ હતી.

ઉલ્લેખનીય છે કે નવી ટીમની જાહેરાત 17 ઓગસ્ટે થઈ હતી. 65 સભ્યોની ટીમમાં રામ માધવને ઉપાધ્યક્ષ અને સ્મૃતિ ઈરાનીને મહાસચિવ બનાવીને પાછા લાવવામાં આવ્યા છે.

કેન્દ્ર સરકારે યુનિવર્સિટી આઉટરીચ પ્રોગ્રામ દ્વારા કોલેજ અને યુનિવર્સિટીના વિદ્યાર્થીઓ સાથે સીધા જોડાવાની તૈયારી કરી છે. ન્યૂઝ એજન્સી PTIએ સૂત્રોને ટાંકીને જણાવ્યું હતું કે 19 ઓગસ્ટની કેબિનેટ બેઠકમાં આ નિર્ણય લેવાયો હતો કે કેન્દ્રીય મંત્રીઓ અલગ-અલગ યુનિવર્સિટીઓમાં જઈને વિદ્યાર્થીઓ સાથે વાતચીત કરશે અને તેમના પ્રશ્નો, વિચારો અને સમસ્યાઓ સાંભળશે.

બેઠકમાં મંત્રીઓની સોશિયલ મીડિયા પોસ્ટની પહોંચ પર પણ ચર્ચા થઈ. તેમાં ખાસ કરીને યુવા લોકો સુધી સંદેશ પહોંચાડવા માટે વધુ મહેનત કરવાની વાત કહેવામાં આવી.

65માંથી માત્ર 14 જૂના ચહેરા

નવી ટીમમાં 14 જૂના ચહેરાઓને ફરીથી સ્થાન મળ્યું છે, જ્યારે 51 નવા ચહેરાઓનો સમાવેશ કરવામાં આવ્યો છે. એટલે કે 65 સભ્યોની ટીમમાં લગભગ 78.5% નવા ચહેરા છે. આના પરથી સ્પષ્ટ થાય છે કે સંગઠનમાં મોટા પાયે ફેરફાર કરવામાં આવ્યો છે, જોકે કેટલાક અનુભવી નેતાઓને પણ જાળવી રાખવામાં આવ્યા છે.