અપડેટ@દેશ: ટેલિગ્રામ પર NEETનું નકલી પેપર વેંચનારો ઝડપાયો, જાણો સમગ્ર મામલો
અટલ સમાચાર ડોટ કોમ, ડેસ્ક
ટેલિગ્રામ પર પ્રતિબંધ હોવા છતાં રાજસ્થાનના ભીલવાડામાંથી NEETનું નકલી પેપર વેચવાનો પ્રયાસ કરવામાં આવ્યો છે. આ મામલે પોલીસે એક વિદ્યાર્થીની અટકાયત કરી છે. આરોપી અમેરિકાના વર્ચ્યુઅલ પ્રાઇવેટ નેટવર્ક દ્વારા ટેલિગ્રામનો ઉપયોગ કરી રહ્યો હતો. તેની ટેલિગ્રામ ચેનલનું નામ પેપર માફિયા છે.
બીજી તરફ, NEET રી-એક્ઝામ સુધી ટેલિગ્રામ પર પ્રતિબંધ ચાલુ રહેશે. દિલ્હી હાઈકોર્ટે કેન્દ્ર સરકારના નિર્ણય સામે ટેલિગ્રામ દ્વારા દાખલ કરાયેલી અરજી ફગાવી દીધી છે. કેન્દ્ર સરકારે 16 જૂને ટેલિગ્રામ પર 22 જૂન સુધી પ્રતિબંધ મૂકવાનો આદેશ આપ્યો હતો.
આ ઉપરાંત, NEET રી-એક્ઝામને ધ્યાનમાં રાખીને વેસ્ટર્ન રેલવેએ પરીક્ષા કેન્દ્રો પર જતા વિદ્યાર્થીઓ માટે ત્રણ વિશેષ ટ્રેનો ચલાવવાની જાહેરાત કરી છે. આ વિશેષ ટ્રેનો ગુજરાત અને મહારાષ્ટ્રના મુખ્ય રૂટ પર દોડશે, જેમાં સ્લીપર અને જનરલ કોચ હશે.
NEET પરીક્ષાને સુરક્ષિત બનાવવા માટે શનિવારે સવારે 9 વાગ્યાથી રાત સુધી મોક ડ્રિલ ચલાવવામાં આવશે. NTA એ તમામ પરીક્ષા કેન્દ્રોને પહેલાથી જ પોતાના કબજામાં લઈ લીધા છે. આ મોક ડ્રિલમાં દેશભરના લગભગ 2.5 લાખ સુરક્ષાકર્મીઓ સામેલ થશે.
હાઈકોર્ટે સ્પષ્ટ કર્યું કે સરકાર પાસે આવી મોટી રાષ્ટ્રીય પરીક્ષાની સુરક્ષા સુનિશ્ચિત કરવા માટે ઈમરજન્સી પગલાં લેવા અને કામચલાઉ પ્રતિબંધો લાદવાનો સંપૂર્ણ કાનૂની અધિકાર છે. ટેલિગ્રામ હવે 22 જૂન સુધી સમગ્ર ભારતમાં બંધ રહેશે.
જસ્ટિસ તેજસ કારિયાની અધ્યક્ષતામાં દિલ્હી હાઈકોર્ટની સિંગલ જજની બેન્ચે આજે સવારે સવારે 10:30 વાગ્યે પોતાનો ચુકાદો આપ્યો. કોર્ટે ટેલિગ્રામની અરજી ફગાવી દીધી હતી. કોર્ટે ઇન્ફોર્મેશન ટેકનોલોજી (IT) એક્ટની કલમ 69A હેઠળ કેન્દ્ર સરકાર દ્વારા લાદવામાં આવેલા કામચલાઉ પ્રતિબંધને માન્ય રાખ્યો છે. આ ચુકાદા બાદ, ટેલિગ્રામ પર સંપૂર્ણ પ્રતિબંધ 22 જૂન સુધી અમલમાં રહેશે, અને 30 જૂન સુધી મેસેજ-એડિટિંગ ફીચર પર રોક રહેશે.
કોર્ટે પોતાના ચુકાદામાં સ્વીકાર્યું કે 21 જૂને ફરીથી યોજાનારી NEET-UG 2026ની પરીક્ષા 22 લાખથી વધુ વિદ્યાર્થીઓના ભવિષ્ય સાથે જોડાયેલી છે. કોર્ટે સરકારની દલીલ સ્વીકારી કે ટેલિગ્રામનું ટેકનિકલ માળખું એવું છે કે તેનો સંગઠિત છેતરપિંડી માફિયાઓ દ્વારા નિર્લજ્જ રીતે દુરુપયોગ કરવામાં આવી રહ્યો હતો. આવી સ્થિતિમાં, પરીક્ષાની નિષ્પક્ષતા જાળવવા માટે સરકારે લીધેલું આ પગલું યોગ્ય અને જાહેર હિતમાં છે.
