અપડેટ@વર્લ્ડ: સાઉદીના રિયાદ એરપોર્ટ પર વિનાશક મિસાઇલ હુમલો 12 લોકોના મોત

અટલ સમાચાર ડોટ કોમ, ડેસ્ક 

સાઉદી અરેબિયાની રાજધાની રિયાદના કિંગ ખાલિદ ઇન્ટરનેશનલ એરપોર્ટ પર શનિવારે ફરી હુમલો થયો. વિસ્ફોટમાં 12 લોકોનાં મોત થયાં છે, જ્યારે 300થી વધુ લોકો ઘાયલ થયા છે.કેટલાક ઘાયલોની સ્થિતિ ગંભીર છે. મૃતકોમાં 4 સાઉદી, 2 બાંગ્લાદેશી અને અમેરિકા, પેલેસ્ટાઇન, ઇજિપ્ત, જોર્ડન, સીરિયા તથા સુદાનના એક-એક નાગરિકનો સમાવેશ થાય છે.

હુમલા બાદ એરપોર્ટ ખાલી કરાવવામાં આવ્યું અને ઉડાનો રોકી દેવામાં આવી. છેલ્લા 24 કલાકમાં એરપોર્ટની ઓછામાં ઓછી 225 ઉડાનો રદ કરવામાં આવી છે. રિયાદ એરપોર્ટ પર છેલ્લા 20 દિવસમાં આ ચોથો હુમલો છે.

હજુ સુધી કોઈએ હુમલાની જવાબદારી સ્વીકારી નથી. જોકે હુમલા પાછળ હૂતી બળવાખોરોનો હાથ હોવાની આશંકા છે. હૂતી બળવાખોરોએ હજુ આ હુમલાની જવાબદારી સ્વીકારી નથી. તેમણે આ અઠવાડિયે આંતરરાષ્ટ્રીય એરલાઇન્સને ચેતવણી આપી હતી કે સાઉદી અરેબિયાની હવાઈસીમામાં ઉડાનો ચલાવવાનાં ગંભીર પરિણામો આવી શકે છે.

એક અધિકારીના જણાવ્યા અનુસાર, શનિવારે એક મિસાઇલ પેસેન્જર ટર્મિનલ સાથે અથડાઈ, જેના કારણે અનેક લોકો ઘાયલ થયા. ઘટના બાદ એમ્બ્યુલન્સ ઝડપથી એરપોર્ટ તરફ જતી જોવા મળી હતી.

યમનમાં હૂતી બળવાખોરો અને સાઉદી અરેબિયાના સમર્થનવાળી સરકારી સેના વચ્ચેની લડાઈ તેજ બની છે. સાઉદી અરેબિયા પોતાના લડાકુ વિમાનો દ્વારા હૂતીઓના ઠેકાણાઓ પર હવાઈ હુમલા કરી રહ્યું છે, જ્યારે યમનની સરકારી સેના જમીન પર આગળ વધી રહી છે.

તેનો હેતુ રેડ સી નજીક હૂતીઓના કબજાવાળા વિસ્તારોને પરત મેળવવાનો અને બાબ-અલ-મંદેબ સ્ટ્રેટ પર તેમનો પ્રભાવ ઘટાડવાનો છે. આ દરિયાઈ માર્ગ વિશ્વના વેપાર અને તેલના પુરવઠા માટે અત્યંત મહત્વપૂર્ણ છે.

તાજેતરની સૈન્ય કાર્યવાહી અંગે જવાબ આપતાં હૂતીઓએ પણ સાઉદી અરેબિયાના એરપોર્ટ, તેલનાં ઠેકાણાં અને સૈન્ય મથકોને નિશાન બનાવ્યાનો દાવો કર્યો છે. આથી બંને પક્ષો વચ્ચે તણાવ વધુ વધી ગયો છે.

સાઉદી અરેબિયાએ પોતાના એરપોર્ટ, સૈન્ય મથકો અને તેલ સાથે જોડાયેલા સ્થળો પર થયેલા હુમલાઓ વચ્ચે અમેરિકા તથા અન્ય સહયોગી દેશો પાસેથી મદદ માંગી છે. અધિકારીઓના જણાવ્યા અનુસાર, અમેરિકાની મદદમાં ગુપ્તચર માહિતીની આપ-લે, હુમલા માટેના ઠેકાણાંની ઓળખ અને સૈન્ય યોજના બનાવવામાં સહયોગનો સમાવેશ થાય છે.

શુક્રવારે અમેરિકાના રાષ્ટ્રપતિ ટ્રમ્પને રિયાદ એરપોર્ટ પર થયેલા હુમલાઓ વિશે પૂછવામાં આવ્યું. તેમણે કહ્યું, આ સારું નથી અને હું ખુશ નથી. જોકે, આ હુમલાઓના જવાબમાં અમેરિકા તરફથી સૈન્ય મદદ આપવાનો કોઈ સંકેત મળ્યો નથી. અમેરિકાએ હાલ આ સંઘર્ષથી અંતર જાળવી રાખ્યું છે.

સાઉદી અરેબિયા પર વધી રહેલા હુમલાઓ વચ્ચે અનેક આંતરરાષ્ટ્રીય એરલાઇન્સે રિયાદ અને અન્ય સાઉદી એરપોર્ટ માટેની ઉડાનો બંધ કરી દીધી છે.

આમાં એર ઇન્ડિયા, ફ્લાયદુબઈ, લુફ્થાન્સા ગ્રુપ અને પાકિસ્તાન ઇન્ટરનેશનલ એરલાઇન્સનો સમાવેશ થાય છે. યુરોપિયન યુનિયનની વિમાનન સુરક્ષા એજન્સીએ પણ સાઉદી હવાઈ ક્ષેત્ર અંગેની પોતાની ચેતવણી વધારી છે.

એજન્સી મુજબ, હૂતી બળવાખોરો હવે સાઉદી અરેબિયાની અંદર સુધી હુમલા કરવામાં સક્ષમ છે અને તેમનું ધ્યાન એરપોર્ટ જેવા વિમાનન મથકો પર પણ વધ્યું છે.