અપડેટ@વર્લ્ડ: ઈરાન-ઈઝરાયલ યુદ્ધઃ કુવૈતમાં અમેરિકાનું ફાઈટર જેટ અચાનક ક્રેશ, જાણો વધુ વિગતે

અટલ સમાચાર ડોટ કોમ, ડેસ્ક 

ઇઝરાયલ-અમેરિકા અને ઇરાન યુદ્ધનો આજે ત્રીજો દિવસ છે. આ દરમિયાન કુવૈતમાં અમેરિકાનું એક ફાઇટર જેટ ક્રેશ થઈ ગયું છે. જ્યારે, દુબઈમાં ફરીથી વિસ્ફોટોના સમાચાર સામે આવ્યા છે.

મીડિયા રિપોર્ટ અનુસાર, એર ડિફેન્સ સિસ્ટમે કેટલાક શંકાસ્પદ ડ્રોન અને મિસાઈલોને હવામાં જ તોડી પાડ્યા. અહીં સુરક્ષા એજન્સીઓ એલર્ટ પર છે. આના લગભગ 16 કલાક પહેલા દુબઈના પોર્ટ અને બુર્જ ખલીફા પાસે હુમલો થયો હતો.

આ યુદ્ધમાં લેબનોનનું ઉગ્રવાદી સંગઠન હિઝબુલ્લાહ પણ સામેલ થઈ ગયું છે. તેણે ઇઝરાયલમાં ઘણી જગ્યાએ બોમ્બમારો કર્યો છે. બીજી તરફ ઇઝરાયલે સરહદને અડીને આવેલા લેબનોન, દહિયાહ અને રાજધાની બેરૂતના 50 ગામો ખાલી કરાવ્યા છે.

દહિયાહને હિઝબુલ્લાહનો ગઢ માનવામાં આવે છે. 2024માં આ વિસ્તાર પર ઘણી વખત હુમલો થયો હતો અને તે પછી પણ ઘણી વખત હુમલા થયા. તે વર્ષે નવેમ્બરમાં યુદ્ધવિરામ થયું હતું.

ઇઝરાયલ પર આરોપ છે કે તેણે કરારનું પાલન કર્યું નથી અને હુમલા ચાલુ રાખ્યા. ઇઝરાયલનું કહેવું છે કે હિઝબુલ્લાહ ફરીથી હથિયારો એકઠા કરી રહ્યું છે અને લેબનોની સરકાર તેને રોકવા માટે પગલાં લઈ રહી નથી.

ઇઝરાયલ અને અમેરિકાએ ઇરાનની રાજધાની તેહરાન સહિત 10 મોટા શહેરોને નિશાન બનાવ્યા છે. જેમાં અત્યાર સુધીમાં 200 થી વધુ લોકોના મોત થયા છે, જ્યારે 740 થી વધુ લોકો ઘાયલ થયા છે. એક શાળા પર મિસાઈલ પડવાથી 180 વિદ્યાર્થીનીઓના મોત થયા છે અને 45 ઘાયલ છે.