હવામાન@દેશ: ચંદીગઢ, રાજસ્થાન, મધ્ય પ્રદેશ અને હિમાચલના ઘણા જિલ્લાઓમાં ગાઢ ધુમ્મસ

અટલ સમાચાર ડોટ કોમ, ડેસ્ક 

દેશના ઉત્તરીય વિસ્તારોમાં ફરી એકવાર ઠંડીના રાઉન્ડ શરૂ થઈ ગયો છે. કેટલાક વિસ્તારોમાં કડકડતી ઠંડી પડી રહી છે. સવારે રાજધાની દિલ્હી, ઉત્તર પ્રદેશ, હરિયાણા, પંજાબ, ચંદીગઢ, રાજસ્થાન, મધ્ય પ્રદેશ અને હિમાચલના ઘણા જિલ્લાઓમાં ગાઢ ધુમ્મસ છવાયેલું રહ્યું.

ઉત્તર પ્રદેશના 4 જિલ્લાઓ, મધ્ય પ્રદેશના 5 જિલ્લાઓ, પંજાબના 4 જિલ્લાઓ, હરિયાણાના 3 જિલ્લાઓ સહિત રાજસ્થાન, બિહાર, દિલ્હીમાં શનિવારે સવારનું તાપમાન 4 થી 8 ડિગ્રીની વચ્ચે રહ્યું.

જમ્મુ-કાશ્મીર અને ઉત્તરાખંડના ઊંચાઈવાળા પહાડી વિસ્તારોમાં આજે પણ હિમવર્ષા થઈ. ઉત્તરાખંડના પિથોરાગઢમાં ભારત-નેપાળ-ચીન બોર્ડર પાસે તાપમાન માઈનસ 35° ચાલી રહ્યું છે. અહીં એટલી ઠંડી છે કે થોડીવાર બહાર રહેવાથી આંખના આંસુ પણ થીજી જાય છે.

કાલાપાની વિસ્તારમાં સશસ્ત્ર સીમા બળના જવાનો સ્પેશિયલ ચશ્મા પહેરીને ચીન બોર્ડર પર પેટ્રોલિંગ કરી રહ્યા છે. અહીં નદીઓ, નાળાઓ અને ઝરણાં થીજી ગયા છે. 23 જાન્યુઆરી પછી થયેલી ભારે હિમવર્ષાને કારણે નળ અને ઝરણાનું પાણી થીજી ગયું છે. જવાનોને પીવા અને રસોઈ બનાવવા માટે બરફને ઓગાળવો પડી રહ્યો છે.

જમ્મુ-કાશ્મીરમાં તીવ્ર શિયાળાનો 40 દિવસનો તબક્કો, જેને ચિલ્લઈ કલાં કહેવાય છે, તે 30 જાન્યુઆરીએ સમાપ્ત થયો. આ સાથે જ જમ્મુ-કાશ્મીરના ઘણા વિસ્તારોમાં રાત્રિના લઘુત્તમ તાપમાનમાં વધારો થયો છે. શુક્રવારે શ્રીનગરનું તાપમાન 0°C થી વધીને 1.30°C થયું. ગુરુવારે રાત્રે તે -0.6°C હતું.

રાજસ્થાનના ભીલવાડામાં નેશનલ હાઈવે-58 પર ગાઢ ધુમ્મસના કારણે 5 વાહનો અથડાયા. આ અકસ્માતમાં 3 લોકોના મોત થયા. આ તરફ, ઉત્તર પ્રદેશમાં વરસાદ અને કરા પડ્યા બાદ ઠંડી વધી છે. આજે 30 થી વધુ જિલ્લાઓમાં ધુમ્મસ અને ઠંડીનું એલર્ટ છે. શુક્રવારે આગ્રામાં ગાઢ ધુમ્મસના કારણે થયેલા માર્ગ અકસ્માતમાં એક બાઇક સવારનું મોત થયું.