અટલ સમાચાર ડોટ કોમ, ડેસ્ક 

રાજકારણમાં અવાર-નવાર વિરોધ પ્રદર્શન જોવા મળતી હોય છે. કાર્યકરતા વચ્ચે કેટલીક વાર ઘર્ષણ જોવા મળતું હોય છે. પશ્ચિમ બંગાળના મુખ્યમંત્રી મમતા બેનર્જીએ નીતિ આયોગની બેઠક અધવચ્ચે છોડીને બહાર નીકળી ગયા હતા. બહાર આવીને તેમણે આરોપ લગાવ્યો કે તેમને બેઠકમાં બોલવા દેવામાં આવ્યા નથી. તેમનું માઈક બંધ કરી દેવામાં આવ્યું હતું.

મમતાએ કહ્યું- મેં પૂછ્યું કે મને બોલવાથી કેમ અટકાવવામાં આવી. તેઓ શા માટે ભેદભાવ કરી રહ્યા છે? વિપક્ષમાંથી હું એકલી જ છું. આ માત્ર બંગાળનું જ નહીં, પરંતુ તમામ પ્રાદેશિક પક્ષોનું પણ અપમાન છે. વડાપ્રધાન નરેન્દ્ર મોદીની અધ્યક્ષતા આજે નીતિ આયોગની 9મી ગવર્નિંગ કાઉન્સિલની બેઠકની મળી છે. આ બેઠકમાં ભારતને 2047 સુધીમાં વિકસિત રાષ્ટ્ર બનાવવા પર ધ્યાન કેન્દ્રિત કરવામાં આવશે. આ સિવાય વિવિધ રાજ્યોના મુખ્યમંત્રીઓ તેમના રાજ્યો વિશે વાત કરી હતી.

7 રાજ્યોના મુખ્યમંત્રીઓએ આ બેઠકમાં આવવાની ના પાડી દીધી છે. જેમાં તમિલનાડુ, તેલંગાણા, કર્ણાટક, હિમાચલ પ્રદેશ, પંજાબ, કેરળ અને ઝારખંડનો સમાવેશ થાય છે. જો કે આ બેઠકમાં પશ્ચિમ બંગાળના મુખ્યમંત્રી મમતા બેનર્જી હાજરી આપી હતી. તેમણે કહ્યું કે તે 2024-25ના બજેટમાં રાજ્યો સામેના ભેદભાવનો મુદ્દો ઉઠાવ્યો હતો.

મમતા બેનર્જીએ બેઠક પહેલા કહ્યું હતું કે નીતિ આયોગને ખતમ કરવામાં આવે અને આયોજન પંચને પાછું લાવવું જોઈએ. આયોજન પંચનો વિચાર નેતાજી બોઝનો હતો. તેમણે વધુમાં કહ્યું કે આ સરકાર આંતરકલહમાં પડી જશે, રાહ જુઓ. મારી પાસે હાલ વધુ સમય નથી, તેથી જ હું કોઈ નેતાને મળી રહી નથી. હું અરવિંદ કેજરીવાલની પત્નીને મળવા માંગતી હતી, હું તેમની સાથે વાત કરીશ.

નીતિ આયોગની ગવર્નિંગ કાઉન્સિલની બેઠકમાં વિકસિત ભારત @ 2047 પર ચર્ચા કરવામાં આવશે. ભારતને વિકસિત બનાવવામાં રાજ્યોની ભૂમિકા અંગે પણ ચર્ચા કરવામાં આવશે. નીતિ આયોગ કહે છે કે દેશ 5 ટ્રિલિયન ડોલરની જીડીપી સાથે વિશ્વની ત્રીજી અર્થવ્યવસ્થા બનવાના માર્ગે છે. ભારત 2047 સુધીમાં 30 ટ્રિલિયન ડોલરની અર્થવ્યવસ્થાનું લક્ષ્ય હાંસલ કરશે.

કેન્દ્ર સરકારે 16 જુલાઈના રોજ નીતિ આયોગની નવી ટીમની જાહેરાત કરી હતી. ચાર પૂર્ણ-સમયના સભ્યો ઉપરાંત, ભાજપ અને એનડીએના સાથી પક્ષોના 15 કેન્દ્રીય પ્રધાનોને પદાધિકારી સભ્યો અથવા વિશેષ આમંત્રિત તરીકે સામેલ કરવામાં આવ્યા છે.

રાષ્ટ્રપતિ ભવન દ્વારા આ સંબંધિત એક નોટિફિકેશન બહાર પાડવામાં આવ્યું છે. વડાપ્રધાન નરેન્દ્ર મોદી કમિશનના અધ્યક્ષ અને અર્થશાસ્ત્રી સુમન કે બેરી ઉપાધ્યક્ષ તરીકે યથાવત રહેશે. આ ઉપરાંત વૈજ્ઞાનિક વીકે સારસ્વત, કૃષિ અર્થશાસ્ત્રી રમેશ ચંદ, બાળરોગ નિષ્ણાત વીકે પોલ અને મેક્રો-ઈકોનોમિસ્ટ અરવિંદ વિરમાણી પૂર્ણ સમયના સભ્યો રહેશે.

કેન્દ્રીય રક્ષા મંત્રી રાજનાથ સિંહ, ગૃહ મંત્રી અમિત શાહ, કૃષિ મંત્રી શિવરાજ સિંહ ચૌહાણ અને નાણા મંત્રી નિર્મલા સીતારમણ ચાર હોદ્દેદારો હશે. માર્ગ પરિવહન પ્રધાન નીતિન ગડકરી, આરોગ્ય પ્રધાન જેપી નડ્ડા, ભારે ઉદ્યોગ પ્રધાન એચડી કુમારસ્વામી અને MSME પ્રધાન જીતન રામ માંઝીને નીતિ આયોગમાં વિશેષ આમંત્રિત કરવામાં આવ્યા છે.

આ ઉપરાંત ખાસ આમંત્રિતોમાં પંચાયતી રાજય મંત્રી લલ્લન સિંહ, સામાજિક ન્યાય મંત્રી વીરેન્દ્ર કુમાર, નાગરિક ઉડ્ડયન મંત્રી કે રામમોહન નાયડુ, આદિજાતિ બાબતોના મંત્રી જુએલ ઓરામ, મહિલા અને બાળ કલ્યાણ મંત્રી અન્નપૂર્ણા દેવી, ખાદ્ય પ્રક્રિયા મંત્રી ચિરાગ પાસવાન અને રાજ્ય મંત્રીનો સમાવેશ થાય છે. સ્વતંત્ર પ્રભારી સાથે રાવ ઈન્દ્રજીત સિંહનો સમાવેશ થાય છે.

ગયા વર્ષે આયોગમાં સામેલ કરાયેલા કેન્દ્રીય મંત્રી પીયૂષ ગોયલ અને અનુરાગ ઠાકુરને આ વર્ષે આયોગના સભ્ય બનાવવામાં આવ્યા નથી.

નેશનલ ઇન્સ્ટિટ્યુશન ફોર ટ્રાન્સફોર્મિંગ ઇન્ડિયાને નીતિ આયોગ તરીકે ઓળખવામાં આવે છે. તે ભારત સરકારની એક પોલિસી થિંક ટેન્ક છે, જે સરકારના કાર્યો અને નીતિઓ વિશે માહિતી પ્રદાન કરે છે. આયોજન પંચ દેશના વિકાસને લગતી યોજનાઓ બનાવતું હતું.

નીતિ આયોગ સરકારની લાંબા ગાળાની નીતિઓ અને કાર્યક્રમો માટે વ્યૂહરચના ઘડવામાં મહત્વની ભૂમિકા ભજવે છે. વડાપ્રધાન પંચના અધ્યક્ષ છે. ચેરમેન ઉપરાંત વાઈસ ચેરમેન અને એક કારોબારી અધિકારી છે. તેમની નિમણૂક વડાપ્રધાન દ્વારા કરવામાં આવે છે. વડાપ્રધાન મોદીએ 8 ફેબ્રુઆરી 2015ના રોજ નીતિ આયોગની પ્રથમ બેઠકની અધ્યક્ષતા કરી હતી.