રાજકારણ@દેશ: વિધાનસભા ચૂંટણીને લઈને કેજરીવાલની મોટી જાહેરાત, 'દિલ્હીમાં એકલા જ ચૂંટણી લડીશું'

અટલ સમાચાર ડોટ કોમ, ડેસ્ક

દિલ્હીમાં ફેબ્રુઆરીમાં યોજાનારી વિધાનસભા ચૂંટણીને લઈને આમ આદમી પાર્ટીએ મોટી જાહેરાત કરી છે. કેજરીવાલે આજે બુધવારે પોતાના X એકાઉન્ટ પર પોસ્ટ કર્યું કે AAP દિલ્હીમાં એકલા જ ચૂંટણી લડશે, કોંગ્રેસ સાથે ગઠબંધનની કોઈ સંભાવના નથી. અગાઉ જાણકારી મળી હતી કે કોંગ્રેસ અને AAP વચ્ચે ગઠબંધન માટે સમજૂતી અંતિમ તબક્કામાં છે. કોંગ્રેસને 15 બેઠકો મળી શકે છે અને અન્ય I.N.D.I.A ગઠબંધન સભ્યોને 1 કે 2 બેઠકો મળી શકે છે.

બાકીની બેઠકો પર આમ આદમી પાર્ટી પોતે ચૂંટણી લડશે. હવે AAP એ જાહેરાત કરી છે કે આમ આદમી પાર્ટી દિલ્હીમાં એકલા હાથે ચૂંટણી લડશે.ગઠબંધનને લઈને મંગળવારે રાત્રે I.N.D.I.A.ના નેતાઓ વચ્ચે બેઠક થઈ હતી. આ પછી જ બુધવારે કેજરીવાલે એકલા હાથે ચૂંટણી લડવાની જાહેરાત કરી છે. દિલ્હી વિધાનસભા ચૂંટણી માટે તમામ પક્ષોએ તૈયારીઓ તેજ કરી દીધી છે. આમ આદમી પાર્ટી એ સોમવારે તેના 20 ઉમેદવારોની યાદી જાહેર કરી. આ પહેલા AAPએ તેના 11 ઉમેદવારોની પ્રથમ યાદી જાહેર કરી હતી.દિલ્હીમાં 2015ની વિધાનસભા ચૂંટણીમાં આમ આદમી પાર્ટીને 70માંથી 67 બેઠકો મળી હતી, જ્યારે ભાજપને માત્ર ત્રણ બેઠકો મળી હતી.

ખાસ વાત એ છે કે કોંગ્રેસને દિલ્હીમાં એક પણ  બેઠક મળી નથી.જ્યારે 2020 માં યોજાયેલી વિધાનસભાની ચૂંટણીમાં, AAPને 70 માંથી 62 બેઠકો મળી, જ્યારે ભારતીય જનતા પાર્ટીએ 8 બેઠક અને કોંગ્રેસનું તો ખાતું જ ખુલ્યું નહોતુ. હવે જોવું એ રહ્યું કે જો આ વખતે પણ કોંગ્રેસ એકલા હાથે ચૂંટણી લડે છે તો તેને કેટલી બેઠક મળશે.