રાજકારણ@દેશ: CM યોગી આદિત્યનાથ પર રાજીનામું આપવાનું દબાણ, યુપીમાં રાજકીય ઘમસાણ

અટલ સમાચાર ડોટ કોમ, ડેસ્ક

લોકસભા ચૂંટણી બાદ ઉત્તર પ્રદેશની રાજનીતિ ઘણી ચર્ચામાં રહી છે. કારણ સ્પષ્ટ છે અને તે ભાજપના ખરાબ પ્રદર્શન સાથે જોડાયેલું છે. 2019ની સામાન્ય ચૂંટણીમાં 62 બેઠકો જીતનાર પાર્ટીને ભારે નુકસાન થયું હતું અને હવે આ સંખ્યા ઘટીને માત્ર 33 રહી ગઈ છે. યુપીને ભાજપનો ગઢ કહેવામાં આવે છે ગઢમાં ભંગ થાય તો આંતરિક અને બાહ્ય રીતે ઉથલપાથલ થવી સ્વાભાવિક છે.

લોકસભા ચૂંટણીમાં ભાજપને સૌથી વધુ નુકસાન ઉત્તર પ્રદેશમાંથી થયું છે. 10 વર્ષમાં પહેલીવાર, પાર્ટીએ અહીં આટલું ખરાબ પ્રદર્શન કર્યું છે અને ટેલીના સંદર્ભમાં સપા પછી બીજા સ્થાને આવી ગઈ છે. ભાજપને પોતાના દમ પર 33 જ્યારે સપાને 37 બેઠકો મળી છે. સપાએ લોકસભા ચૂંટણીમાં અત્યાર સુધીનું પોતાનું સર્વશ્રેષ્ઠ પ્રદર્શન આપ્યું છે. ત્યારથી રાજ્યના રાજકારણમાં ભાજપની અંદર ખળભળાટ મચી ગયો છે. સૌથી મોટો પ્રશ્ન એ ઊભો થયો છે કે ભાજપના નબળા પ્રદર્શનની જવાબદારી કોણ લેશે? PM મોદીને કેન્દ્રમાં સત્તા મેળવવામાં મુશ્કેલીઓનો સામનો કરવો પડ્યો.તો બીજી તરફ ઉત્તર પ્રદેશના મુખ્યમંત્રી યોગી આદિત્યનાથ ભારતીય જનતા પાર્ટી હાઈકમાન્ડના નિશાના પર છે.

ભાજપનું માનવું છે કે યોગી મહારાજે જાણી જોઈને ઉત્તર પ્રદેશમાં પીએમ મોદીની રમત બગાડી છે, જેના કારણે તેમને કેન્દ્રમાં સત્તા મેળવવામાં મુશ્કેલીઓનો સામનો કરવો પડ્યો છે. તેથી તેમણે પોતાના પદ પરથી રાજીનામું આપી દેવુંજોઈએ. સંભવતઃ બે દિવસ પહેલા યોગીને આ અંગેનો સંદેશ પણ આપવામાં આવ્યો હતો.યોગીની લોકપ્રિયતા જેમ જેમ વધી રહી છે તેમ તેમ તેઓ અમુક લોકો માટે માથાનો દુખાવો બની રહ્યા છે. ભાજપના નજીકના સૂત્રોનો આ દાવો છે. તેમની દલીલ એવી છે કે જ્યારે કેન્દ્રમાં 400 પારનો નારો આપીને અડધોઅડધ પરાજય પામેલા વડાપ્રધાન મોદીને ત્રીજી વખત વડાપ્રધાન બનાવવામાં આવી રહ્યા છે, તો પછી બે વખત બમ્પર સમર્થનથી જીતેલા યોગીને હટાવવાનું દબાણ શા માટે?