રાજકારણ@ગુજરાત: કોંગ્રેસને વધુ એક મોટો ઝટકો, આ દિગ્ગજ નેતાએ રાજીનામું આપી દેતા હડકંપ

અટલ સમાચાર ડોટ કોમ, ડેસ્ક

ગુજરાતમાં ચૂંટણી પહેલાં જ કોંગ્રેસ પાર્ટીને વધુ એક મોટો ઝટકો લાગ્યો છે. રાધનપુરના પૂર્વ ધારાસભ્ય અને કોંગ્રેસના કદાવર નેતા રઘુ દેસાઈએ કોંગ્રેસ પક્ષમાંથી રાજીનામું આપી દેતા હડકંપ મચ્યો છે. પ્રદેશ કોંગ્રેસ સાથે છેડો ફાડનારા નેતાઓની યાદીમાં તેમનું નામ જોડાતાં પક્ષના સંગઠનમાં ખળભળાટ મચી ગયો છે.

કોંગ્રેસ નેતા રઘુ દેસાઈ લાંબા સમયથી પ્રદેશ કોંગ્રેસની કામગીરી અને સંગઠન માળખાથી નારાજ હતા. તેમની નારાજગીનું મુખ્ય કારણ તેમના વિશ્વાસુ અને સક્રિય સમર્થકોને પક્ષના સંગઠનમાં યોગ્ય સ્થાન ન મળવું હોવાનું જાણવા મળી રહ્યું છે. પક્ષમાં તેમની અવગણના થઈ રહી હોવાની લાગણી સાથે, તેમણે આખરે કોંગ્રેસ છોડવાનો કઠોર નિર્ણય લીધો છે. તેમણે સત્તાવાર રીતે પક્ષમાંથી પોતાનું રાજીનામું ધરી દીધું છે.રઘુ દેસાઈનો રાજીનામું પ્રદેશ કોંગ્રેસ માટે એક ગંભીર ચિંતાનો વિષય છે.

લોકસભાની ચૂંટણી આડે હવે ગણતરીના મહિનાઓ જ બાકી છે, ત્યારે એક પછી એક મોટા નેતાઓનું પક્ષ છોડી જવું એ કોંગ્રેસની આંતરિક સ્થિતિ અને નેતૃત્વ પર સવાલો ઊભા કરે છે. રાધનપુર અને આસપાસના વિસ્તારમાં રઘુ દેસાઈનો સારો પ્રભાવ છે તેમના જવાથી ઉત્તર ગુજરાતમાં કોંગ્રેસના સંગઠનને મોટો ફટકો પડવાની શક્યતા છે.