રાજકારણ@ગુજરાત: ચૂંટણી પહેલાં જ નવસારી, ગણદેવી સહિત અનેક વિસ્તારોમાં કેસરીયો લહેરાયો, જાણો વધું

અટલ સમાચાર ડોટ કોમ, ડેસ્ક

આગામી સ્થાનિક સ્વરાજ્યની ચૂંટણીઓ યોજાય તે પહેલાં જ ભારતીય જનતા પાર્ટીએ અનેક જિલ્લાઓમાં જીત મેળવી છે. પંચમહાલ, સુરેન્દ્રનગર, નવસારી અને ગણદેવી જેવા વિસ્તારોમાં ભાજપના ઉમેદવારો બિનહરીફ ચૂંટાઈ આવતા રાજકીય ગરમાવો જોવા મળી રહ્યો છે. વિરોધ પક્ષોના ઉમેદવારોના અભાવે ચૂંટણી પહેલાં જ ભાજપની મજબૂત પકડ સાબિત થઈ છે.

નવસારી જિલ્લા પંચાયતની કુલ 30 બેઠકો માટે યોજાનારી ચૂંટણીમાં મતદાન પહેલાં જ 2 બેઠકો પર ભાજપનો વિજય થયો છે. બિગરી ઘેજ અને દેવસર જેવી મહત્વની બેઠકો પર અન્ય કોઈ રાજકીય પક્ષ કે અપક્ષ ઉમેદવારે ફોર્મ ન ભરતા ભાજપના ઉમેદવારો બિનહરીફ વિજેતા જાહેર થયા છે. બિહરી બેઠક પરથી ભીખુ પટેલ અને ઘેજ બેઠક પરથી અમિતબેન વિજેતા બન્યા છે.ગણદેવી તાલુકા પંચાયતની ચૂંટણીમાં પણ ભાજપનો દબદબો જોવા મળ્યો છે.

અહીંની 6 બેઠકો પર ભાજપના ઉમેદવારોને કોઈ પણ પ્રકારનો પડકાર મળ્યો નથી. બિગરી-1, બિગરી-2, દેવસર-2 અને માસા જેવી બેઠકો પર વિપક્ષી ઉમેદવારોની ગેરહાજરીના કારણે ભાજપ માટે જીતનો માર્ગ સાવ સરળ બની ગયો હતો.નવસારી જિલ્લાના ભાઠા અને અજરાઈ તાલુકા પંચાયતની બેઠકો પર પણ ભાજપના ઉમેદવારો બિનહરીફ જાહેર કરવામાં આવ્યા છે. આ બેઠકો પર પણ કોઈ અન્ય પક્ષ દ્વારા ઉમેદવારી ફોર્મ ભરવામાં આવ્યા ન હતા, જેના કારણે કોઈપણ પ્રકારની સ્પર્ધા વગર ભાજપના ઉમેદવારોએ વિજય મેળવી લીધો છે.

સમગ્ર નવસારી જિલ્લામાં સર્જાયેલી આ પરિસ્થિતિ ભાજપના મજબૂત સંગઠન અને પ્રભાવને દર્શાવે છે. ચૂંટણીના મતદાન પહેલાં જ આટલી મોટી સંખ્યામાં ઉમેદવારો બિનહરીફ જાહેર થવા તે વિરોધ પક્ષોની નબળી સ્થિતિ સૂચવે છે.