રિપોર્ટ@બનાસકાંઠા: ભારે પવન અને કરા સાથે પડેલા કમોસમી વરસાદે ખેડૂતોના ઉનાળુ પાકોને મોટું નુકસાન

અટલ સમાચાર ડોટ કોમ, ડેસ્ક

ગુજરાતમાં છેલ્લા 2 દિવસથી વરસી રહેલો વરસાદ ચોમાસાની જેમ વરસી રહ્યો છે. હળવો વરસાદ તો ઠીક કરા સાથે ધોધમાર વરસાદ પડતાં ખેડૂતોની ચિંતામાં વધારો થયો છે. ખેડૂતોનો પાક ખેતરોમાં લહેરાઈ રહ્યો છે ત્યારે ભારે પવન સાથે વરસી રહેલો વરસાદ ખેડૂતોના પાકનો સોથ બોલાવી રહ્યો છે. બનાસકાંઠામાં ભારે પવન અને કરા સાથે પડેલા કમોસમી વરસાદે ખેડૂતોના ઉનાળુ પાકોને મોટું નુકસાન પહોચાડ્યું છે. પાલનપુર પંથકમાં પડેલા ભારે પવન સાથેના કમોસમી વરસાદે પાલનપુરના સેમોદ્રા ગામના ખેડૂત નવનીતભાઈ પટેલના ખેતરમાં ઉભેલ બાજરીનો સોથ વાળી દીધો છે. તેમણે પોતાના ખેતરના 3 વીઘા જમીનમાં બાજરીના પાકનું વાવેતર કર્યું હતું. પરંતુ કમોસમી વરસાદે ખેડૂતના મોઢા સુધી આવેલો કોળિયો છીનવી લીધો છે.

બનાકાંઠામાં થયેલા કમોસમી વરસાદે જેવી રીતે બાજરીનો કચ્ચરઘાણ કાઢ્યો, તેવી જ રીતે ભારે પવન અને કરા સાથે આવેલા વરસાદે બાગાયતી પાકનું પણ નામો નિશાન મિટાવી દીધું છે. પાલનપુર પંથકમાં પડેલા ભારે પવન સાથેના કમોસમી વરસાદે પાલનપુરના સેમોદ્રા ગામના ખેડૂત ધનરાજભાઈ ચૌધરીના ખેતરમાં ઉભેલા પૈપયાના પાકનો સોથ વાળી ગયો છે. પપૈયાનો પાક ખેતરમાં આડો પડી જતાં ખેડૂતને 20 લાખથી પણ વધુ રૂપિયાનું નુકસાન થવા પામ્યુ છે. બનાસકાંઠા જિલ્લામાં જેટલું નુકસાન છે, તેવું જ નુકસાન અમદાવાદ જિલ્લાના ખેડૂતોને પણ થયું છે. અમદાવાદના માંડલ અને વિરમગામ પંથકમાં અજમો અને જુવાર જેવા પાકને ભારે નુકસાન પહોંચ્યું છે.

માંડલના નાના ઉભડાના ખેડૂતોએ અજમો, જુવારનું વાવેતર કર્યું હતુ. તો ઘણા ખેડૂતોના જુવારના વાઢેલા પાથરા ખેતરમાં પડ્યા હતા. ત્યારે ભરઉનાળે આવેલા કમોસમી વરસાદે પાકનો સત્યાનાશ વાળી દીધો છે. અમદાવાદ સહિત કેટલાક જિલ્લાઓમાં ઓરેન્જ એલર્ટ આપવામાં આવ્યું છે. જ્યારે ગાંધીનગર, મહેસાણા, અમરેલી, મહીસાગર, દાહોદ, ખેડા, આણંદ, પંચમહાલ, વડોદરા, છોટાઉદેપુર, નર્મદા, ભરૂચ, સુરત, અમરેલી, ભાવનગર, મોરબી અને બોટાદમાં પણ ઓરેન્જ એલર્ટ જાહેર કરવામાં આવ્યું છે. ઓરેન્જ એલર્ટ વિસ્તારોમાં 41 થી 61 કિલોમીટર પ્રતિ કલાકની ઝડપે પવન અને વીજળીના કડાકા ભડાકા સાથે વરસાદની આગાહી કરવામાં આવી છે. રાજ્યના અન્ય વિસ્તારોમાં પણ વરસાદની આગાહી સાથે યલો એલર્ટ જાહેર કરવામાં આવ્યું છે.