રીપોર્ટ@દેશ: ઉધમપુરમાં સુરક્ષા દળો અને આતંકીઓ વચ્ચે અથડામણ, એક જવાન શહીદ

અટલ સમાચાર ડોટ કોમ, ડેસ્ક

પહેલગામમાં થયેલા આતંકવાદી હુમલા બાદ હવે ઉધમપુરથી સૌથી મોટા સમાચાર સામે આવ્યા છે. વાસ્તવમાં હાલ સેના અને પોલીસ દ્વારા સતત સર્ચ ઓપરેશન ચલાવવામાં આવી રહ્યું છે. સેનાની ઘણી ટીમો સમગ્ર વિસ્તારમાં સઘન શોધખોળ કામગીરી ચલાવી રહી છે. આ દરમિયાન જમ્મુ પોલીસ પણ તેમની સાથે હાજર છે. આ દરમિયાન સેના અને આતંકવાદીઓ વચ્ચે એન્કાઉન્ટરના સમાચાર સામે આવ્યા છે.

જમ્મુ પોલીસના જણાવ્યા અનુસાર, ઉધમપુરના દુડ્ડુ-બસંતગઢ વિસ્તારમાં આતંકવાદીઓ અને સુરક્ષા દળો વચ્ચે એન્કાઉન્ટર ચાલી રહ્યું છે. આમાં એક સૈનિક શહીદ થયો છે.સર્ચ ઓપરેશન દરમિયાન આતંકવાદીઓએ સેના પર ગોળીબાર કર્યો જેના જવાબમાં સેના પણ સતત ગોળીબાર કરી રહી છે. એવું માનવામાં આવે છે કે, સેનાએ અહીં બે થી ત્રણ આતંકવાદીઓને ઘેરી લીધા છે.

માહિતી અનુસાર આ કદાચ એ જ આતંકવાદીઓનું જૂથ છે જે તાજેતરમાં રામનગર વિસ્તારમાં ટ્રેક કરવામાં આવ્યું હતું. આ 3 પાકિસ્તાની આતંકવાદી હોઈ શકે છે. આ એન્કાઉન્ટરમાં બંને બાજુથી ગોળીબારનો અવાજ સમયાંતરે આવી રહ્યો છે. ઘટનાસ્થળે ભારે ફોર્સ હાજર છે.આ સાથે ઘણા પોલીસ કર્મચારીઓ પણ સેના સાથે છે. પહેલગામ હુમલા બાદથી ભારતીય સેના એલર્ટ મોડ પર કામ કરી રહી છે. આ જ કારણ છે કે છેલ્લા 24 કલાકમાં સેનાની આ બીજી કાર્યવાહી છે. સેનાના સૂત્રોના જણાવ્યા અનુસાર, હાલમાં ખીણમાં 100 થી વધુ આતંકવાદીઓ સક્રિય છે.