રીપોર્ટ@દેશ: છત્તીસગઢમાં નક્સલવાદીઓ વિરુદ્ધ સુરક્ષા દળોનું ઓપરેશન, 16 નક્સલવાદીઓ ઠાર

અટલ સમાચાર ડોટ કોમ, ડેસ્ક

છત્તીસગઢના સુકમા જિલ્લામાં સુરક્ષાદળો અને નક્સલવાદીઓ વચ્ચે અથડામણ ચાલી રહી છે. આ એન્કાઉન્ટરમાં 16 નક્સલવાદીઓના મૃતદેહ મળી આવ્યા છે. સુકમા અને દંતેવાડા જિલ્લાના સરહદી વિસ્તારોમાં માઓવાદીઓ અને સુરક્ષા દળો વચ્ચે અથડામણ ચાલી રહી છે. સુરક્ષા દળની ટીમ માઓવાદી વિરોધી ઓપરેશન પર ગઈ હતી. સવારે સૈનિકો શોધખોળ કરવા નીકળ્યા હતા ત્યાર બાદ નક્સલીઓએ ગોળીબાર શરૂ કરી દીધો હતો.

સવારે 8 વાગ્યાથી એન્કાઉન્ટર ચાલુ છે. જવાનોએ નક્સલવાદીઓના ટોચના નેતાને ઘેરી લીધો છે. સુકમા ડીઆરજી અને સીઆરપીએફના જવાનો પણ ઓપરેશનમાં સામેલ છે. સુકમા એસપી પોતે આ ઓપરેશનનું નેતૃત્વ કરી રહ્યા છે. આ એન્કાઉન્ટર સુકમા જિલ્લાના કેરલપાલ પોલીસ સ્ટેશન વિસ્તારમાં થઈ રહ્યું છે. સુરક્ષા દળો મુખ્ય વિસ્તારમાં પ્રવેશીને ઓપરેશન ચલાવી રહ્યા છે. જ્યાં એન્કાઉન્ટર થઈ રહ્યું છે તે વિસ્તાર નક્સલવાદીઓ માટે સૌથી સુરક્ષિત વિસ્તાર માનવામાં આવે છે.

અધિકારીઓના જણાવ્યા અનુસાર એન્કાઉન્ટર હજુ પણ ચાલુ છે અને મોટી સંખ્યામાં નક્સલવાદીઓ માર્યા જવાની આશંકા છે.આ અથડામણમાં બે DRG જવાનો પણ ઘાયલ થયા છે. પરંતુ તેમની હાલત સામાન્ય છે અને તેઓ ખતરાની બહાર છે. આ એન્કાઉન્ટર નક્સલ વિરોધી ઓપરેશનના ભાગરૂપે કરવામાં આવ્યું હતું, જેમાં સુરક્ષા દળોએ નક્સલવાદીઓ વિરુદ્ધ મોટી કાર્યવાહી કરી છે. આ મહિનામાં સૈનિકોનું આ બીજું મોટું ઓપરેશન છે.સુકમા એન્કાઉન્ટરમાં નક્સલવાદીઓના એક ટોચના નેતાના મોતના સમાચાર છે. ડીવીસીએમ જગદીશ એન્કાઉન્ટરમાં માર્યા ગયા હોવાના અહેવાલ છે. માર્યા ગયેલા નક્સલવાદીઓ પાસેથી સુરક્ષા દળોએ મોટી માત્રામાં વિસ્ફોટક સામગ્રી અને હથિયારો જપ્ત કર્યા છે.