રીપોર્ટ@દેશ: 5 રાજ્યોની વિધાનસભા ચૂંટણીની તારીખોની આતુરતાનો અંત, ચૂંટણીપંચ સાંજે 4 વાગ્યે જાહેરાત કરશે

અટલ સમાચાર ડોટ કોમ, ડેસ્ક

ભારતના રાજકીય ઇતિહાસમાં અત્યંત મહત્વપૂર્ણ ગણાતી પાંચ રાજ્યોની વિધાનસભા ચૂંટણીની તારીખોની આતુરતાનો આજે અંત આવી શકે છે.ભારતીય ચૂંટણી પંચ દ્વારા આજે સાંજે 4 વાગ્યે દિલ્હીના વિજ્ઞાન ભવન ખાતે એક મહત્વની પ્રેસ કોન્ફરન્સ બોલાવવામાં આવી છે. આ બેઠકમાં પશ્ચિમ બંગાળ, આસામ, કેરળ, તમિલનાડુ અને પુડુચેરી માટે ચૂંટણી કાર્યક્રમ જાહેર કરવામાં આવે તેવી પ્રબળ શક્યતા છે.

ચૂંટણી પંચના ડેટા મુજબ, આ પાંચેય રાજ્યોમાં મે મહિના દરમિયાન વર્તમાન સરકારોનો કાર્યકાળ સમાપ્ત થઈ રહ્યો છે. તમિલનાડુ વિધાનસભાનો કાર્યકાળ 10 મેના રોજ પૂર્ણ થાય છે, જ્યારે પશ્ચિમ બંગાળનો 7 મે અને કેરળનો 23 મેના રોજ પૂરો થઈ રહ્યો છે. આ ઉપરાંત, આસામ વિધાનસભાનો કાર્યકાળ 20 મે અને પુડુચેરીનો 15 જૂને પૂર્ણ થાય છે. આ સંજોગોમાં, લોકશાહીના આ પર્વની પ્રક્રિયા 7 મે પહેલા જ પૂર્ણ કરી લેવાનું આયોજન હોવાનું જણાય છે. મુખ્ય ચૂંટણી કમિશનરના નેતૃત્વ હેઠળ પંચે તમામ રાજ્યોની સુરક્ષા વ્યવસ્થા અને મતદાર યાદીઓની ચકાસણી પૂર્ણ કરી લીધી છે. પશ્ચિમ બંગાળમાં સુરક્ષાના કારણોસર અનેક તબક્કામાં મતદાન થઈ શકે છે, જ્યારે અન્ય રાજ્યોમાં ઓછા તબક્કામાં ચૂંટણી યોજવાની ગણતરી છે. આજની જાહેરાત સાથે જ આ પાંચેય રાજ્યોમાં આદર્શ આચાર સંહિતા તાત્કાલિક અસરથી લાગુ થઈ જશે.

ચૂંટણીની તારીખો જાહેર થવાની અટકળો વચ્ચે ભાજપ, કોંગ્રેસ, તૃણમૂલ કોંગ્રેસ અને ડીએમકે જેવા તમામ પ્રાદેશિક અને રાષ્ટ્રીય પક્ષોએ ઉમેદવારોના નામ નક્કી કરવાની પ્રક્રિયા તેજ કરી દીધી છે. પશ્ચિમ બંગાળ અને આસામમાં સત્તા મેળવવા માટે એડીચોટીનું જોર લગાવવામાં આવી રહ્યું છે. આજની પ્રેસ કોન્ફરન્સ બાદ સ્પષ્ટ થશે કે કયા રાજ્યમાં કેટલા તબક્કામાં મતદાન થશે અને પરિણામની તારીખ કઈ હશે.