રીપોર્ટ@દિલ્હી: આજે રામલીલા મેદાન ખાતે 'INDIA' ગઠબંધનની મહારેલી, લાખો લોકો ઉમટે તેવી શક્યતા

​​​અટલ સમાચાર ડોટ કોમ, ડેસ્ક

આજે દિલ્હીના ઐતિહાસિક રામલીલા મેદાન ખાતે વિપક્ષી ગઠબંધન 'INDIA'ની મહારેલીનું આયોજન કરવામાં આવ્યું છે. લોકસભામાં વિપક્ષના નેતા રાહુલ ગાંધી, કોંગ્રેસ પ્રમુખ મલ્લિકાર્જુન ખડગે, પશ્ચિમ બંગાળના પૂર્વ મુખ્યમંત્રી મમતા બેનરજી, સમાજવાદી પાર્ટીના પ્રમુખ અખિલેશ યાદવ સહિત વિપક્ષના તમામ ટોચના નેતાઓ, કાર્યકર્તાઓ, વિદ્યાર્થી સંગઠનો અને નાગરિક સમાજના પ્રતિનિધિઓ આ રેલીમાં ભાગ લઈ રહ્યા છે.મહારેલીને પગલે રામલીલા મેદાન અને આસપાસના વિસ્તારોમાં સુરક્ષાચક્ર મજબૂત કરી દેવામાં આવ્યું છે.

દિલ્હી પોલીસ અને પેરામિલિટરી ફોર્સિસ એલર્ટ મોડ પર છે.વહેલી સવારથી જ દેશના વિવિધ ભાગોમાંથી કાર્યકર્તાઓ રામલીલા મેદાન ખાતે પહોંચવા લાગ્યા છે.સવારે 10 થી સાંજે 5 વાગ્યા સુધી મધ્ય દિલ્હીના અનેક રૂટ ડાયવર્ટ કરાયા છે. ITO, દિલ્હી ગેટ, રાજઘાટ, અજમેરી ગેટ અને તુર્કમાન ગેટ સહિતના વિસ્તારોમાં ટ્રાફિકમાં ફેરફાર કરાયો છે. જવાહરલાલ નેહરુ માર્ગ, બહાદુરશાહ ઝફર માર્ગ, મિંટો રોડથી બચવા સલાહ અપાઈ છે. LNJP અને GB પંત હોસ્પિટલ માટે એમ્બ્યુલન્સ અને ઈમરજન્સી વાહનો માટે ખાસ કોરિડોર બનાવાયો છે.હરિયાણાના ભિવાનીથી ‘ઇન્ડિયા’ બ્લોકના કાર્યકર્તાઓ દિલ્હી માટે રવાના થઈ ગયા છે. દિલ્હીમાં કોંગ્રેસ અધ્યક્ષ મલ્લિકાર્જુન ખડગેના નિવાસસ્થાને પણ નેતાઓની હિલચાલ તેજ થઈ ગઈ છે.

દિલ્હી પોલીસે સમગ્ર રામલીલા મેદાનને 14 સુરક્ષા ઝોનમાં વહેંચી દીધું છે. દરેક ઝોનની કમાન ACP રેન્કના અધિકારી સંભાળી રહ્યા છે. 4000 થી વધુ પોલીસકર્મીઓ અને CAPF ની ટુકડીઓ ખડેપગે છે. કેન્દ્ર સરકારે દિલ્હીમાં સીએપીએફ (CAPF) ની 270 કંપનીઓની તૈનાતી 16 નવેમ્બર સુધી લંબાવી છે.વિપક્ષની આ રેલી સામે સિખ સમુદાય અને ભાજપ દ્વારા વિરોધ નોંધાવવામાં આવી રહ્યો છે. રવિવારે સિખ સમુદાય દ્વારા પણ માર્ચ કાઢવાનું આયોજન કરાયું છે.

આ રેલી કનોટ પ્લેસથી શરૂ થઈને મિંટો રોડ જંક્શન અને અજમેરી ગેટ થઈને રામલીલા મેદાન પહોંચશે. આયોજકો (કોંગ્રેસ/વિપક્ષ) દ્વારા રેલીમાં 10 લાખ લોકો એકઠા થવાનો દાવો કરાયો છે, જ્યારે દિલ્હી પોલીસના ઇન્ટેલિજન્સ ઇનપુટ મુજબ આશરે 70 હજાર લોકો પહોંચવાની શક્યતા છે. શનિવારે પોલીસ કમિશનર અનુરાગ કુમાર અને સ્પેશિયલ કમિશનર દેવેન્દ્ર ચંદ શ્રીવાસ્તવે સુરક્ષા સ્થિતિની સમીક્ષા કરી હતી.મેદાન અને આસપાસના વિસ્તારોમાં 200 થી વધુ CCTV કેમેરા, બોડી-વોર્ન કેમેરા અને એન્ટી-રાયટ વ્હીકલ તૈનાત કરાયા છે. પ્રવેશદ્વાર પર મેટલ ડિટેક્ટરથી સઘન તપાસ બાદ જ પ્રવેશ આપવામાં આવી રહ્યો છે.દિલ્હીના વેપારી સંગઠન CTI એ રેલી સામે વિરોધ વ્યક્ત કરતા રાહુલ ગાંધીને અપીલ કરી હતી કે તહેવારોની મોસમમાં વેપારીઓને નુકસાન ન પહોંચાડે. જેના જવાબમાં રાહુલ ગાંધીએ દિલ્હી આવતા લાખો કાર્યકર્તાઓને અપીલ કરી છે કે તેઓ રેલીની સાથે સાથે દિલ્હીના સ્થાનિક વેપારીઓ પાસેથી ખરીદી પણ કરે જેથી તેમને ફાયદો થાય.