રીપોર્ટ@દેશ: '50 કરોડ લોકો ગરીબીમાંથી બહાર આવ્યા', PM મોદીએ યુપીમાં ગજવી જનસભા
અટલ સમાચાર ડોટ કોમ, ડેસ્ક
PM નરેન્દ્ર મોદીએ ઉત્તર પ્રદેશના સર્વાંગી વિકાસ માટે રાજ્ય અને કેન્દ્રની ડબલ એન્જિન સરકારની કામગીરીને બિરદાવી છે. લખનઉ ખાતે આયોજિત 5મા રાષ્ટ્રીય કૌશલ દીક્ષાંત સમારોહને સંબોધતા વડાપ્રધાને રાજ્યના મુખ્યમંત્રી યોગી આદિત્યનાથ, નાયબ મુખ્યમંત્રીઓ કેશવ પ્રસાદ મૌર્ય અને બ્રજેશ પાઠક તેમજ પ્રદેશ પ્રમુખ પંકજ ચૌધરીનો એકસાથે ઉલ્લેખ કરીને તેમના સંયુક્ત પ્રયાસોની પ્રશંસા કરી હતી.વડાપ્રધાન મોદીએ જણાવ્યું કે, આ ચારેય નેતાઓએ સાથે મળીને ઉત્તર પ્રદેશની તસવીર બદલી નાખી છે. આગામી 2027ની વિધાનસભા ચૂંટણી પહેલા ભાજપના ચારેય ટોચના નેતાઓના નામ એકસાથે લઈને વડાપ્રધાને ઉત્તર પ્રદેશ ભાજપમાં સામૂહિક નેતૃત્વ અને રાજકીય સંતુલન જાળવવાનો સ્પષ્ટ સંદેશ આપવાનો પ્રયાસ કર્યો છે. હાલ ભાજપ આગામી વિધાનસભા ચૂંટણીની તૈયારીઓમાં વ્યસ્ત છે અને પક્ષ દ્વારા તમામ નેતાઓને એકજૂથ રહીને કામ કરવાની સૂચના આપવામાં આવી છે.
રાજ્યની વિકાસગાથા રજૂ કરતા વડાપ્રધાને એક્સપ્રેસ-વે, આંતરરાષ્ટ્રીય એરપોર્ટ, યુનિવર્સિટીઓ અને પ્રવાસન ક્ષેત્રે થયેલા વિકાસનો ઉલ્લેખ કર્યો હતો. આ ઉપરાંત તેમણે રાજ્યની બહેતર બનેલી કાયદો અને વ્યવસ્થાની સ્થિતિ તથા મહિલા સુરક્ષાની પણ સરાહના કરી હતી.વડાપ્રધાન મોદીએ સંરક્ષણ અને સેમિકન્ડક્ટર મેન્યુફેક્ચરિંગ ક્ષેત્રે ઉત્તર પ્રદેશની વધતી જતી ભૂમિકા પર ખાસ ભાર મૂક્યો હતો. તેમણે માહિતી આપી હતી કે રાજ્યમાં સેમિકન્ડક્ટર ચિપ મેન્યુફેક્ચરિંગ ફેક્ટરીનું નિર્માણ થઈ રહ્યું છે. બ્રહ્મોસ મિસાઈલના ઉત્પાદનને ઉત્તર પ્રદેશની મોટી સિદ્ધિ ગણાવતા તેમણે કહ્યું હતું કે ઓપરેશન સિંદૂર દરમિયાન દુશ્મનોની ઊંઘ ઉડાડી દેનારી બ્રહ્મોસ મિસાઈલ હવે ઉત્તર પ્રદેશમાં પણ બની રહી છે.
લખનઉના આ સમારોહમાં વડાપ્રધાને કહ્યું હતું કે વૈશ્વિક બજારમાં કુશળ ભારતીય કામદારોની માંગ સતત વધી રહી છે, જેમાં ખાસ કરીને ઇન્ડસ્ટ્રિયલ ટ્રેનિંગ ઇન્સ્ટિટ્યૂટ (ITI) માંથી તાલીમ પામેલા યુવાનોનો સમાવેશ થાય છે. તેમણે ભારપૂર્વક જણાવ્યું હતું કે કુશળ કામદારો અને પરંપરાગત કારીગરો દેશના વિકાસમાં મહત્વપૂર્ણ યોગદાન આપશે. આર્ટિફિશિયલ ઇન્ટેલિજન્સ (AI) ના કારણે રોજગાર પર પડનારી સંભવિત અસરો અંગેની ચિંતાઓ દૂર કરતા તેમણે કહ્યું હતું કે ટેકનોલોજીની પ્રગતિ ક્યારેય પ્રેક્ટિકલ સ્કિલ ધરાવતા લોકોનું સ્થાન લઈ શકશે નહીં. તેમણે સ્પષ્ટ શબ્દોમાં કહ્યું હતું કે જે વ્યક્તિ પાસે કૌશલ્ય એટલે કે સ્કિલ છે, તેની નોકરી કોઈ છીનવી શકતું નથી.વડાપ્રધાને એક મહત્વપૂર્ણ જાહેરાત કરતા જણાવ્યું હતું કે ભારત વર્ષ 2027માં વર્લ્ડસ્કિલ્સ એશિયા કોમ્પિટિશનની યજમાની કરશે, જેનું આયોજન ઉત્તર પ્રદેશના ગ્રેટર નોઈડા ખાતે કરવામાં આવશે. આ ઉપરાંત પોતાના ભાષણમાં તેમણે સરકારના ગરીબી નાબૂદીના પ્રયાસોની વાત કરતા દાવો કર્યો હતો કે છેલ્લા 12 વર્ષમાં 50 કરોડ લોકો ગરીબી રેખામાંથી બહાર આવ્યા છે.

