રિપોર્ટ@દેશ: મોદી કેબિનેટનો મોટો નિર્ણય, 10 લાખ લોકોને મળશે રોજગારી, જાણો વિગતે

અટલ સમાચાર ડોટ કોમ, ડેસ્ક

કેન્દ્રીય કેબિનેટની બેઠક બાદ વડા પ્રધાન મોદી, કેન્દ્રીય ગૃહ પ્રધાન અમિત શાહ, સંરક્ષણ પ્રધાન રાજનાથ સિંહ અને ભાજપના રાષ્ટ્રીય અધ્યક્ષ જેપી નડ્ડા વચ્ચે પણ એક અલગ બેઠક યોજાઈ હતી. વડાપ્રધાન મોદીની અધ્યક્ષતામાં આજે મળેલી કેબિનેટની બેઠકમાં રાષ્ટ્રીય ઔદ્યોગિક કોરિડોર વિકાસ કાર્યક્રમ હેઠળ 12 ઔદ્યોગિક સ્માર્ટ શહેરોને મંજૂરી આપવામાં આવી છે. સરકાર આ પ્રોજેક્ટ માટે રૂ. 28,602 કરોડનું રોકાણ કરશે. આ પ્રોજેક્ટથી 10 લાખ લોકોને રોજગાર મળશે.

કેન્દ્રીય મંત્રી અશ્વિની વૈષ્ણવે જણાવ્યું હતું કે છેલ્લા ત્રણ મહિનામાં કેબિનેટે 2 લાખ કરોડ રૂપિયાના ઇન્ફ્રા પ્રોજેક્ટને મંજૂરી આપી છે. આજે કેબિનેટે 12 નવા ઔદ્યોગિક સ્માર્ટ કોરિડોરને મંજૂરી આપી છે. આનાથી 10 રાજ્યોમાં લગભગ 10 લાખ નોકરીઓનું સર્જન થશે. સ્માર્ટ કોરિડોર તૈયાર કરવા માટે રૂ. 28,602 કરોડનો ખર્ચ થશે.અગાઉ એવું કહેવામાં આવ્યું હતું કે, કેબિનેટની બેઠકમાં 12 ઔદ્યોગિક પાર્કને મંજૂરી મળી શકે છે. લગભગ 29 હજાર કરોડ રૂપિયાના ખર્ચે આ ઈન્ડસ્ટ્રીયલ પાર્ક બનાવવાનો પ્રસ્તાવ છે. આ ઔદ્યોગિક પાર્ક ઉત્તર પ્રદેશ, આંધ્રપ્રદેશ, બિહાર અને મહારાષ્ટ્ર સહિત 10 રાજ્યોમાં બનાવવામાં આવશે.

આ સિવાય રેલવેના ત્રણ ઇન્ફ્રા પ્રોજેક્ટને પણ કેબિનેટની બેઠકમાં મંજૂરી આપવામાં આવી છે. જમશેદપુર પુરુલિયા આસનસોલથી 121 કિલોમીટરની ત્રીજી લાઇન, સરદેગા – (સુંદરગઢ જિલ્લો) – ભાલુમુડા (રાયગઢ જિલ્લો) વચ્ચે 37 કિલોમીટરની બીજી નવી ડબલ લાઇન અને બારગઢ રોડથી નવાપારા (ઓરિસ્સા) સુધીની 138 કિલોમીટરની ત્રીજી નવી લાઇનને મંજૂરી આપી છે.