રીપોર્ટ@દેશ: મુસાફરોથી ભરેલી બસ ઊંડી ખીણમાં ખાબકી, 5 ગુજરાતીઓના મોત

અટલ સમાચાર ડોટ કોમ, ડેસ્ક

ઉત્તરાખંડના ટિહરીના નરેન્દ્ર નગર વિસ્તારમાં આજે કુંજપુરી-હિંદોળાખાલ નજીક એક પેસેન્જર બસ ઊંડી ખીણમાં ખાબકી હતી. આ અકસ્માતમાં પાંચ લોકોના મોત થયા છે. SDRFએ અહેવાલ આપ્યો હતો કે અકસ્માત સમયે બસમાં 28 મુસાફરો સવાર હોવાનું જાણવા મળે છે. બધા મુસાફરો ગુજરાતથી કુંજપુરી મંદિરના દર્શન કરવા આવ્યા હતા. પોલીસ અને વહીવટીતંત્રની ટીમો ઘટનાસ્થળે પહોંચી હતી અને બચાવ કામગીરી શરૂ કરવામાં આવી હતી. ઘાયલોને હોસ્પિટલમાં દાખલ કરવામાં આવ્યા છે.

કુંજપુરી-હિંદોળાખાલ નજીક બસે કાબુ ગુમાવ્યો હતો અને સીધી 70 મીટર ઊંડી ખીણમાં ખાબકી હતી. SDRFની પાંચ ટીમો ઘટનાસ્થળે હાજર છે.જિલ્લા મેજિસ્ટ્રેટે જણાવ્યું હતું કે તમામ જરૂરી પગલાં લેવામાં આવી રહ્યા છે અને ઘાયલોને નજીકની હોસ્પિટલોમાં દાખલ કરવામાં આવ્યા છે. પોલીસે અકસ્માતનું કારણ નક્કી કરવા માટે તપાસ શરૂ કરી છે. SDRF ટીમો ઘટનાસ્થળે બચાવ કામગીરીમાં રોકાયેલી છે. જોકે, ટિહરીના સીએમઓ શ્યામ વિજયે જણાવ્યું હતું કે, "બસમાં કુલ ૧૮ લોકો સવાર હતા. પાંચના મોત થયા છે, જ્યારે ૧૩ અન્ય ઘાયલ થયા છે. ઘાયલ મુસાફરોમાંથી ત્રણને એઈમ્સ ઋષિકેશ રિફર કરવામાં આવ્યા છે, અને 10 લોકોને સારવાર માટે નરેન્દ્ર નગર હોસ્પિટલમાં મોકલવામાં આવ્યા છે."