રિપોર્ટ@દેશ: પીએમ મોદી પર કેજરીવાલનો પલટવાર, અમિત શાહને કર્યા ટાર્ગેટ, જાણો વિગતે

અટલ સમાચાર ડોટ કોમ, ડેસ્ક

દિલ્હી વિધાનસભાની ચૂંટણી જાહેર થયા પહેલાં જ રાજકારણ ગરમાયું છે. ભાજપ અને આમઆદમી પાર્ટી એકબીજા પર પ્રહાર કરતા હોય છે. દિલ્હીના પૂર્વ સીએમ અને આમ આદમી પાર્ટીના રાષ્ટ્રીય સંયોજક અરવિંદ કેજરીવાલે વડાપ્રધાન મોદી અને ભાજપ પર વળતો પ્રહાર કરતા પત્રકાર પરિષદ યોજી હતી. જેમાં તેમણે કહ્યું કે, આજે પીએમ મોદી દિલ્હી આવ્યા અને લગભગ 43 મિનિટનું ભાષણ આપ્યું હતું.એમાં 39 મિનિટ માત્ર દિલ્હીની જનતા અને તેમના દ્વારા ચૂંટાયેલી સરકારને અપશબ્દો આપ્યા.

2015માં દિલ્હીના લોકોએ બે સરકારો ચૂંટી. દિલ્હી અડધું રાજ્ય છે. દિલ્હીમાં લોકો બે સરકારો ચૂંટે છે. કેટલાક મુદ્દાઓ એક સરકાર હેઠળ આવે છે અને કેટલાક અન્ય સરકાર હેઠળ.દિલ્હીની જનતાએ બે સરકારોને ચૂંટી છે. કેન્દ્રમાં ભાજપની સરકાર અને દિલ્હીમાં આમ આદમી પાર્ટીની સરકાર. તેને 10 વર્ષ થઈ ગયા છે. આ દસ વર્ષમાં AAP સરકારે કેટલું કામ કર્યું છે તે બતાવવાનું શરૂ કરીએ તો કલાકોના કલાકો ગણાવી શકીએ. 

કેજરીવાલે કહ્યું કે, આજે પ્રધાનમંત્રીએ દિલ્હીમાં આફત આવ્યાનું કહ્યું છે. આ આફત દિલ્હીમાં નહીં પણ ભાજપમાં આવી છે. પહેલી આફત એ છે કે ભાજપ પાસે મુખ્યમંત્રીનો ચહેરો નથી. બીજી આફત એ છે કે ભાજપ પાસે કોઈ નારો નથી. ત્રીજી આફત એ છે કે ભાજપ પાસે એજન્ડા નથી. એક આપત્તિ દિલ્હીમાં આવી છે કાયદો અને વ્યવસ્થા, અમિત શાહ સુધી મહિલાઓનો અવાજ નથી પહોંચી રહ્યો. અમને ફક્ત એક જ વસ્તુ દેખાય છે કે દિલ્હીના લોકોને ફાયદો કઈ વસ્તુથી થાય. કેન્દ્ર સરકારની યોજનાથી ફાયદો થશે તો અમે તે કરીશું. જો અમારી યોજના ફાયદાકારક હશે તો અમે તે કરીશું. 'તમારી યોજના અમારી યોજના' અમે તેમાં પડવાના નથી.

તેમણે કહ્યું કે, પ્રધાનમંત્રીએ 2020માં ભાજપનો સંકલ્પ પત્ર બહાર પાડ્યો હતો. ત્યારે વડાપ્રધાને દિલ્હીની જનતાને ઘણા વચનો આપ્યા હતા. 2022 સુધીમાં દિલ્હીમાં તમામ લોકોને કાયમી ઘર આપવામાં આવશે. પાંચ વર્ષમાં માત્ર 4700 મકાનો જ બન્યા છે. દિલ્હીમાં 4 લાખ ઝૂંપડપટ્ટીઓ છે, 15 લાખ લોકોને ઘરની જરૂર છે, પરંતુ તેમણે પાંચ વર્ષમાં 4700 મકાનો આપ્યા છે. મને લાગે છે કે આ ઠરાવ 5 વર્ષનો નથી પણ 200 વર્ષનો છેછેલ્લા પાંચ વર્ષમાં આ લોકોએ ઝૂંપડપટ્ટીઓ તોડીને 2 લાખ 78 હજારથી વધુ લોકોને બેઘર બનાવી દીધા.