રિપોર્ટ@દેશ: બજેટમાં વિપક્ષના ભેદભાવનાં નિવેદન પર ભડક્યા નિર્મલા સીતારમણ, શું કહ્યું? જાણો

અટલ સમાચાર ડોટ કોમ, ડેસ્ક

નાણામંત્રી નિર્મલા સીતારમણે મંગળવારે સંસદમાં નાણાકીય વર્ષ 2024-25 માટે બજેટ રજૂ કર્યું હતું. ત્યારબાદ આજથી બજેટ પર ચર્ચા શરૂ થઈ છે. આ દરમિયાન વિપક્ષે બજેટમાં બે રાજ્યોને ખાસ નાણાકીય સહાય આપવા પર હોબાળો કર્યો હતો. રાજ્યોમાં ભેદભાવના નિવેદન નિર્મલા સીતારમણ સહન ન કરી શક્યા અને વિપક્ષને આડે હાથ લીધી હતી.

બજેટ સામે વિપક્ષના વિરોધ પર રાજ્યસભામાં તેઓએ કહ્યું, દરેક બજેટમાં, તમને આ દેશના દરેક રાજ્યનું નામ લેવાની તક મળતી નથી.પરંતુ ગઈકાલે બજેટમાં મહારાષ્ટ્રનું નામ લેવામાં આવ્યું ન હતું. શું આનો અર્થ એ છે કે મહારાષ્ટ્ર અવગણના અનુભવે છે? જો ભાષણમાં કોઈ ચોક્કસ રાજ્યનું નામ લેવામાં આવે છે, તો શું તેનો અર્થ એ છે કે GOIના કાર્યક્રમો આ રાજ્યોમાં નથી જતા? કોંગ્રેસની આગેવાની હેઠળના વિપક્ષનો આ એક જાણીજોઈને પ્રયાસ છે કે જેનાથી લોકોને એવું લાગે કે આપણા રાજ્યોને કંઈ આપવામાં આવ્યું નથી. આ એક અપમાનજનક આરોપ છે.

ખડગેએ કહ્યું કે આજે આપણી લોકસભા અને રાજ્યસભા જે રીતે ચાલી રહી છે તે તમે પણ જાણો છો. હું એ ચર્ચામાં પડવા માંગતો નથી. તેમણે કહ્યું કે ગઈ કાલે રજુ થયેલા બજેટમાં બે રાજ્યો સિવાય કોઈને કંઈ મળ્યું નથી. અમે ઈન્ડિયા બ્લોકના સાંસદો આની નિંદા કરીએ છીએ. આ કોઈને ખુશ કરવા માટે છે.વિપક્ષી INDIA બ્લોકના સાંસદો સંસદના પગથિયાં પર વિરોધ કર્યો હતો. આના પર નારાજગી વ્યક્ત કરતા સ્પીકર ઓમ બિરલાએ કહ્યું કે ગેટમાંથી કોઈપણ સભ્યને પ્રવેશવામાં કોઈ અડચણ ન હોવી જોઈએ. આ અંગે અનેક સભ્યોએ ફરિયાદ કરી છે.

તેમણે કહ્યું કે પ્રશ્નકાળ દરમિયાન શાસક પક્ષ કે વિપક્ષમાંથી કોઈને બોલવા દેવામાં આવશે નહીં. પ્રશ્નકાળ દરમિયાન માત્ર પ્રશ્નકાળ ચાલશે. હું આ વ્યવસ્થા આપું છું. સંસદીય કાર્ય મંત્રી કિરેન રિજિજુએ કહ્યું કે અમારા વિપક્ષી સાંસદે જે કર્યું તે નિંદનીય છે. સર્વપક્ષીય બેઠકમાં તમામ પક્ષોના નેતાઓએ કહ્યું કે, ગૃહને નિયમો અનુસાર ચલાવવામાં આવે, તેને સારી રીતે ચલાવવામાં આવે. લોકસભા સ્પીકરની વ્યવસ્થા બાદ વિપક્ષના સાંસદો ગૃહની બહાર આવી ગયા હતા.સંસદની કાર્યવાહી શરૂ થતાં જ વિપક્ષી સભ્યોએ બજેટનો વિરોધ કરીને હંગામો મચાવ્યો હતો.