રીપોર્ટ@દેશ: નારી શક્તિ વંદન સંમેલનમાં પીએમ મોદીનું મોટું નિવેદન, જાણો વિગતવાર

અટલ સમાચાર ડોટ કોમ, ડેસ્ક

વડાપ્રધાન નરેન્દ્ર મોદીએ દિલ્હીના વિજ્ઞાન ભવન ખાતે આયોજિત 'નારી શક્તિ વંદન સંમેલન' માં મહિલા અનામતને લઈને અત્યંત મહત્વની વાતો કરી હતી. તેમણે આ નિર્ણયને માત્ર રાજકીય સુધારો નહીં, પરંતુ 21મી સદીનો સૌથી મોટો અને ક્રાંતિકારી નિર્ણય ગણાવ્યો છે.પીએમ મોદીએ સ્પષ્ટ કર્યું કે ભારત જ્યારે વિકાસની નવી ઊંચાઈઓ સર કરી રહ્યું છે, ત્યારે મહિલાઓની ભાગીદારી વગર તે અશક્ય છે.

તેમણે કહ્યું કે, "આ નિર્ણય દેશની માતાઓ અને બહેનોના સન્માન અને સામર્થ્યને સમર્પિત છે." આ કાયદો ભારતીય લોકશાહીને વધુ મજબૂત અને સર્વસમાવેશક બનાવશે.મહિલાઓને સંસદ અને વિધાનસભાઓમાં અનામત આપવાની ચર્ચા છેલ્લા ચાર દાયકાથી ચાલી રહી હતી. અનેક સરકારો આવી અને ગઈ, પરંતુ આ આકાંક્ષા પૂરી થઈ ન હતી. વડાપ્રધાને નોંધ્યું કે 2023માં જ્યારે નવા સંસદ ભવનમાં આ બિલ રજૂ થયું, ત્યારે તમામ પક્ષોએ તેને આવકાર્યું હતું. હવે તે સ્વપ્ન સાકાર થવાની કગાર પર છે.

આ કાયદાના અમલીકરણ અને તેની પ્રક્રિયાને વેગ આપવા માટે કેન્દ્ર સરકારે 16, 17 અને 18 એપ્રિલ દરમિયાન સંસદનું ખાસ સત્ર બોલાવ્યું છે. આ સત્રનો મુખ્ય ઉદ્દેશ્ય મહિલા અનામતના માર્ગમાં આવતા અવરોધો દૂર કરવાનો અને લોકશાહી પ્રક્રિયામાં સ્ત્રીઓની ભાગીદારી સુનિશ્ચિત કરવાનો છે. વડાપ્રધાને ભારપૂર્વક જણાવ્યું કે તમામ રાજકીય પક્ષો અને વિપક્ષી નેતાઓએ પણ એકસૂરે સ્વીકાર્યું છે કે આ કાયદો 2029ની ચૂંટણી સુધીમાં કોઈપણ સંજોગોમાં અમલમાં આવવો જોઈએ.

સરકારનો પ્રયાસ છે કે સંવાદ અને સહયોગ દ્વારા આ પ્રક્રિયા પૂર્ણ કરવામાં આવે જેથી 2029 સુધીમાં મહિલાઓને તેમનો હક મળી રહે. પીએમ મોદીએ પોતાના સંબોધનમાં ખૂબ જ નમ્રતાપૂર્વક કહ્યું કે, "હું અહીં કોઈને ઉપદેશ આપવા નથી આવ્યો, પરંતુ દેશની નારી શક્તિના આશીર્વાદ લેવા આવ્યો છું."