રીપોર્ટ@દેશ: વડાપ્રધાન મોદીનો પાકિસ્તાન પર પ્રહાર, કહ્યું, 'આતંકવાદ માનવતા માટે સૌથી મોટો ખતરો'

અટલ સમાચાર ડોટ કોમ, ડેસ્ક

વડાપ્રધાન મોદી તેમના વિદેશ પ્રવાસના ચોથા તબક્કાના ભાગ રૂપે બ્રાઝિલમાં છે. તેમણે રિયો ડી જનેરિયોમાં 17મા બ્રિક્સ સમિટમાં ભાગ લીધો હતો. તેમણેકહ્યું હતું કે, આતંકવાદ માનવતા માટે સૌથી મોટો ખતરો છે. PM મોદીએ કહ્યું કે, તાજેતરમાં પહેલગામમાં એક અમાનવીય અને કાયર આતંકવાદી હુમલો થયો હતો. તે માનવતા પર હુમલો હતો.

BRICSમાં શાંતિ અને સુરક્ષા અને વૈશ્વિક શાસન સુધારણા સત્ર દરમિયાન વડાપ્રધાન મોદીએ શાંતિ અને ભાઈચારો પ્રત્યે ભારતની પ્રતિબદ્ધતા વ્યક્ત કરતા પાડોશી દેશ પર નિશાન સાધ્યું અને કહ્યું કે, બેવડા ધોરણો માટે કોઈ સ્થાન નથી. જો કોઈ દેશ પ્રત્યક્ષ કે પરોક્ષ રીતે આતંકવાદને સમર્થન આપે છે, તો તેણે તેની કિંમત ચૂકવવી પડશે. આતંકવાદીઓ પર પ્રતિબંધ મૂકવામાં કોઈ ખચકાટ ન હોવો જોઈએ. આ સાથે તેમણે કહ્યું કે, આતંકવાદને સમર્થન અથવા તેની મૌન સંમતિ સહન કરવામાં આવશે નહીં.

PM મોદીએ બધા દેશોને આ અંગે નિર્ણાયક નિર્ણય લેવા જણાવ્યું છે. તેમણે કહ્યું કે, ભારત મહાત્મા ગાંધી અને ગૌતમ બુદ્ધથી પ્રેરિત થઈને શાંતિના માર્ગ પર આગળ વધતું રહેશે. પરિસ્થિતિઓ ગમે તેટલી મુશ્કેલ હોય, શાંતિ માનવતાના કલ્યાણ માટે શ્રેષ્ઠ માર્ગ રહેશે.BRICS સમિટમાં ભાગ લેનારા નેતાઓએ પહેલગામ આતંકવાદી હુમલાની કડક શબ્દોમાં નિંદા કરી.

આ દરમિયાન દરેક પ્રકારના આતંકવાદ, સરહદ પારના આતંકવાદ, આતંકવાદને ભંડોળ પૂરું પાડવા અને આતંકવાદીઓને આશ્રય આપવા સામે લડવા માટે પ્રતિબદ્ધતા વ્યક્ત કરવામાં આવી હતી. આતંકવાદ પ્રત્યે શૂન્ય સહિષ્ણુતાની નીતિ બનાવવી જોઈએ અને આ માટે બેવડા ધોરણોને નકારી કાઢવા જોઈએ. BRICS દેશોએ એક સંયુક્ત નિવેદન બહાર પાડીને પહેલગામ આતંકવાદી હુમલાની કડક નિંદા કરી છે. નિવેદનમાં કહેવામાં આવ્યું છે કે, અમે 22 એપ્રિલના રોજ જમ્મુ અને કાશ્મીરમાં થયેલા આતંકવાદી હુમલાની સખત નિંદા કરીએ છીએ જેમાં 26 લોકો માર્યા ગયા હતા અને ઘણા ઘાયલ થયા હતા.