રિપોર્ટ@દેશ: વડાપ્રધાન મોદી પુતિનના આમંત્રણ પર રશિયાના પ્રવાસે, શું કહ્યુ વિદેશ મંત્રાલયે? જાણો

અટલ સમાચાર ડોટ કોમ, ડેસ્ક

વડાપ્રધાન મોદી આગામી દિવસોએ રશિયાના પ્રવાસે જઈ રહ્યા છે. વાસ્તવમાં વડાપ્રધાન નરેન્દ્ર મોદી તા.22 થી 23 ઓક્ટોબર 2024 દરમિયાન રશિયાની મુલાકાત લેશે. વિગતો મુજબ PM મોદી 16મી BRICS સમિટમાં ભાગ લેવા માટે રશિયા જઈ રહ્યા છે જેના માટે તેમને તેના રાષ્ટ્રપતિ વ્લાદિમીર પુતિને આમંત્રણ આપ્યું છે. કારણ કે આ વખતે બ્રિક્સ સમિટની અધ્યક્ષતા રશિયા કરી રહ્યું છે.વિદેશ મંત્રાલય દ્વારા જાહેર કરવામાં આવેલા નિવેદનમાં કહેવામાં આવ્યું છે કે, વડાપ્રધાન મોદી તેમની રશિયાની મુલાકાત દરમિયાન બ્રિક્સ સભ્ય દેશોના તેમના સમકક્ષો અને કઝાનમાં આમંત્રિત નેતાઓ સાથે દ્વિપક્ષીય બેઠક પણ કરી શકે છે.

આ વર્ષની BRICS સમિટની થીમ 'વૈશ્વિક વિકાસ અને સુરક્ષા માટે બહુપક્ષીયવાદને મજબૂત બનાવવી' છે. આ સાથે વિદેશ મંત્રાલયે કહ્યું કે, આ સંમેલન નેતાઓને વિશ્વના મુખ્ય મુદ્દાઓ પર ચર્ચા કરવા માટે એક મહત્વપૂર્ણ પ્લેટફોર્મ પ્રદાન કરશે. મંત્રાલયે એમ પણ કહ્યું હતું કે, આ સમિટ બ્રિક્સ દ્વારા લેવામાં આવેલી પહેલોની પ્રગતિનું મૂલ્યાંકન કરશે અને ભવિષ્યમાં સહકાર માટે સંભવિત ક્ષેત્રોને ઓળખવાની મૂલ્યવાન તક પણ પૂરી પાડશે. કોન્ફરન્સમાં ભાગ લેવા માટે તમામ સભ્ય દેશોના રાષ્ટ્રાધ્યક્ષો હાજર રહેશે.

માનવામાં આવે છે કે, બ્રિક્સ સંમેલન સિવાય વડાપ્રધાન નરેન્દ્ર મોદી તે સમયે રશિયામાં હાજર ઘણા દેશોના વડાપ્રધાનો અને રાષ્ટ્રપતિઓને મળશે. જુલાઈમાં વડા પ્રધાન નરેન્દ્ર મોદી અને રશિયન રાષ્ટ્રપતિ વ્લાદિમીર પુતિન વચ્ચેની મુલાકાત પછી બંને નેતાઓ વચ્ચે ઓક્ટોબરમાં ફરીથી દ્વિપક્ષીય વાટાઘાટો નક્કી કરવામાં આવી છે. આ સિવાય વડાપ્રધાન નરેન્દ્ર મોદી BRICS સંમેલનમાં ભાગ લેવા આવી રહેલા ચીનના રાષ્ટ્રપતિ શી જિનપિંગ સાથે વાત કરે તેવી પ્રબળ શક્યતા છે. આ પહેલા ચીનના વિદેશ મંત્રી વાંગ યીની વિદેશ મંત્રી જયશંકર અને રાષ્ટ્રીય સુરક્ષા સલાહકાર અજીત ડોભાલ સાથેની બેઠક દરમિયાન મોદી-જિનપિંગની સંભવિત બેઠકની તૈયારીઓની સમીક્ષા કરવામાં આવી હતી. PM મોદી રશિયાના કઝાનમાં હાજર અન્ય ઘણા સભ્ય દેશોના નેતાઓને મળવા પણ શક્ય છે.