રીપોર્ટ@ગાંધીનગર: અતિભારે વરસાદની આગાહીને પગલે 'વેધર વૉચ ગ્રુપ'ની બેઠક, રાજ્ય સરકાર એલર્ટ

અટલ સમાચાર ડોટ કોમ, ડેસ્ક

આગામી દિવસોમાં ભારે વરસાદની આગાહીને પગલે ગાંધીનગર સ્થિત સ્ટેટ ઈમરજન્સી ઓપરેશન સેન્ટર ખાતે રાહત કમિશનર ગૌરાંગ મકવાણાના અધ્યક્ષસ્થાને 'વેધર વૉચ ગ્રુપ'ની મહત્વપૂર્ણ બેઠક યોજાઈ હતી. બેઠકમાં ચોમાસાની વર્તમાન સ્થિતિ, હવામાન વિભાગની આગાહી તેમજ સંભવિત પૂર અને અન્ય આપત્તિઓ સામે રાજ્ય સરકારની તૈયારીઓની સમીક્ષા કરવામાં આવી હતી.

રાહત કમિશનરે તમામ વિભાગોને પરસ્પર સંકલન જાળવીને કામ કરવાની સૂચના આપી હતી.તેમણે જણાવ્યું કે હવામાન વિભાગની સેટેલાઇટ ઈમેજરી અને અદ્યતન પૂર્વાનુમાનના આધારે દક્ષિણ ગુજરાત સહિત વરસાદની સંભાવના ધરાવતા વિસ્તારો પર સ્ટેટ કંટ્રોલ રૂમ દ્વારા 24 કલાક સતત નજર રાખવામાં આવી રહી છે. કોઈપણ પ્રકારની કટોકટી સર્જાય તો તાત્કાલિક કંટ્રોલ રૂમને જાણ કરવા પણ તમામ વિભાગોને સૂચના આપવામાં આવી છે.હવામાન વિભાગના જણાવ્યા અનુસાર સાયક્લોનિક સર્ક્યુલેશન અને અરબી સમુદ્રમાં સક્રિય હવામાન પ્રણાલીના કારણે આગામી સાત દિવસ રાજ્યના અનેક વિસ્તારોમાં વરસાદી માહોલ રહેશે. ખાસ કરીને 22 જુલાઈના રોજ નવસારી, વલસાડ, દમણ અને દાદરા નગર હવેલીમાં કેટલાક સ્થળોએ ભારેથી અતિભારે વરસાદ થવાની સંભાવના વ્યક્ત કરવામાં આવી છે. તે ઉપરાંત 22 અને 23 જુલાઈ દરમિયાન અરવલ્લી, પંચમહાલ, દાહોદ, મહીસાગર, નર્મદા, સુરત, ડાંગ અને તાપી જિલ્લામાં પણ ખૂબ ભારે વરસાદની ચેતવણી આપવામાં આવી છે. જ્યારે 24 જુલાઈના રોજ ઉત્તર, મધ્ય અને દક્ષિણ ગુજરાતના અનેક જિલ્લાઓમાં ભારે વરસાદની સંભાવના દર્શાવવામાં આવી છે.

રાજ્ય સરકારે સંભવિત આપત્તિને પહોંચી વળવા માટે NDRF અને SDRFની ટીમોને જરૂરી સાધન-સામગ્રી સાથે સંવેદનશીલ વિસ્તારોમાં પહેલેથી જ તૈનાત કરી દીધી છે. ઉપરાંત કોસ્ટગાર્ડ, નેવી, આરોગ્ય, વન, કૃષિ અને મહેસૂલ વિભાગ સહિતની તમામ એજન્સીઓને એલર્ટ પર રાખવામાં આવી છે. રાહત કમિશનરે જણાવ્યું કે ડેમની જળસપાટી પર સતત નજર રાખવા માટે જળસંપત્તિ અને સિંચાઈ વિભાગને સૂચના આપવામાં આવી છે. જો ભારે વરસાદના કારણે રસ્તાઓ બંધ થાય તો વૈકલ્પિક માર્ગોની વ્યવસ્થા કરવા માર્ગ અને મકાન વિભાગને પણ તૈયાર રહેવા જણાવાયું છે.

વીજ પુરવઠો ખોરવાય તેવી સ્થિતિમાં ઝડપથી સેવા પુનઃસ્થાપિત કરી શકાય તે માટે ઊર્જા વિભાગે ઇમરજન્સી ટીમોને સ્ટેન્ડબાય રાખી છે. રાજ્ય સરકારે નાગરિકોને હવામાન વિભાગ અને સ્થાનિક વહીવટી તંત્ર દ્વારા જાહેર કરવામાં આવતી સૂચનાઓનું પાલન કરવાની અપીલ કરી છે. ભારે વરસાદ દરમિયાન નદી-નાળા, નીચાણવાળા વિસ્તારો અને જળભરાવવાળા માર્ગોથી દૂર રહેવા તેમજ બિનજરૂરી મુસાફરી ટાળવા સલાહ આપવામાં આવી છે. સંવેદનશીલ વિસ્તારોમાં રહેતા લોકોને પરિસ્થિતિ પર સતત નજર રાખી જરૂરી હોય ત્યારે વહીવટી તંત્રનો સંપર્ક કરવા પણ અનુરોધ કરવામાં આવ્યો છે.ભારે વરસાદની આગાહીને ધ્યાનમાં રાખીને રાજ્યના મુખ્ય ડેમોની જળસપાટી પર સતત નજર રાખવામાં આવી રહી છે.

જળસંપત્તિ વિભાગને ડેમમાં પાણીની આવક-જાવકની નિયમિત સમીક્ષા કરવા તેમજ જરૂરિયાત મુજબ નિયંત્રિત રીતે પાણી છોડવાની તૈયારી રાખવા સૂચના આપવામાં આવી છે. સાથે જ નદીકાંઠા અને નીચાણવાળા વિસ્તારોમાં રહેતા લોકોને સમયસર ચેતવણી મળી રહે તે માટે જિલ્લા વહીવટી તંત્રને પણ એલર્ટ પર રાખવામાં આવ્યું છે.